တိုက်ရိုက်ထုတ်လွှင့်မှု, ကျောက်တော်လေကြောင်းတိုက်ခံရမှု သေဆုံးသူ ၄၉ ဦးရှိလာ

တိုက်ရိုက် ထုတ်လွှင့်ချက်

1. လွန်ခဲ့သော ၃၂ မိနစ် ကကျောက်တော်လေကြောင်းတိုက်ခံရမှု သေဆုံးသူ ၄၉ ဦးရှိလာ

   

   ဓာတ်ပုံ ရင်းမြစ်, AA Info Desk

   မနေ့က ရခိုင်ပြည်နယ်၊ ကျောက်တော်မြို့မှာရှိတဲ့ ကစ္ဆပနဒီတံတားဝန်းကျင်နဲ့ အိန္ဒိယဈေး လေ ကြောင်း ဗုံးကြဲခံရမှုမှာ အရပ်သား ၄၉ ဦးအစုလိုက်သေဆုံးကာ ထိခိုက်သူ ၆၀ နီးပါးရှိလာပြီ လို့ အာရက္ခတပ်တော် (အေအေ)က ဒီမနက်အစောပိုင်းမှာ ထုတ်ပြန်ပါတယ်။

   ဘီဘီစီရဲ့ ဒေသခံသတင်းအရင်းအမြစ်ကတော့ ဒီမနက်ပိုင်းမှာ သေဆုံးသူ ၅၈ ဦးဝန်းကျင်ရှိ လာပြီလို့ သိထားရကြောင်း ဘီဘီစီကိုပြောပါတယ်။

   “လေယာဥ်တွေကတော့ ဆက်တိုက်လာနေတုန်းပါပဲ” လို့ သူကပြောပါတယ်။

   ဒဏ်ရာရထားသူ ၅၈ ဦးမှာ ၂၂ ဦးက ဒဏ်ရာပြင်းထန်တယ်လို့ အေအေက ထုတ်ပြန်ပါတယ်။

   လေကြောင်းတိုက်ခံရပြီး နာရီပိုင်းအတွင်း အေအေရဲ့ ကနဦးထုတ်ပြန်ချက်မှာ သေဆုံးသူ ၃၃ ဦး ရှိနေရာကနေ အရေအတွက်ဆက်တက်နေတာဖြစ်ပါတယ်။

   

   ဓာတ်ပုံ ရင်းမြစ်, AA Info Desk

   ဒီဖြစ်စဥ်ဟာ အရပ်သား ၃၃ ဦးသေဆုံးပြီး ၇၇ ဦးဒဏ်ရာရတဲ့ မြောက်ဦးဆေးရုံဖြစ်စဥ်အပြီးမှာ အရပ်သား ထိခိုက်သေဆုံးမှုအများဆုံးဖြစ်စဥ် ဖြစ်လာတာပါ။

   “သေဆုံးအရေအတွက်ဆက်တိုးနေတာက ဒဏ်ရာပြင်းထန်တဲ့သူတွေဆုံးတာထက် အပျက်အစီးတွေကြားက ကယ်ဆယ်ရင်းကနေ ဆက်ရှာတွေ့တဲ့သေဆုံးသူတွေဖြစ်ပါတယ်” လို့ လေကြောင်းတိုက်ခိုက်မှု ပြေးရှောင်ရင်း ခြေထောက်ဒဏ်ရာရတဲ့ ကျောက်တော်ဒေသခံတစ်ဦးက ဘီဘီစီကိုပြောပါတယ်။

   အာရက္ခတပ်တော်ကတော့ စစ်တပ်ရဲ့လုပ်ရပ်ကို ကန့်ကွက်ရှုတ်ချပြီး ဖြစ်စဥ်အတွက် တာဝန်ရှိသူတွေနဲ့အဖွဲ့အစည်းတွေကို လက်တုံ့ပြန်သွားမယ်လို့ ဒီမနက်အစောပိုင်းထုတ်ပြန်ချက်မှာ ပြောပါတယ်။

   မနေ့က ကျောက်တော်အပြင် မင်းပြားမြို့နယ်နဲ့ သံတွဲမြို့နယ်တို့မှာလည်း လေကြောင်းတိုက်ခိုက်ခံရပြီး အရပ်သား ၉ ဦး ဒဏ်ရာရတယ်လို့ အေအေက ထုတ်ပြန်ပါတယ်။

   စစ်တပ်ထောက်ခံသူတွေရဲ့ တယ်လီဂရမ်ချန်နယ်တွေမှာတော့ သေဆုံးသူတွေဟာ အေအေအဖွဲ့ဝင်တွေဖြစ်တယ်လို့ စွပ်စွဲထားကြပါတယ်။

2. လွန်ခဲ့သော ၃၄ မိနစ် က

   မင်္ဂလာပါ။ စက်တင်ဘာ ၂၉ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။