စည်းကမ်းမဲ့ သတ္တုတူးဖော်မှုတွေကြောင့် အဆိပ်သင့်လာတဲ့ မြန်မာ၊
ထိုင်းနဲ့ တရုတ်နိုင်ငံတွေကို ဖြတ်သန်းစီးဆင်းနေတဲ့ မြစ်ချောင်းတွေ ကာကွယ်ရေးအတွက်
လူထုအသိပေးဖို့ ရည်ရွယ် လမ်းလျှောက်တဲ့ Walk Peace for Rivers အဖွဲ့ဟာ
ဒီနေ့မှာ ချင်းရိုင်မြို့ကို ရောက်ပြီဖြစ်ပါတယ်။
မေ ၃၁ ရက်မှာ ချင်းမိုင်ကနေ စတင်ထွက်ခွာပြီး ဒီနေ့မှာ ချင်းရိုင်ကိုရောက်ကာ
ထိုင်းအာဏာပိုင် တွေနဲ့ တွေ့ဆုံဆွေးနွေးနေတယ်လို့ လမ်းလျှောက်ပွဲမှာပါဝင်တဲ့ ကိုမိုးဆက်မင်းခန့်က
ဘီဘီစီကို ပြောပါတယ်။
ဒီခရီးစဥ်ကို Save the Kok Riverနဲ့ ပြည်သူ့မြစ်ချောင်းများကွန်ရက်က ဦးစီးပြီး ချင်းရိုင် Mae Fah
Luang တက္ကသိုလ်ရဲ့ School of Social Innovation က ပူးပေါင်းကာ သံဃာတော်တွေ၊ ဒေသခံတွေ၊ လူငယ်တွေ၊ ပတ်ဝန်းကျင်ထိန်းသိမ်းရေးလှုပ်ရှားသူတွေနဲ့
Mae Fah Luang တက္ကသိုလ်က မြန်မာကျောင်းသားတွေ
ပါဝင်ခဲ့ကြတာပါ။
၅ ရက်တာ လမ်းလျှောက်ခရီးစဥ်မှာ လမ်းတကြောက ဒေသခံတွေရဲ့ အတွေ့အကြုံတွေနဲ့
မြစ်ချောင်းနဲ့ပတ်သက်တဲ့ စိုးရိမ်မှုတွေကို ကြားသိရတယ်လို့ ကိုမိုးဆက်မင်းခန့်က ပြောပါတယ်။
မြန်မာနိုင်ငံ၊ ရှမ်းအရှေ့၊ မိုင်းဆက်ခရိုင်ကလာတဲ့ နမ့်ခုတ်မြစ်(ထိုင်းဘက်ခြမ်းအခေါ်
ကွတ်မြစ်) နဲ့ ကယား၊ မော်ချီးဒေသက မိုလိုချောင်းတို့ စီးဝင်တဲ့ သံလွင်မြစ်ရေဟာ အာဆင်းနစ်အဆိပ်ပါဝင်မှု
နိုင်ငံတကာစံနှုန်းထက် ၄ ဆကနေ ၉ဆအထိ မြင့်တက်နေတယ်လို့ ကရင်နီကြားကာလကောင်စီ IEC ကထုတ်ပြန်ပါတယ်။
ကရင်နီကြားကာလကောင်စီနဲ့ ချင်းမိုင်တက္ကသိုလ်(သဘာဝပတ်ဝန်းကျင်ဌာန)တို့ပူးပေါင်းပြီး
ပြီးခဲ့တဲ့နှစ်ဒီဇင်ဘာက သံလွင်မြစ်နဲ့ မိုလိုချောင်းရေတွေကို ဓာတ်ခွဲစစ်ဆေးခဲ့တာဖြစ်ပါတယ်။
ဝတပ်ဖွဲ့ (UWSA) က မြေရှားလုပ်ကွက်တွေ ချဲ့ထွင်လာတဲ့ မိုင်းဆတ်က နမ့်ခုတ်မြစ်ဟာ
ထိုင်းနိုင်ငံ ချင်းမိုင်နဲ့ ချင်းရိုင်တို့ကို ဖြတ်ပြီး မဲခေါင်မြစ်ထဲ စီးဝင်နေတာဖြစ်ပါတယ်။
“အဓိက UWSA
ထိန်းချုပ်နယ်မြေမှာဖြစ်တဲ့ သတ္တုတွင်းတူးဖော်မှုတွေကို ရပ်နိုင်ဖို့
မြန်မာအစိုးရ တစ်ခုတည်းနဲ့တွေ့တာ လုံလောက်မှုမရှိဘူး။ တရုတ်ရဲ့ရင်းနှီးမြှုပ်နှံမှုတွေကြောင့်
တရုတ် ဘေကျင်းအစိုးရကလည်း ဒီအပေါ် အလားတူတာဝန်ရှိသူဖြစ်တာကြောင့် တရုတ်ကိုလည်း
ဖိအားပေးရမှာဖြစ်ပါတယ်” လို့ ကိုမိုးဆက်မင်းခန့်ကပြောပါတယ်။
ဒီနေ့ကျရောက်တဲ့ ကမ္ဘာ့ပတ်ဝန်းကျင်ထိန်းသိမ်းရေးနေ့မှာ ကချင်ပြည်နယ်က
လူငယ်တွေကလည်း စစ်တပ်က တရုတ်နဲ့ပူးပေါင်းပြီး ပြန်လည်စတင်ဖို့လုပ်နေတဲ့ မြစ်ဆုံစီမံကိန်းရှိရာ
ဧရာဝတီမြစ်ကို ကာကွယ်စောင့်ရှောက်ရေးအတွက် လှုပ်ရှားမှုလုပ်ခဲ့ပါတယ်။
