တိုက်ရိုက်ထုတ်လွှင့်မှု, ကချင်-စစ်ကိုင်းအစပ်က မြို့နယ် ၅ ခုမှာ တိုက်ပွဲနဲ့ စစ်ရေးတင်းမာနေ

တိုက်ရိုက် ထုတ်လွှင့်ချက်

1. လွန်ခဲ့သော ၂ မိနစ် ကမြန်မာ-ဘင်္ဂလားဒေ့ရှ်နယ်စပ်မှာ မြေမြှုပ်မိုင်းပေါက်လို့ ဘင်္ဂလားဒေ့ရှ်နိုင်ငံသား ၃ ဦးသေဆုံး

   

   ဓာတ်ပုံ ရင်းမြစ်, Getty Images

   မြန်မာနဲ့ ဘင်္ဂလားဒေ့ရှ် နှစ်နိုင်ငံ နယ်စပ်မှာ မြေမြှုပ်မိုင်းပေါက်ကွဲမှုတွေကြောင့် ဘင်္ဂလားဒေ့ရှ်နိုင်ငံသား ၃ ဦး သေဆုံးတယ်လို့ ဘင်္ဂလားဒေ့ရှ်ကလာတဲ့သတင်းတွေမှာ ဖော်ပြပါတယ်။

   မြေမြှုပ်မိုင်းပေါက်ကွဲမှုတွေဟာ ရခိုင်ပြည်နယ်နဲ့နယ်စပ်၊ ဘင်္ဂလားဒေ့ရှ်နိုင်ငံ၊ ဘန်ဒါဘန်ခရိုင် ၊ နိုင်ခွန်ချာရီအနီးက မြန်မာ- ဘင်္ဂလားဒေ့ရှ်နယ်စပ်မှာ မနေ့ မေလ ၂၄ ရက်၊ မနက် ၁၀ နာရီခန့်မှာ ဖြစ်ခဲ့တာလို့လည်း သတင်းတွေက ဆိုပါတယ်။

   ဖြစ်စဉ်မှာ သေဆုံးသူ ၃ ဦးဟာ သူတို့ရဲ့ ငှက်ပျောခင်းကို သွားချိန် ပေါက်ကွဲမှုဖြစ်ခဲ့ပြီး တစ်ဦးဒဏ်ရာရလို့ နောက်ထပ် ၂ ဦးက ကယ်ဆယ်ဖို့ကြိုးစားချိန်မှာလည်း ပေါက်ကွဲမှု ၂ ကြိမ် ထပ်ဖြစ်ခဲ့တာလို့ သတင်းတွေမှာဖော်ပြပါတယ်။

   ဘင်္ဂလားဒေ့ရှ်ဒေသန္တရ အာဏာပိုင်တွေကတော့ ပေါက်ကွဲမှုဖြစ်တဲ့နေရာဟာ နှစ်နိုင်ငံ နယ်စပ်က no-man's-land နေရာမှာဖြစ်ခဲ့တယ်လို့ ကနဦး သိရှိထားရတဲ့အကြောင်း သတင်းထောက်တွေကို ပြောပါတယ်။

   သေဆုံးခဲ့သူတွေဟာ အသက် ၄၀ နဲ့ ၅၀ ဝန်းကျင်ကြား အမျိုးသား သုံးဦးဖြစ်ပြီး အဲဒီဒေသမှာ အခြေစိုက်တဲ့ တိုင်းရင်းသားမျိုးနွယ်စုတစ်ခုက ဖြစ်ပါတယ်။

   ဘင်္ဂလားဒေ့ရှ်နယ်ခြားစောင့်တပ်(BGB)ကလည်း အခင်းဖြစ်ရာနေရာကို သွားရောက်စစ်ဆေးခဲ့ပြီး သူတို့ရောက်တဲ့အချိန်မှာ အရပ်သား ၃ ဦးလုံး သေဆုံးသွားပြီလို့ နယူးအေ့စ် သတင်းဌာနကို ဖြေကြားထားပါတယ်။

   BGB အနေနဲ့ အခုလိုပေါက်ကွဲမှုတွေကြောင့် နှစ်နိုင်ငံနယ်စပ်အနီးက သုညနယ်ခြားမျဉ်းတဝိုက်မှာ သွားလာတာတွေ မလုပ်ကြဖို့ ဘင်္ဂလား‌ဒေ့ရှ်နိုင်ငံသားတွေကို အသိပညာပေးတဲ့အစီအစဉ်တွေ လုပ်ပေးနေတယ်လို့ ဆိုပါတယ်။

   ၂၀၂၅ နှောင်းပိုင်းတုန်းကလည်း ဘင်္ဂလားဒေရှ့်ဘက်ခြမ်း တမ်ဘရူနယ်စပ်မှာ မြေမြှုပ်မိုင်းပေါက်ကွဲမှုကြောင့် လုံခြုံရေးစောင့်ကြပ်နေတဲ့ ဘင်္ဂလားဒေ့ရှ်နယ်ခြားစောင့်တပ်(BGB) တပ်ဖွဲ့ဝင်တစ်ဦး ခြေထောက်တစ်ဖက် ဆုံးရှုံးခဲ့တဲ့ဖြစ်စဉ်ရှိခဲ့ပါတယ်။

2. လွန်ခဲ့သော တစ်နာရီ ကကချင်-စစ်ကိုင်းအစပ်က မြို့နယ် ၅ ခုမှာ တိုက်ပွဲနဲ့ စစ်ရေးတင်းမာနေ

   

   ဓာတ်ပုံ ရင်းမြစ်, Getty Images

   ကချင်ပြည်နယ်နဲ့ စစ်ကိုင်းတိုင်းအစပ်က ရွှေကူ၊ မဘိမ်း၊ ကသာ၊ အင်းတော်၊ မော်လူးနဲ့ ထီးချိုင့် မြို့နယ်တွေမှာ ကချင်လွတ်လပ်ရေးတပ်(KIA)နဲ့ ပြည်သူ့ကာကွယ်ရေးတပ်(PDF) ပူးပေါင်းအဖွဲ့တွေနဲ့ စစ်တပ်တို့ တိုက်ပွဲဖြစ်တာနဲ့ စစ်ရေးတင်းမာနေတယ်လို့ မြေပြင်အခြေအနေသိရှိတဲ့သတင်းရင်းမြစ်က ပြောပါတယ်။

   ကချင်ပြည်နယ်၊ ရွှေကူမြို့နယ်မှာ မြန်မာစစ်တပ်နဲ့ ကချင်လွတ်လပ်ရေးတပ်(KIA) နဲ့ပူးပေါင်းတပ်တွေကြား တစ်ပတ်ကျော်ကြာ တိုက်ပွဲပြင်းထန်နေပြီး ရွာတချို့မှာလည်း နှစ်ဖက်တပ်တွေ စစ်ဆိုင်ထားကြတဲ့အခြေအနေလို့ ဘီဘီစီရဲ့မြေပြင်သတင်းရင်းမြစ်က ပြောပါတယ်။

   စစ်တပ်က ‌ရွှေကူတိုက်ပွဲမှာ ဒရုန်းအသေးစားအပြင် လက်နက်ကြီးတွေ ပိုသုံးပြီး ပစ်ခတ်တိုက်ခိုက်နေတယ်လို့ KIA ရဲ့ ပြန်ကြားရေးတာဝန်ခံ ဗိုလ်မှူးကြီးနော်ဘူက ဘီဘီစီကို ဒီနေ့ မေလ ၂၅ ရက် မနက်ပိုင်းမှာ ပြောပါတယ်။

   ရွှေကူတိုက်ပွဲအတွင်း တော်လှန်ရေး ပူးပေါင်းတပ်တွေဘက်ကလည်း ရွှေကူကနေ မဘိမ်းမြို့နယ်၊ ငါးအိုးရွာဘက်တက်လာတဲ့ စစ်တပ်စစ်ကြောင်းကို ဒရုန်းနဲ့ ဗုံးကြဲတိုက်ခိုက်တဲ့ရုပ်သံဖိုင်တစ်ခုလည်း မနေ့ မေလ ၂၄ ရက်မှာ ထုတ်ပြန်ထားပါတယ်။ဗိုလ်မှူးကြီးနော်ဘူကတော့ ရွှေကူ-ငါးအိုး လမ်းပိုင်းပေါ်က အင်အား ၃၀၀ ဝန်းကျင်ရှိတဲ့ စစ်တပ်စစ်ကြောင်းတွေနဲ့ KIA ပူးပေါင်းတပ်တွေ တိုက်ပွဲဆက်ရှိနေတယ်လို့ ဘီဘီစီကို ပြောပါတယ်။

   မဘိမ်းမြို့ကို KIA နဲ့ပူးပေါင်းတပ်တွေက ၂၀၂၄ ခုနှစ်ကတည်းက ထိန်းချုပ်ထားတာဖြစ်ပါတယ်။

   တစ်ဖက် က.သုံး.လုံးဒေသထဲက စစ်တပ်ပြန်ထိန်းချုပ်ထားတဲ့ ကသာ၊ အင်းတော်နဲ့ ထီးချိုင့်၊ မော်လူးစတဲ့ မြို့တွေဘက်မှာလည်း KIA ပူးပေါင်းတပ်တွေနဲ့ မြန်မာစစ်တပ်တို့ကြား တိုက်ပွဲတွေဆက်ရှိနေတယ်လို့ မြေပြင်အခြေအနေသိသူတချို့က ပြောပါတယ်။

   စစ်ကိုင်းတိုင်းအထက်ပိုင်းမှာရှိတဲ့ ကောလင်း၊ ကသာ၊ ကန့်ဘလူခရိုင်နဲ့ မြို့နယ်ပေါင်း ၉ ခုတို့ကို က.သုံး.လုံး ဒေသလို့ သတ်မှတ်ခေါ်ဝေါ်ကြပါတယ်။

   “ကသာမြို့အပြင် ကသာနဲ့ ထီးချိုင့်ကြားမှာ တိုက်ပွဲတွေရှိပါတယ်။ အင်းတော်-နဘား-မော်လူးဘက်တကြောမှာလည်း တိုက်ပွဲတွေ နေ့တိုင်းလိုလိုဖြစ်နေဆဲပါ” လို့ ဗိုလ်မှူးကြီးနော်ဘူက ဖြေကြားပါတယ်။

   အဲဒီမြို့တွေကို မြန်မာစစ်တပ်က ၂၀၂၆ ခုနှစ်ထဲမှာပဲ ပြန်ထိန်းချုပ်ခဲ့ပေမယ့် ကသုံးလုံးအခြေစိုက် ပူးပေါင်းတပ်တွေကလည်း ဒီနေရာတွေကို ပြန်ရဖို့ ထိုးစစ်ပြန်ဆင်နေတာလို့ မြေပြင်အခြေအနေသိသူတစ်ဦးက ပြောပါတယ်။

   မြန်မာစစ်တပ်ကတော့ ကချင်နဲ့ စစ်ကိုင်းအစပ်နေရာက စစ်ရေးအခြေအနေတွေနဲ့ပတ်သက်လို့ သတင်းထုတ်ပြန်လာတာ မရှိသေးပါဘူး။

3. လွန်ခဲ့သော တစ်နာရီ က

   မင်္ဂလာပါ။ မေလ ၂၅ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။