တိုက်ရိုက်ထုတ်လွှင့်မှု, ‘‘နေပြည်တော်က အတိုက်အခံအင်အားစုတွေနဲ့ဆွေးနွေးလိုပုံပြလာတယ်’’- မလေးရှားနိုင်ငံခြားရေးဝန်ကြီး

တိုက်ရိုက် ထုတ်လွှင့်ချက်

1. လွန်ခဲ့သော ၁၃ မိနစ် ကတရုတ်နဲ့ ရုရှားကို ဘာက ပေါင်းစည်းပေးနေတာလဲ

   

   ဓာတ်ပုံ ရင်းမြစ်, Getty Images

   ဘေဂျင်းမြို့က တီရန်နန်မင်ရင်ပြင်မှာ တရုတ် သမ္မတ ရှီကျင့်ဖျင်နဲ့ ရုရှားသမ္မတ ဗလာဒီမီယာ ပူတင်တို့ ပြီးခဲ့တဲ့စက်တင်ဘာလတုန်းက လမ်းလျှောက်ကြတုန်းကတော့ လူ့ ကိုယ်တွင်းအင်္ဂါတွေကို အစားထိုးလဲလှယ်လိုက်ရင် လူ့အသက် ဆွဲဆန့်ဖို့ရာ ဖြစ်နိုင်တဲ့အကြောင်း နှစ်ယောက်သား ပေါ့ပေါ့ပါးပါး စကားပြောခဲ့ကြဖူးပါတယ်။

   ''လူ့ကိုယ်အင်္ဂါတွေကို ဆက်တိုက် အစားထိုးလဲလှယ်လို့ ရတယ်။ အသက်ရှည်လေလေ နုပျိုလေလေပါပဲ။ သေခြင်းကို ကျော်လွှားနိုင်တာမျိုးတောင် ဖြစ်နိုင်တယ်'' လို့ ပူတင်က စကားပြန်ကနေ တဆင့် စကားပြောခဲ့တာကို ကြားခဲ့ရပါတယ်။

   ''အခုရာစုနှစ်မှာ လူ့အသက်ဟာ နှစ် ၁၅၀ အထိ ရှည်နိုင်တယ်လို့ ခန့်မှန်းကြသူ အချို့လည်းရှိတယ်'' လို့ ရှီက စကားပြန်ကနေ တဆင့် ပြန်ပြောတာကိုလည်း ကြားခဲ့ရပါတယ်။

   ဒါဟာ နှစ်ယောက်ပေါင်းရင် အာဏာယူသက် နှစ် ၄၀ နီးပါးရှိပေမဲ့ ရာထူးကနေ ဆင်းမယ့် အရိပ်အယောင် မပေါ်သေးသူ နှစ်ဦး၊ တစ်ဦးနဲ့ တစ်ဦး မိတ်ဆွေရင်းခြာတွေလို့ ပြောထားကြတဲ့သူ နှစ်ဦးကြား အတိုင်အဖောက်ညီနေတဲ့ စကားပြောဆိုမှုလည်း ဖြစ်ခဲ့ပါတယ်။

   ဒါဟာ တရုတ်နဲ့ ရုရှား ခေါင်းဆောင်နှစ်ဦးကြား ဇာတ်မတိုက်ဘဲ ပြောကြတဲ့ အပြန်အလှန်စကားပြောဆိုမှုလည်းဖြစ်ပြီး လျှို့ဝှက်လွန်းတဲ့သူတို့နှစ်ယောက်ရဲ့ ဆက်ဆံရေးကို လှစ်ဟပြရာလည်း ရောက်ပါတယ်။

   အပြည့်အစုံကို ဒီလင့်ခ် ကို နှိပ်ပြီး ဆက်လက်ဖတ်ရှုနိုင်ပါတယ်။

2. လွန်ခဲ့သော တစ်နာရီ ကနေပြည်တော်က အတိုက်အခံအင်အားစုတွေနဲ့ ဆွေးနွေးလိုပုံပြလာတယ်လို့ မလေးရှားနိုင်ငံခြားရေးဝန်ကြီးပြော

   

   ဓာတ်ပုံ ရင်းမြစ်, MFA

   နေပြည်တော်ဟာ အတိုက်အခံအင်အားစုတွေနဲ့ ဆွေးနွေးလိုပုံပြလာတယ်လို့ မလေးရှားနိုင်ငံခြားရေးဝန်ကြီး ဒါတိုဆရီ မိုဟာမက် ဟာဆန်ပြောပါတယ်။ မနေ့က နေပြည်တော်ကို သွားခဲ့တဲ့ သူ့ရဲ့နေ့ချင်းပြန်ခရီးအပြီး မလေးရှားနိုင်ငံကို ပြန်ရောက်ချိန်မှာ အခုလို ပြောလိုက်တာဖြစ်ပါတယ်။

   မလေးရှားနိုင်ငံခြားရေးဝန်ကြီးဟာ နေပြည်တော်မှာ နိုင်ငံခြားရေးဝန်ကြီး ဦးတင်မောင်ဆွေနဲ့ မနေ့က တွေ့ဆုံခဲ့တာဖြစ်ပါတယ်။

   “အရင်က အတိုက်အခံအကြောင်းပြောရင် လက်မခံပေမဲ့ အခုတော့ အားလုံးနဲ့ တွေ့ဆုံဆွေးနွေးလိုပုံ ပြလာပါတယ်” လို့ မလေးရှားနိုင်ငံခြားရေးဝန်ကြီးကပြောပါတယ်။

   ဆွေးနွေးပွဲနဲ့ပတ်သက်ပြီး အတိုက်အခံတွေဘက်က သက်ဆိုင်ရာပါဝင်သင့်ပါဝင်ထိုက်သူတွေအားလုံး ပါဝင်လာအောင် မလေးရှားဘက်က ကူညီဖို့ အဆင်သင့်ရှိနေတယ်လို့လည်း သူက ပြောပါတယ်။ ဒါပေမဲ့ ဒီချဉ်းကပ်မှုဟာ သတိကြီးကြီးထားလုပ်ရမယ့် ကိစ္စဖြစ်တယ်ဆိုတာကိုတော့ သူလက်ခံထားကြောင်းလည်း ပြောပါတယ်။

   နေပြည်တော်လာရောက်ခဲ့တဲ့ နိုင်ငံခြားရေးဝန်ကြီးက ဇူလိုင် ၃၀ မှာ သက်တမ်းကုန်မယ့် မြန်မာက အပစ်ရပ်ကြေညာချက်ကို အနည်းဆုံး ၆ လ ဒါမှမဟုတ် အကန့်အသတ်မဲ့ပြန်လည်စတင်ဖို့လည်း ဒီခရီးစဥ်မှာ ပြောခဲ့တယ်လို့ ဝန်ကြီးက ဆိုပါတယ်။

   မကြာသေးခင်က ဖိလစ်ပိုင်မှာ ပြုလုပ်တဲ့ အာဆီယံခေါင်းဆောင်တွေရဲ့ဆွေးနွေးပွဲအရ မလေးရှား နိုင်ငံခြားရေးဝန်ကြီးက မြန်မာကိုလာခဲ့တာဖြစ်ပါတယ်။ မြန်မာ့အရေး အာဆီယံက ချဥ်းကပ်ပုံအသစ် လုပ်ဆောင်ဖို့အတွက် စစ်တမ်းတစ်ခုပြုလုပ်ဖို့နဲ့ မြန်မာနိုင်ငံခြားရေးဝန်ကြီးနဲ့တွေ့ဆုံဖို့ အာဆီယံနိုင်ငံခြားရေးဝန်ကြီးတွေကို တာဝန်ပေးအပ်ခဲ့တာပါ။

   ဒီခရီးစဥ်တွေ့ရှိချက်ကို အစိုးရအဖွဲ့ဆီ အစီရင်ခံစာတင်ပြသွားမယ်လို့လည်း မလေးရှားနိုင်ငံခြားရေး ဝန်ကြီးကပြောပါတယ်။ မြန်မာဘက်က‌ ထုတ်ပြန်ချက်မှတော့ နှစ်နိုင်ငံဆက်ဆံရေးနဲ့ အာဆီယံကိစ္စရပ်တွေကို ပူးပေါင်း ဆောင်ရွက်ဖို့ ဆွေးနွေးတယ်လို့ ဒီနေ့ ထုတ်ပြန်ပေမဲ့ အသေးစိတ်ကို မဖော်ပြထားပါဘူး။

3. လွန်ခဲ့သော တစ်နာရီ က

   မင်္ဂလာပါ။ မေလ ၂၀ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။