Earrann leughaidh - an sgeulachd aig An Leòbag
Ann an 1923 dh'fhàg an SS Marloch agus an SS Metagama na h-Eileanan an Iar airson a dhol a Chanada le faisg air 600 eilthireach air bòrd.
Tha am monolog, ann an riochd dràma, air a bheil earrann leughaidhan stòiridh aig An Leòbag stèidhichte, air aon de shreath a chaidh a bhrosnachadh leis na stòiridhean aig cuid dhe na daoine seo.
Dreach luath
Caractarachd agus dòigh-aithris
Anns an earrainn seo tha cothrom:
- eòlas a chur air sgilean sgrìobhaidh An dòigh san tèid caractar a chruthachadh agus a thaisbeanadh. agus An dòigh no sealladh bhon tèid sgeulachd innse.
- sgrùdadh a dhèanamh air mar a chleachd an sgrìobhadair na sgilean seo gu soirbheachail
- bhidio fhaicinn den sgeulachd aig An Leòbag agus tar-sgrìobhadh a leughadh
- bhidio fhaicinn anns a bheil an sgrìobhadair a' bruidhinn mu bhith a' sgrìobhadh an teacs
Leugh agus coimhead air an sgeulachd aig An Leòbag.
Leasaich do sgilean sgrùdaidh le bhith a' beachdachadh air mar a chleachd an sgrìobhadair caractarachd agus dòigh-aithris anns an teacs seo.
Ionnsaich barrachd
'S e monolog a chaidh a sgrìobhadh airson prògram dràma a th' anns an earrann leughaidh seo.
Tha bhidio agus tar-sgrìobhadh den mhonolog air an duilleig mar thaic ann a bhith ga thuigsinn agus ga sgrùdadh. Cuimhnich ge-tà nach bi bhidio ann an earrainn leughaidh na deuchainn.
Faodar an dà chuid a' bhidio agus an tar-sgrìobhadh a chleachdadh airson na ceistean sgrùdaidh a fhreagairt, 's dòcha le bhith a' coimhead air a' bhidio an toiseach is an uair sin a' dèanamh dlùth-leughadh air an tar-sgrìobhadh.
Tha na ceistean a' cur fòcas air mar a chleachd an sgrìobhadair caractarachd agus dòigh-aithris airson buaidh a thoirt air an neach-coimhid/an leughadair.
An sgeulachd aig An Leòbag
Anns an earrainn seo, tha An Leòbag ag innse mun iomadh rud a rinn e fhad 's a bha e ann an Ameireaga agus carson a thill e a dh'fhuireach a Steòrnabhagh aig a' cheann thall.
Marloch is Metagama: Guthan - An Leòbag.
"An Leòbag"
Steòrnabhagh, 1955
1 Tha e duilich a bhith ceart fad na h-ùine. Fhios agad, uaireannan chan eil daoine airson rud a chluinntinn fiù 's ged a dhèanadh e feum dhaibh. Ach sin agad daoine.
2 Bidh iad ag ràdh, "Siud An Leòbag, a' cur às a chorp a-rithist". 'S mise a bha thall 's a chunnaic. Bha mise anns na States agus cha choinnich thu ri mòran dhaoine cho sònraichte rium. An dà spòg seo, 's iad a thog an dùthaich sin.
3 Abair làmhan. Boxadh, 's e boxing champion a bh' annam cuideachd. Bheir mise ciabhag dhut a bheireas ort rànail airson do mhàthair. Agus nuair a thig e gu drochaidean, rathaidean, skyscrapers agus ironworks, chan eil Oracle Delphi fhèin cho fiosraichte.
4 Thàinig an J thugam an latha eile agus mi a' creagach. 'S thuirt e, "Chuala mi gun robh thu a' cluich chairtean leis an diabhal ann am boiler room a' Mhetagama". 'S thuirt mi ris, "Chluich mi cairtean leis an diabhal, 's nach do bhuannaich mi cuideachd".
5 Agus aig an dearbh dhiog sin, thog mi ochd saoidhein a-mach às a' mhuir. Agus bha sin a' sealltainn dha gu robh mi ceart. Agus chuir sin stopper air a' chlapper aige thairis air a' charry on.
6 Agus bha an I, bràthair an J, fiù 's gam chreids' agus bha headpiece uabhasach math airsan, ged nach robh dad a dh'fheum ann over the side air soitheach. Cha pheantadh an duine sin soidhne air othaisg gu luaidh air steamair a thogail ann an Harland & Wolff mar a rinn mise. Agus thill mi agus chan eil fiù 's rathad eadar Nis is Tolastadh fhathast!
7 Phòs an I a' bhean cheàrr, ach a rèir choltais chan urra dhut sin a ràdh ri duine.
8 Bidh iad a' faighneachd dhomh, "Carson a thill thu a dh'fhuireach ann an Steòrnabhagh?" Agus bidh mi a' freagairt, "Nach do thill Ìosa Crìosd e fhèin airson daoine a chuideachadh?" Mo chreach 's a-steach, daoine duilich. Cuidichidh mise duine sam bith. 'Let he who casts the first rod', and all that.
9 Bidh iad ag ràdh, "Nach ann agad a tha twang ann am Beurla?" Ma-thà tha mi 'n dùil! Tapadh leat airson mothachadh. 'S e as fheàrr na twang Steòrnabhaigh co-dhiù!
10 Fàidh na dhùthaich fhèin. Sin mise. Cumaidh sinn oirnn. 'S chan urrainn dhuinn ach a bhith dòchasach gun tig an ath ghinealach, 's gun èist iad ri comhairle An Leòbag.
11 Sin mise, An Leòbag.
Ceistean air an earrainn
Leugh paragrafan 1 agus 2
Mìnich an An dòigh no sealladh bhon tèid sgeulachd innse. a th' air a chleachdadh an seo agus am feum a tha i a' dèanamh dhan teacs.
"'S mise a bha thall 's a chunnaic." - Tha an earrann seo sgrìobhte bho shealladh a' chiad phearsa, is An Leòbag ag aithris bho a shealladh phearsanta fhèin. Tha seo a' cruthachadh ceangal eadar an neach-aithris agus an leughadair oir tha sinn a' faireachdainn gur ann rinn fhèin a tha An Leòbag a' bruidhinn.
Leugh paragrafan 3 agus 4
Seall mar a tha caractar an neach-aithris a' tighinn am follais sa phàirt seo dhen earrainn.
- "Bheir mise ciabhag dhut a bheireas ort rànail airson do mhàthair." - Tha e soilleir gur e an seòrsa fir a th' anns An Leòbag a tha ag iarraidh e fhèin a thaisbeanadh ann an dòigh ghaisgeil is tha am facal "ciabhag" (a' ciallachadh buille san t-seagh seo) air a chleachdadh airson sgil bogsaidh an duine a dhearbhadh.
- "Chluich mi cairtean leis an diabhal, 's nach do bhuannaich mi cuideachd." - Tha àbhachd air a chleachdadh gus an tuig an leughadair gur e fear rudeigin bragail a th' anns An Leòbag agus e deònach fealla-dhà a dhèanamh cho fad 's a tha e a' cur ris a' chliù aige.
Leugh paragrafan 5, 6 agus 7
Seall mar a tha feartan ann an An dòigh san tèid caractar a chruthachadh agus a thaisbeanadh. an neach-aithris a' tighinn am follais sna paragrafan seo.
- "Agus aig an dearbh dhiog sin, thog mi ochd saoidhein a-mach às a' mhuir." - Tha e soilleir gu bheil An Leòbag buailteach A' cur ris an fhìrinn airson buaidh a thoirt. a dhèanamh a thaobh nan euchdan aige. Tha seo a' cur ris a' bheachd gur e fear bragail a th' ann a bhios a' cur ris an fhìrinn airson ìomhaigh fhèin a neartachadh.
- "Cha pheantadh an duine sin soidhne air othaisg gu luaidh air steamair a thogail ann an Harland & Wolff mar a rinn mise." - Le bhith a' cur sìos air an ‘I', tha e a' tighinn am follais gu bheil An Leòbag buailteach dìmeas a dhèanamh air comasan dhaoine eile agus gu bheil e a' cur ris an fhìrinn airson an ìomhaigh aige fhèin a neartachadh.
- "Phòs an I a' bhean cheàrr, ach a rèir choltais chan urra dhut sin a ràdh ri duine." - Tha e coltach an seo nach eil mòran co-fhaireachdainn no spèis aig An Leòbag ri na daoine a tha timcheall air agus gu bheil e deònach a bhith a' cur sìos orra dòigh sam bith a thogras e, fiù le bhith a' ceasnachadh nan roghainnean pòsaidh aca.
- "ach a rèir choltais chan urra dhut sin a ràdh ri duine." - Tha e follaiseach bho na facail seo gun robh An Leòbag mothachail gun robh na thuirt e air a mheas mì-iomchaidh leis an neach a chuala e ach chan eil e idir a' toirt seo fa-near.
Leugh paragrafan 8-11
"Nach do thill Ìosa Crìosd e fhèin airson daoine a chuideachadh?"
A' smaoineachadh air na thàinig roimhe, mìnich mar a tha am beachd seo a' toirt dòigh-aithris An Leòbag gu àirde.
Gu ruige seo, tha sinn air iomadh eisimpleir bòstaidh a leughadh - eadar "boxing champion" agus a bhith nas fiosraichte na Oracle Delphi - ach tha an coimeas a tha An Leòbag a' dèanamh eadar e fhèin agus Ìosa mar gum biodh a' toirt cùisean gu ceann is a' fàgail an leughadair leis a' bheachd gu bheil e air leth mòr às fhèin.
"Fàidh na dhùthaich fhèin. Sin mise."
A thaobh caractar An Leòbag, dè an teachdaireachd a tha ga toirt seachad leis a' bheachd seo?
- "gun èist iad ri comhairle An Leòbag." - Leis na coimeasan a rinn e eadar e fhèin is Oracle Delphi agus Ìosa Crìosd, tha e mar gu bheil An Leòbag den bheachd gum b' fheudar dha tilleadh a Steòrnabhagh airson an sluagh fhoghlamachadh no a stiùireadh.
- "gun tig an ath ghinealach, 's gun èist iad ri comhairle An Leòbag." - Tha an dòigh sa bheil An Leòbag a' bruidhinn a' toirt seachad teachdaireachd gu bheil e ga fhaicinn fhèin nas lèirsinniche na daoine eile agus gun urrainn dha an cuideachadh. Ged nach eile daoine ag èisteachd ris tha e coltach gu bheil e deònach cumail air feuch an gabh linn eile a chomhairle.
Carson, nad bheachd-sa, a chaidh tòrr Bheurla a chleachdadh leis a' charactar seo? Cleachd fianais nad fhreagairt.
"Bidh iad ag ràdh, 'Nach ann agad a tha twang ann am Beurla?'" - Tha an dòigh sam bi e a' cleachdadh na Beurla agus a dh'aona-ghnothach a' fuaimneachadh cuid a dh'fhacail le blas-cainnt sònraichte na bheachd fhèin a' sealltainn gun aithne dhàsan dòigh bruidhinn agus dòigh-bheatha eile.
"'S e as fheàrr na twang Steòrnabhaigh co-dhiù!" - Tha e mar gu bheil An Leòbag airson dearbhadh gu bheil e air leth bho (no fiù os cionn) chàch o chionn 's gu bheil e air a bhith thall-thairis, air falbh bhon dachaigh, gu sònraichte Steòrnabhagh san eisimpleir seo, agus mar sin tha mar gum biodh eòlas na b' fheàrr aige na acasan nach do dh'fhàg Steòrnabhagh a-riamh.
Bhidio - a' sgrìobhadh caractar
Iain F MacLeòid a' bruidhinn mu bhith a' sgrìobhadh an sgeulachd aig An Leòbag agus aig Doileag airson sreath Marloch is Metagama: Guthan.
A' sgrìobhadh caractar.
Ciamar a tha sibh a' sgrìobhadh caractar?
A thaobh caractar, tha e meadhanach sìmplidh. 'S e sin ma tha neach ann an suidheachadh agus ann an suidheachadh duilich, dè tha iad a' dèanamh anns an t-suidheachadh sin? Agus an rud a tha iad a' dèanamh, tha sin ag innse dhut a' charactar aca. Agus ma tha thu ga dhèanamh thairis air sgeulachd, tha thu a' coimhead nan taghaidhean a tha iad a' dèanamh thairis air an sgeulachd agus tha sin dìreach ag innse dhuinn de an seòrsa caractar a th' aca.
A bheil caractaran ann as fheàrr leibh?
Tha gach caractar, tha iad ann an suidheachadh duilich dhaibh fhèin agus tha iad a' dèanamh diofar rudan. Mar eisimpleir An Leòbag, chòrd e rium a bhith ga sgrìobhadh oir bha e rudeigin nas… duine gu math spòrsail agus làn dheth fhèin agus a' tighinn a-mach le rudan gu math annasach is gòrach. Ach Doileag, bha i ann an suidheachadh uabhasach duilich dhi fhèin.
Tha iad a' dèanamh diofar rudan dhut mar sgrìobhadair. Agus an rud a tha math mu dheidhinn sgrìobhadh - tha fios againn uile cho math 's a tha e coimhead film a tha a' còrdadh rinn no leughadh. Na do sgrìobhadair tha sin a' dol nas fhaide, tha thu fhèin ga chruthachadh - chan eil e ann. Agus mar sin, 's e nàdar de adventure mìorbhaileach a th' ann gum faod thusa a bhith le na caractaran seo agus a' faicinn nan rudan a tha iad a' dèanamh agus mar a tha iad a' smaoineachadh agus tha thu a' dol a-staigh anns an rud tòrr nas doimhne. Bhithinn a' moladh dha duine sam bith sin fheuchainn.
Ciamar a tha loidhnichean sònraichte a' nochdadh san sgrìobhadh agaibh?
A' bruidhinn air loidhnichean a tha an sgrìobhadair a' meas cudromach, no a tha a' seasamh a-mach nuair a tha thu a' sgrìobhadh sgeulachd, tha na loidhnichean sin a' nochdadh gu nàdarrach co-dhiù mar a tha thu a' dol nas doimhne dhan a' sgeulachd mar gum biodh agus tha an caractar ann an suidheachadh nas dorra agus nas dorra agus tha e a' tighinn chun an àm far a bheil aca ri taghadh a dhèanamh neo iad fhèin fhaighinn a-mach à suidheachadh bhon an uair sin tha loidhnichean a' tighinn suas a tha a' dol gu cridhe na sgeòil.
Agus cuideachd, tha loidhnichean ann a tha dìreach a' còrdadh riut mar sgrìobhadair. Tha thu a' tighinn an àirde le rud. Agus sin an rud a tha cho beòthail agus math mu dheidhinn sgrìobhadh - tha thu a' tighinn an àirde le rud - tha thu ga chruthachadh thu fhèin agus tha thu a' faighinn beagan ceangail ri na loidhnichean sin.
Ach uaireannan feumaidh tu faighinn rids dhiubh cuideachd agus sin pàirt de bhith na do sgrìobhadair cuideachd. Ach chan eil càil coltach ri faighinn zinger beag. Tha e uabhasach spòrsail.
Feuch dè na dh'ionnsaich thu
Quiz
Ath-shùil air na dh'ionnsaich thu
Tha sgilean sgrìobhaidh caractarachd agus dòigh-aithris air an cur gu feum leis an sgrìobhadair anns an sgeulachd aig An Leòbag.
| Mìneachadh | Eisimpleir | |
|---|---|---|
| caractarachd | An dòigh san tèid caractar a chruthachadh agus a thaisbeanadh. | "Bidh iad ag ràdh, 'Siud An Leòbag, a' cur às a chorp a-rithist'". |
| dòigh-aithris | An dòigh no sealladh bhon tèid sgeulachd innse. | "'S mise a bha thall 's a chunnaic." |
More on Leughadh
Find out more by working through a topic
- count6 of 9
- count7 of 9
- count8 of 9
- count9 of 9
