Янги қонун лойиҳасини биринчи ўқишда Дума депутатларининг 388 нафари маъқуллаган

Россия парламенти аъзолари Кремлнинг президентлик муддатини тўрт йилдан олти йилга узайтириш ҳақидаги конституциявий ўзгаришни биринчи ўқишда маъқуллаганлар.

Кўпчилик назарида бу Владимир Путиннинг президентликка эртароқ қайтиш режасидан нишона.

Россия конституциясига президентлик ва Давлат Думаси депутатлари ваколатларини узайтириш борасидаги ўзгартиришларни киритиш ғоясини ўтган ҳафта Президент Дмитрий Медведев илгари сурган эди, Дума биринчи ўқишдаёқ президентлик муддатини кўпайтиришни маъқуллаган.

Жума кун Давлат Думасининг 450 депутатидан 388 нафари конституциявий ўзгаришни маъқуллаб овоз берганлар, 58 депутат қарши қарши чиққан.

Ўзгаришга асосан коммунистлар қарши чиққанлар.

Россияга ким ўрнак бўлаяпти?

Мухолифатдаги депутат Сергей Митрохин Россия бир кишига умрбод президент бўлиб қолишига ижозат берилган Туркманистонга ўхшаб қолаётганини айтган.

"Президент ва депутатларнинг ваколатларини узайтириш Россия учун шармандаликдир. Биз президентлар бир умрга тайинланадиган Марказий Осиё давлатларига ўхшаб қолаяпмиз", деб айтган жаноб Митрохин.

Янги қонун Дума депутатларининг муддатини ҳам тўрт йилдан беш йилга узайтиришни назарда тутади.

Иккинчи ва учинчи ўқишлар Россия парламенти қуйи палатасида чоршанба куни бўлиб ўтади.

Янги қонун кучга кириши учун Россия Давлат Думаси уч бора ўқишда лойиҳани маъқуллаши, Федерация Кенгашидаги сенаторларнинг камида тўртдан уч қисми ва минтақавий парламентларнинг учдан икки қисми лойиҳа учун овоз беришлари талаб этилади.

Мамлакатда Дума, жойлардаги барча минтақавий парламентларни Кремл партияси - "Ягона Россия" назорат қилаётгани сабабидан бу ўзгаришлар тезлик билан маъқулланишига шубҳа йўқ, деб ёзади Би-би-си мухбири.

Расмийлар Конституцион ўзгариш мамлакатнинг жорий президенти эмас, кейинги президентга тааллуқли бўлишини айтадилар, ҳукуматга кўра, тўрт йиллик муддат Россиядек йирик мамлакатда ислоҳотларни амалга ошириш учун етарли эмас.

	Владимир Путин бу ўзгаришлар унинг учун қилинаётганини рад этади

Жаноб Путин икки президентлик муддатини ўтаб бўлганидан кейин шу йил Россия бош вазири бўлди.

Аммо ҳозир Владимир Путин президентликка қайтмоқчи деган гап-сўзлар кучайган.

Би-би-сининг Москвадаги мухбири Ричард Галпиннинг ёзишича, Дмитрий Медведев президентликнинг бир муддатини якунлаганидан кейин жаноб Путин яна қайтади деган тахминлар билдириб келинади.

Давлат Думасининг мамлакат асосий қонунига ўзгартириш киритиш мақсадидаги қонунни бу қадар тезликда маъқуллаши Владимир Путиннинг шошилаётгани ва у анча олдинроқ Россия президентлигига қайтишидан нишона деб кўрилмоқда.

Шундан сўнг жаноб Путиннинг икки олти йиллик муддатда Россияни бошқариши мумкин бўлади.

Дмитрий Медведевнинг ўз муддати тугамасидан истеъфога чиқиши эҳтимоли ҳақида гапирилмоқда.

Ҳозир айтилишича, Владимир Путин президентликка қайтиб, Россия эса рўпара келган молиявий инқирозни ҳал этишни хоҳламоқда.

Олдинроқ жаноб Путин Россияда президентлик муддатини 6 йилга узайтириш ташаббусини қўллаб-қувватлаган, бироқ бу нарса унинг учун қилинаётганини рад этган.

Муддатидан илгари сайловлар?..

Янги конституция қабул қилингани ва мамлакат инқироз қаршисида қудратли бўлиши лозим деган важлар билан у Медведев орқали келгуси март ёки апрелда муддатидан илгари президентлик ва парламент сайловларини эълон қилиши мумкин Владимир Рижков, собиқ Дума депутати

Владимир Путин сўзларига кўра, бу "Россияда демократияни ривожлантириш" мақсадида қилинмоқда.

У президентлик муддати 6 йил бўлган Финландия, 7 йил бўлган Францияни мисол қилиб кўрсатган.

"Кейинги муддатга ким ва қачон номзодини қўйишини гапиришга ҳали эрта", деб айтган Бош вазир Путин.

Россия конституцияси бир шахснинг бирданига икки муддатдан зиёд президент бўлишини тақиқлайди, бироқ Владимир Путин Дмитрий Медведевдан кейин учинчи муддатга сайланиши мумкин.

Собиқ Давлат Думаси депутати Владимир Рижков, "Moscow Times" рўзномасидаги мақолада, Россияда бугун ҳам машҳур сиёсатчи бўлиб қолаётган Владимир Путиннинг қандай қилиб яна президентликка қайтиши фаразларини илгари сурган.

"Янги конституция қабул қилингани ва мамлакат инқироз қаршисида қудратли бўлиши лозим деган важлар билан у Медведев орқали келгуси март ёки апрелда муддатидан илгари президентлик ва парламент сайловларини эълон қилиши мумкин", деб айтган россиялик сиёсатчи.