Жаноб Путин келажакда Россия ҳукуматига бошчилик қилиши мумкинлигини айтмоқда

Россия Президенти Владимир Путин "Ягона Россия" партияси номидан бўлажак парламент сайловларида иштирок этувчи номзодлар рўйхатига бошчилик қилишга ҳозир эканини айтган.

"Ягона Россия" партиясининг съездида жаноб Путин бу каби таклифни мамнунлик билан қабул қилишини айтган.

Президент Владимир Путин расман бирор бир партияга аъзо эмас ва охиригича ҳам партиясиз мақомда қолишини урғулаган.

Путин, шу жумладан, 2008 йилги президентлик сайловлари ортидан Россия ҳукуматига бошчилик қилиши мумкинлигини ҳам билдирган.

"Ҳукуматга бошчилик қилиш бутунлай амалий таклиф. Бироқ бу борада ўйлаб кўриш керак",-деб айтган жаноб Путин.

Россия Президенти икки шарт асосида бош вазир бўлишини билдирган.

Жаноб Путинга кўра, биринчидан, "Ягона Россия" парламент сайловларида ғолиб чиқиши керак. Иккинчидан эса, Россиянинг янги президенти "ҳалол, одобли, қобилиятли ва замонавий" киши бўлиши лозим.

Съездда чиқиш қиларкан, жаноб Путин "Ягона Россия" мамлакатдаги энг йирик сиёсий куч эканини айтган.

Россия кўчаларида эса аллақачон "Ягона Россия"нинг "Путиннинг режаси-бизнинг ғалабамиз", деган шиорлари пайдо бўлган.