Ричард Галпин Би-би-си, Россия

	Медведев ва Иванов икки асосий рақиблар сифатида кўрилади

Россияда президентлик сайлови тарғиботлари расман декабр ойида бошланиши керак, аммо амалда у аллақачон бошланган.

Шу ой бошида Санкт-Петербургда тўпланган ишбилармон ва сиёсатчиларни энг кўп қизиқтирган савол-Путиннинг ўрнини ким эгаллайди, деган савол эди.

2000 йилдан буён Россияни бошқариб келаётган жаноб Путин, конституцияга мувофиқ, келаси йил бошида президентликдан кетиши керак.

Санкт-Петербургдаги Иқтисодий Форумда чиқиш қилган юқори мартабали нотиқлар орасида Россиянинг кейинги президенти бўлиш эҳтимоли юқори бўлган икки шахс-Сергей Иванов ва Дмитрий Медведевлар бор эди.

Ҳамманинг назарида

Охирги ойларда бош вазир ўринбосарлари жаноб Иванов ва Медведевнинг Россия бўйлаб қилган сафарлари кенг ёритилди.

Буларнинг ҳаммаси Кремл томонидан саҳналаштирилмоқда.

Президент Путин ўз назари тушган бу икки шахснинг нималарга қодирлиги ва одамларнинг уларга муносабатини синовдан ўтказаётган кўринади.

Шу йил охирида Путин улардан биттаси ёки унга қадар ўртага чиққан бошқа бирон номзодни ўзининг меросхўри этиб тайинлаши кутилмоқда.

Барча экспертлар битта фикрда якдил-Президент Путин кимни тавсия қилса, ўша одам ғолиб бўлади, чунки сайловчилар Путиннинг орқасидан боришади.

Феврал ойида жаноб Путин Сергей Ивановни мудофаа вазири лавозимидан бош вазир ўринбосари лавозимига ўтказган.

Бу нарса улоқни жаноб Иванов олганининг белгиси сифатида кўрилган.

Кремлнинг шахмат ўйини

"Ивановнинг имконияти яхши",-дейди Россияда чиқадиган "Ньюсвуик" журналидан Михаил Фишман.

"Элитадагилар уни ҳозирнинг ўзида ғолиб, деб билишади. Мен у жаноб Медведевдан бир-икки қадам олдинда, деб ўйлайман. Аммо ўйин ҳали охирига етгани йўқ".

Биз жаноб Ивановга унинг жанубий Сибирга "тарғибот сафарлари"дан бирида ҳамроҳлик қилдик.

У ерда нуфузли фанлар академиясининг 50 йиллик маросими нишонланди.

Академия ўта махфий илмий тадқиқотлар олиб бориладиган марказнинг бир қисми ҳисобланади.

Маросимга фахрий меҳмон сифатида ташриф буюрган жаноб Ивановни "юлдуз"ларга кўрсатиладиган эҳтиром билан кутиб олишди.

Аммо жаноб Иванов "юлдуз"ларга хос бўлмаган тарзда қаққайиб турар эди, илтифотсиз ва совуққон - Президент Путининг ўзига ўхшаб.

Махфий хизмат

Иккала шахс бир-бирига жуда ўхшайди.

Улар айни ёшда, айни шаҳар - Санкт Петербургда катта бўлишган ва сиёсатга киришдан аввал Россия махфий хизматларида ишлаганлар.

1990 йиллар охирида, жаноб Путин Россия хавфсизлик хизмати-ФСБга бошлиқ бўлган пайт жаноб Иванов унинг ўринбосари эди.

Путин ва Иванов жуда ҳам яқин эканлари айтилади.

Жаноб Ивановнинг "гердайгани"га қарамасдан, Новосибирск яқинидаги академия олимларидан баъзилари ундан таъсирланганликларини айтишди.

"У ажойиб президент бўлади", - дейди генетика профессори Игор Жимулев.

	Иванов ва Путин-ҳар иккаласи ҳам КГБдан чиқишган

Кейинроқ, матбуот анжуманида биз жаноб Ивановни президентлик масаласида сиқувга олган пайтимиз у худди ана шу, махфий хизматлардан чиққанини яна бир марта намойиш этди.

У мендан саволимни инглиз тилидан рус тилига таржима қилишимни сўради. "Кечирасиз, лекин менинг темир қоидам бор. Россияда мен фақат рус тилида гапираман", -деди у тоза инглизчада.

Шундан кейин жаноб Иванов рус тилида президентлик сайловлари ҳақида ўйлашга вақти йўқлиги, шундоқ ҳам иши бошидан ортиб ётганини айтди.

"Қирғийлар"

Ташқаридаги кузатувчилар назарида Россиянинг навбатдаги президенти ҳам махсус хизматлардан чиққан одам бўлиши истиқболи жуда ҳам ташвишлидир.

Айниқса, жаноб Ивановдан келаётган ишоралар назарда тутилса.

"У орқасида ким турганига очиқча ишора қилаяпти", -дейди Москвадаги Карнеги марказидан Роз Готемоллер.

"Булар жуда қаттиқ болалар, булар рус қирғийларидир, совет давридан шундай бўлиб келишган".

Аммо жаноб Иванов авторитар бўлиб кўринишига қарамай, баъзилар унинг хали кашф этилмаган бир шахс эканини айтишади.

Чунки у ҳозирга қадар Президент Путин чизган чизиқдан чиқмаган.

"Ҳозирда асосий савол "жаноб Иванов ким ўзи?" деган саволдир. Агар у президент этиб сайланса, бошида жаноб Путиннинг изидан боради, аммо кейин ўзгариши тайин. Ўшанда унинг қандай йўл тутишини ҳеч ким башорат қилолмайди", -дейди Михаил Фишман.