Натанздаги ядровий иншоотнинг асосий қисми ер остида жойлашган

Эрон Президенти Маҳмуд Аҳмадинежоднинг айтишича, энди мамлакати ядровий ёнилғини саноат миқёсида ишлаб чиқариш имкониятига эга бўлган.

Натанздаги уранни тўйинтириш бўйича ядровий иншоотда гапирган президент Аҳмадинежод сўзларига кўра, Эрон олдинга аҳамиятли қадам ташлаган.

"Энди биз саноат технологиясини қўлга киритдик. Мен шуни фахр билан эълон қиламанки, бугун Эрон уранни саноат мақсадларида бойитиш учун зарур центрифугаларни оммавий равишда ишлаб чиқаришни бошлади", деб айтган Президент Маҳмуд Аҳмадинежод.

Бироқ кутилганидек, Президент Аҳмадинежод нечта центрифуга ўрнатиб бўлинганини эълон қилмаган.

Теҳрон ўтган ойда уч мингта центрифугани ўрнатиш ниятида эканини эълон қилган эди.

Бирлашган Миллатлар Ташкилоти уранни бойитиш дастуридан воз кечмагани учун Эронга қарши жазо чоралари жорий этган.

Мухбирларнинг ёзишларича, Эроннинг саноат миқёсида ядровий ёнилғи ишлаб чиқаришни бошлагани ҳақидаги хабар Эроннинг шундоқ ҳам мураккаб бўлган ғарб мамлакатлари билан муносабатларини янада таранглаштириши мумкин.

Эроннинг ядровий ёнилғи имкониятлари борасидаги эълони Теҳроннинг халқаро ҳамжамиятга нисбатан намойишкорона беписандлигини кўрсатади, дея баҳолаган Америка Қўшма Штатлари.

АҚШ Давлат департаментига кўра, бу нарса БМТнинг Эронга қарши санкциялари тўғри жорий этилганидан далолатдир.

Натанздаги ядровий иншоотга журналистлар ва дипломатлар таклиф этилганлар.

Натанзда ер юзасида кўзга кўриниб турган бинолар кўп, дея хабар қилади Би-би-си мухбири Фрэнсис Харрисон. - Аммо муҳим иншоотлар чуқур ер остида жойлашган.

Ер остида катта-катта заллар бўлиб, у ерда 50 мингдан ортиқ центрифуга ўрнатилиши мумкин.

Центрифугалар эса ураннинг газини тўйинтириб, ёнилғи сифатида фойдаланса бўладиган даражагача тайёрлаб беради.

Ҳозирча Эрон ҳар бирида 164 тадан центрифугаси бўлган икки каскадга эга эканини айтмоқда.