لائیو, ایران میں امریکی اہلکار کو ریسکیو کرنے کے مقام پر حملے میں چار ہلاکتوں کی اطلاعات، تہران کا امریکی ڈرون گرانے کا دعویٰ

لائیو کوریج

1. 56 منٹ قبلامریکی تاریخ کا سب سے ’جرات مندانہ‘ مشن, لورنا گورڈن

   یہ امریکہ کے لیے بڑے بحران کا سبب بن سکتا تھا۔

   ایران نے امریکی لڑاکا طیارے کے عملے کے رُکن کو تلاش کرنے کے لیے انعام کی پیشکش کی تھی اور خدشہ تھا کہ ایران اسے اپنے فائدے کے لیے استعمال کر سکتا تھا۔

   امریکی کمانڈر ان چیف کے لیے یہ راحت کا لمحہ ہو گا کہ یہ لاپتہ کریو ممبر مل گیا ہے، انھوں نے اسے امریکی تاریخ کا سب سے ’جرات مندانہ‘ ریسکیو مشن قرار دیا ہے۔

   صدر ٹرمپ اس آپریشن کو ایک عظیم فتح قرار دے رہے ہیں جس سے ثابت ہوتا ہے کہ امریکہ نے ایرانی آسمانوں پر فضائی تسلط حاصل کر لیا ہے۔

   دوسری جانب خلیجی ممالک میں ایران کے حملے جاری ہیں۔ بحرین، متحدہ عرب امارات اور کویت میں حملوں کی اطلاعات ہیں، جہاں ایک سرکاری عمارت اور ایک آئل کمپلیکس کو نشانہ بنایا گیا۔

   کویت کے حکام کے مطابق ایرانی ڈرون حملوں سے بجلی پیدا کرنے اور پانی صاف کرنے کے دو پلانٹ بھی متاثر ہوئے ہیں۔

2. 2 گھنٹے قبلواشنگٹن اور تہران کے درمیان جاری رابطے ختم ہونے کی اطلاعات ہیں: اسرائیلی براڈکاسٹنگ اتھارٹی

   اسرائیلی براڈکاسٹنگ اتھارٹی نے ایک نامعلوم اہلکار کے حوالے سے بتایا کہ ایران کے ساتھ لڑائی کم از کم ایک اور ہفتے تک تیز رفتاری سے جاری رہنے کا امکان ہے۔

   اتھارٹی کے مطابق اسرائیل کو اطلاعات موصول ہوئی ہیں کہ جنگ بندی تک پہنچنے کے حوالے سے واشنگٹن اور تہران کے درمیان جاری رابطے ’ختم ہو چکے ہیں۔‘

   اتھارٹی کے مطابق اگر کشیدگی برقرار رہتی ہے تو امریکہ ’ایران کے اندر نیشنل انفراسٹرکچر‘ کو نشانہ سکتا ہے۔

3. 2 گھنٹے قبلایران میں تباہ ہونے والے امریکی طیارے کے لاپتا رُکن ریسکیو، اب تک ہم کیا جانتے ہیں؟

   • امریکہ کے صدر ڈونلڈ ٹرمپ نے کہا ہے کہ ایران میں تباہ ہونے والے امریکی طیارے کے لاپتا کریو ممبر کو ریسکیو کر لیا گیا ہے۔
   • سوشل میڈیا پلیٹ فارم ٹروتھ سوشل پر اپنی ایک پوسٹ میں صدر ٹرمپ نے کہا کہ ریسکیو کیے گئے 'قابلِ احترام کرنل' کو چوٹیں آئی ہیں، تاہم وہ بالکل ٹھیک ہو جائیں گے۔ اُن کا کہنا تھا کہ ریسکیو مشن کے لیے درجنوں امریکی طیارے بھیجے گئے تھے۔
   • بی بی سی کے وائٹ ہاؤس نامہ نگار برینڈ ڈیبسمین کو بتایا گیا ہے کہ ریسکیو آپریشن کے دوران امریکہ اور ایرانی فورسز کا آمنا سامنا بھی ہوا۔
   • ایرانی میڈیا کے مطابق جس جگہ سے کریو ممبر کو تلاش کیا گیا، اس مقام پر امریکی بمباری سے چار افراد ہلاک بھی ہوئے ہیں۔
   • ریسکیو کیے گئے عملے کے رُکن ہتھیاروں کے نظام کے افسر تھے اور اُس امریکی ایف-15 طیارے میں سوار تھے جسے جنوبی ایران میں مار گرایا گیا تھا۔
   • امریکہ اور ایران دونوں کے مابین اس لاپتا رُکن کی تلاش کے لیے دوڑ جاری تھی، ایرانی حکومت نے اس رُکن کی تلاش میں مدد دینے پر 66 ہزار امریکی ڈالرز انعام بھی رکھا تھا۔
   • دوسری جانب ایران کے پاسدارانِ انقلاب نے دعویٰ کیا ہے کہ امریکی کریو ممبر کو تلاش کرنے والے ایک ڈرون طیارے کو اصفہان میں مار گرایا گیا ہے۔

4. 2 گھنٹے قبلٹرمپ نے ایران میں تباہ ہونے والے طیارے میں سوار دوسرے رُکن کے ریسکیو کی تصدیق کردی

   امریکہ کے صدر ڈونلڈ ٹرمپ نے ایران میں تباہ ہونے والے طیارے کے لاپتہ رُکن کو ریسکیو کرنے کی تصدیق کردی ہے۔

   سوشل میڈیا پلیٹ فارم ٹروتھ سوشل پر اپنی ایک پوسٹ میں صدر ٹرمپ نے کہا کہ ریسکیو کیے گئے ’قابلِ احترام کرنل‘ کو چوٹیں آئی ہیں، تاہم وہ بالکل ٹھیک ہو جائیں گے۔ اُن کا کہنا تھا کہ ریسکیو مشن کے لیے درجنوں امریکی طیارے بھیجے گئے تھے۔

   صدر ٹرمپ کا مزید کہنا تھا کہ ’یہ معجزانہ مشن پائلٹ کو ریسکیو کرنے کے بعد کیا گیا ہے، ہم اس کی فوری تصدیق نہیں کرنا چاہ رہے تھے، کیونکہ ہم اپنے دوسرے ریسکیو مشن کو خطرے میں نہیں ڈالنا چاہتے تھے۔‘

   مزید تفصیلات کے لیے بی بی سی اردو کی خبر پڑھیں

5. 4 گھنٹے قبلکویت میں پاور پلانٹس، وزارت تیل کی عمارت اور پانی کے کارخانے پر حملہ

   کویت کی حکومت نے تصدیق کی ہے کہ ایران کی جانب سے کیے گئے ڈرون حملوں کی وجہ سے دو پاور پلانٹس، وزارت تیل کی عمارت اور پانی صاف کرنے والے کارخانے کو نقصان پہنچا ہے۔

   اس سے قبل ایرانی حملوں کے باعث ایک سرکاری دفتر کے کمپیکس کو نقصان پہنچا تھا جبکہ کویت کی وزارت تیل کے دفتر میں بھی آگ لگ گئی تھی۔

   اسرائیل نے بھی تصدیق کی ہے کہ ایران کی طرف سے میزائل داغے گئے تھے، لیکن فوج نے انھیں روک دیا ہے۔

6. 5 گھنٹے قبلعالمی تنازعات پر بے حسی کا مظاہرہ نہ کیا جائے: پوپ لیو کا ایسٹر کے موقع پر پیغام

   کیتھولک مسیحی افراد کے روحانی پیشوا پوپ لیو چہار دہم نے لوگوں پر زور دیا ہے کہ وہ دُنیا بھر میں پھیلے ہوئے تنازعات پر بے حسی نہ دکھائیں اور امن کے لیے کام کریں۔

   سنیچر کی شام سینٹ پیٹرز بیسیلیکا میں ایسٹر کی تقریب سے خطاب میں پوپ نے کہا کہ بداعتمادی اور خوف نے ہمارے درمیان تعلقات کو جنگ اور ناانصافی کی وجہ سے متاثر کیا ہے۔

   پوپ نے اپنے خطاب کے دوران کسی تنازعہ کا نام لے کر ذکر نہیں کیا، تاہم وہ اس سے قبل صدر ٹرمپ اور عالمی رہنماؤں پر زور دیتے رہے ہیں کہ وہ تنازعات کو پھیلنے سے روکیں۔

7. 5 گھنٹے قبلپاسدارانِ انقلاب کا اصفہان میں ڈرون طیارہ مار گرانے کا دعویٰ

   ایران کے پاسداران انقلاب نے اصفہان میں ایک ایم-کیو 9 جاسوس ڈرون طیارہ گرانے کا دعویٰ کیا ہے۔

   بیان میں کہا گیا ہے کہ ڈرون کو ’آئی آر جی سی کے جدید ایرو سپیس ڈیفنس سسٹم اور ایران کے مربوط فضائی دفاعی نیٹ ورک کے ذریعے مار گرایا گیا ہے۔

   دو روز پہلے بھی آئی جی آر سی نے اصفہان میں ہی دو MQ9 ڈرون مار گرانے کا دعویٰ کیا تھا۔

   جمعے کے روز ایرانی فوج کے محکمہ دفاع نے جنوبی ایران میں ایک ایف-15 اے طیارے اور آبنائے ہرمز پر A-10 وارتھوگ لڑاکا طیارہ گرانے کا اعلان کیا تھا۔

   ایران اور امریکہ کے درمیان ایف 15 طیارے کی تباہی کے بعد اس کے ایک کریو ممبر کی تلاش کے لیے دوڑ جاری ہے۔

8. 5 اپريل 2026ڈونلڈ ٹرمپ کا تہران پر حملے میں ’متعدد‘ ایرانی فوجی کمانڈرز کی ہلاکت کا دعویٰ

   امریکی صدر ڈونلڈ ٹرمپ نے اپنے سوشل میڈیا پلیٹ فارم ’ٹرتھ سوشل‘ پر ایک ویڈیو شیئر کی ہے جس کے بارے میں ان کا کہنا ہے کہ یہ ایران کے دارالحکومت تہران پر ہونے والے ایک ’بڑے حملے‘ کی ہے۔

   صدر ٹرمپ کا دعویٰ ہے کہ اس حملے کے نتیجے میں ’ایران کے بہت سے فوجی رہنما جنھوں نے ملک کی ناقص اور غیر دانشمندانہ قیادت کی ہلاک کر دیے گئے ہیں۔۔۔۔‘

   ٹرمپ کی جانب سے شیئر کی گئی ویڈیو میں رات کے وقت میں بڑے دھماکے ہوتے دکھائی دیتے ہیں۔ تاہم یہ واضح نہیں کہ یہ ویڈیو کہاں اور کب ریکارڈ کی گئی ہے۔

   امریکی حکام کی جانب سے اس بارے میں مزید کوئی تفصیل فراہم نہیں کی گئی ہے جبکہ تہران نے بھی تاحال ٹرمپ کے دعووں پر کوئی ردِعمل نہیں دیا ہے۔

9. 5 اپريل 2026پاکستان اور ایران کے وزرائے خارجہ کے درمیان ٹیلیفونک رابطہ، اسحاق ڈار کا مسائل کے حل کے لیے مذاکرات پر زور

   پاکستان کے نائب وزیرِ اعظم و وزیرِ خارجہ سینیٹر اسحاق ڈار اور ایران کے وزیرِ خارجہ عباس عراقچی کے درمیان ٹیلیفونک رابطہ ہوا۔

   گفتگو کے دوران دونوں رہنماؤں نے خطے کی بدلتی ہوئی صورتحال پر تبادلۂ خیال کیا۔

   وزیرِ اسحاق ڈار نے کشیدگی میں کمی سے متعلق تمام کوششوں کے لیے پاکستان کی حمایت کا اعادہ کیا اور مسائل کے حل کے لیے مذاکرات اور سفارت کاری کی اہمیت پر زور دیا۔

   گفتگو کے دوران دونوں رہنماؤں نے موجودہ حالات کے پیشِ نظر قریبی رابطہ برقرار رکھنے پر اتفاق کیا۔

10. 5 اپريل 2026اسرائیل کا ’مستقبل قریب‘ میں لبنان اور شام کے درمیان واقع مسنا سرحدی کراسنگ کو نشانہ بنانے کا اعلان

    اسرائیل نے لبنان اور شام کے درمیان مسنا سرحدی کراسنگ کے نزدیک رہنے والے شہریوں کے لیے انخلا کا حکم جاری کرتے ہوئے کہا ہے کہ وہ ’مستقبل قریب‘ میں اس سرحدی کراسنگ کے قریب حملہ کرنے کا ارادہ رکھتا ہے۔

    اسرائیلی فوج کے ایک ترجمان اویخائے ادرعی نے الزام لگایا کہ ایران کی حمایت یافتہ حزب اللہ اس کراسنگ کو ’فوجی مقاصد‘ کے لیے استعمال کر رہی ہے۔

    شام کے ساتھ لبنان کی مشرقی سرحد پر واقع کراسنگ دونوں ممالک کے درمیان سفر کرنے والوں کے لیے ایک اہم راستہ ہے۔

    رواں ہفتے کے آغاز میں، اقوام متحدہ کی پناہ گزین ایجنسی نے کہا تھا کہ جنگ کے آغاز کے بعد سے دو لاکھ سے زیادہ افراد لبنان سے شام میں داخل ہو چکے ہیں۔

    مسنا دونوں ملکوں کے درمین ایک مصروف ترین سرکاری کراسنگ ہے جو ’24 گھنٹے‘ کھلی رہتی ہے۔

11. 5 اپريل 2026کشیدگی میں اضافہ جاری رہا تو پورے خطے کو امریکہ اور اسرائیل کے لیے ’جہنم‘ بنا دیں گے: ایران کی دھمکی

    ایران کے خاتم الانبیا مرکزی ہیڈکوارٹر کے ترجمان کرنل ابراہیم ذوالفقاری نے امریکہ اور اسرائیل کو خبردار کیا ہے کہ اگر کشیدگی میں اضافہ جاری رہا تو پورا خطہ ان کے لیے ’جہنم‘ بن جائے گا۔

    ابراہیم ذوالفقاری کا کہنا ہے کہ ’اگر دشمنی میں اضافہ ہوا تو پورا خطہ آپ کے لیے جہنم بن جائے گا؛ ایران کو شکست دینے کا وہم ایک دلدل میں تبدیل ہو جائے گا جس میں آپ دھنس جائیں گے۔‘

    دوسری جانب خاتم الانبیا کے کمانڈر علی عبداللهی نے بھی دھمکی دی کہ امریکہ اور اسرائیل کے لیے ’جہنم کے دروازے کھول دیے جائیں گے‘۔

    یہ بیانات امریکی صدر ڈونلڈ ٹرمپ کے اس بیان کے بعد سامنے آئے ہیں جس میں انھوں نے کہا تھا کہ ایران کے پاس اب 48 گھنٹے ہیں کسی معاہدے پر پہنچنے یا آبنائے ہرمز کھولنے کے لیے ورنہ ان پر ’قیامت ٹوٹ پڑے‘ گی۔

12. 5 اپريل 2026ایران میں پیٹروکیمیکل کمپلیکس پر حملہ، پانچ افراد ہلاک آور 170 زخمی: ایرانی سرکاری میڈیا

    ایرانی سرکاری میڈیا کا دعویٰ ہے کہ ایک ایرانی پیٹروکیمیکل کمپلیکس پر حملے کے نتیجے میں پانچ افراد ہلاک ہو گئے ہیں۔ دوسری جانب اسرائیل نے دعویٰ کیا ہے کہ اس کمپلیکس میں ایران کے بیلسٹک میزائلوں کے لیے ’اہم جز‘ تیار کیے جاتے تھے۔

    اسرائیلی فوج کا کہنا ہے کہ یہ حملہ جنوب مغربی ایران کے شہر مشہر میں سنیچر کے روز کیا گیا تھا۔

    ان کا دعویٰ ہے کہ یہ ان دو مرکزی تنصیبات میں سے ایک ہے جو ایران میں دھماکا خیز مواد اور دیگر اسلحے کی تیاری کے لیے خام مال پیدا کرتی ہیں۔

    پاسدارانِ انقلاب سے منسلک خبر رساں ایجنسی فارس نے ایک ایرانی عہدیدار کا حوالہ دیتے ہوئے بتایا ہے کہ حملے میں پانچ افراد مارے گئے ہیں جبکہ مزید 170 افراد زخمی ہوئے ہیں جنھیں طبی امداد فراہم کی جا رہی ہے۔

13. 4 اپريل 2026جنوبی لبنان میں جھڑپ کے دوران ایک اسرائیلی فوجی ہلاک

    اسرائیلی فوج کا کہنا ہے کہ جنوبی لبنان میں جھڑپ کے دوران اس کا ایک فوجی مارا گیا ہے۔

    اسرائیلی فوج نے ایک بیان میں کہا ہے کہ ’یووالیم کے رہائشی 21 سالہ سارجنٹ فرسٹ کلاس گائے لودر میگلان یونٹ، کمانڈو بریگیڈ میں شامل تھے۔ وہ جنوبی لبنان میں لڑائی کے دوران ہلاک ہوگئے ہیں۔‘

    یاد رہے کہ دو مارچ کو اسرائیل نے جنوبی لبنان میں زمینی فوج اتاری تھی اور تب سے پورے ملک میں وسیع فضائی حملے جاری رکھے ہوئے ہیں۔

14. 4 اپريل 2026پاسدارانِ انقلاب کے مقتول کمانڈر قاسم سلیمانی کی بھتیجی اور نواسی امریکہ میں گرفتار

    امریکی وزارتِ خارجہ کا کہنا ہے کہ پاسدارانِ انقلاب کے مقتول کمانڈر جنرل قاسم سلیمانی کی بھتیجی اور نواسی کو گرفتار کر لیا گیا ہے۔

    سنیچر کو جاری کیے گئے ایک بیان میں بتایا گیا کہ وزیرِ خارجہ مارکو روبیو نے حمیدہ سلیمانی افشار اور ان کی بیٹی کا گرین کارڈ منسوخ کر دیا ہے۔

    مارکو روبیو نے سوشل میڈیا پر جاری ایک بیان میں کہا ہے کہ دونوں خواتین اس وقت امریکی امیگریشن اینڈ کسٹمز انفورسمنٹ (آئس) کی تحویل میں ہیں اور ملک سے بے دخلی کے عمل کا انتظار کر رہی ہیں۔

    ایران کے سب سے طاقتور فوجی کمانڈروں میں سے ایک جنرل قاسم سلیمانی 2020 میں عراق میں ایک امریکی فضائی حملے میں مارے گئے تھے۔ یہ حملہ اُس وقت کے امریکی صدر ڈونلڈ ٹرمپ کے حکم پر کیا گیا تھا۔

    امریکی وزارتِ خارجہ نے اپنے بیان میں کہا کہ حمیدہ سلیمانی افشار ’ایران کی آمرانہ اور دہشت گرد حکومت کی کھل کر حمایت کرتی ہیں۔‘

    بیان میں یہ بھی کہا گیا کہ سلیمانی افشار نے اپنے سوشل میڈیا اکاؤنٹس کے ذریعے ’ایرانی حکومت کا پروپیگنڈا پھیلایا۔‘

    وزارتِ خارجہ کے مطابق سلیمانی افشار کے شوہر پر بھی امریکہ میں داخلے پر پابندی عائد کر دی گئی ہے، تاہم بیان میں نہ ان کی بیٹی اور نہ ہی شوہر کا نام ظاہر کیا گیا ہے۔

    مارکو روبیو نے ایکس پر جاری بیان میں یہ بھی کہا کہ سلیمانی افشار اور ان کی بیٹی ’گرین کارڈ ہولڈرز تھیں جو امریکہ میں عیش و آرام کی زندگی گزار رہی تھیں۔‘

15. 4 اپريل 2026خانہ بدوش قبائل نے دو امریکی بلیک ہاک ہیلی کاپٹرز کو نشانہ بنایا، ایران کا دعویٰ, غنچے حبیبی آزاد، بی بی سی فارسی

    ایران نے دعویٰ کیا ہے کہ پہاڑی علاقوں کے دو خانہ بدوش قبائل نے امریکی افواج کے دو بلیک ہاک ہیلی کاپٹرز کو نشانہ بنایا ہے۔

    پاسدارانِ انقلاب کی جانب سے جاری ایک بیان میں کہا گیا ہے کہ ’صوبہ کہگیلویہ و بویراحمد کے خانہ بدوش اور ’بختیاری‘ قبائل نے مشکل رسائی والے پہاڑی علاقوں میں دو بلیک ہاک ہیلی کاپٹرز کو کامیابی سے نشانہ بنایا ہے۔‘ بیان کے مطابق اس علاقے میں ایرانی مسلح افواج موجود نہیں تھیں۔

    بی بی سی نے اس معاملے پر تبصرے کے لیے امریکی سینٹ کام سے رابطہ کیا ہے۔

    خانہ بدوش اور بختیاری ایران کے قبائلی افراد کے طور پر جانے جاتے ہیں۔ یہ قبائل عام طور پر دور دراز پہاڑی علاقوں میں اپنی بھیڑ بکریوں اور کیمپوں کو جنگلی جانوروں اور چوری سے بچانے کے لیے بندوقیں ساتھ رکھتے ہیں۔

    بی بی سی ویریفائی نے جمعے کو ایک ویڈیو کی تصدیق کی تھی جس میں بظاہر تین مسلح افراد کو کم از کم دو بلیک ہاک ہیلی کاپٹرز کی سمت فائرنگ کرتے دیکھا جا سکتا ہے۔

    امریکہ میں بی بی سی کے پارٹنر سی بی ایس نے رپورٹ کیا ہے کہ ایک ہیلی کاپٹر کو چھوٹے ہتھیاروں کی فائرنگ سے نشانہ بنا گیا جس کے نتیجے میں عملے کے ارکان زخمی ہو گئے تاہم ہیلی کاپٹر بحفاظت لینڈ کرنے میں کامیاب رہا۔ اس ہیلی کاپٹر میں ایف۔15 ای طیارے کے ریسکیو کیے گئے پائلٹ کو منتقل کیا جا رہا تھا۔

16. 4 اپريل 2026تہران یونیورسٹی پر حملے کے بعد تباہی کے مناظر

    ایران سے موصول ہونے والی تصاویر میں جمعہ کے روز ہونے والے فضائی حملوں کے نتیجے میں تہران کی شہید بہشتی یونیورسٹی میں ہونے والے نقصان کی شدت دیکھی جا سکتی ہے۔

    ایران کے وزیرِ سائنس حسین سیمعی سراف نے آج اس مقام کا دورہ کیا۔

17. 4 اپريل 2026ایران کے بوشہر جوہری پلانٹ کے نزدیک حملہ: اب تک ہم کیا جانتے ہیں؟

    ایران کا کہنا ہے کہ اس کے بوشہر جوہری پلانٹ کے نزدیک حملہ کیا گیا ہے۔

    اس واقعے کے متعلق اب تک ہم کیا جانتے ہیں:

    • سنیچر کی صبح ایرانی سرکاری میڈیا نے خبر دی تھی کہ بوشہر جوہری پلانٹ کے نردیک حملہ ہوا ہے جس میں پلانٹ پر کام کرنے والا ایک ملازم ہلاک ہوگیا۔
    • ایران کی ایٹمی توانائی تنظیم کے مطابق ابتدائی تحقیقات سے پتا چلتا ہے کہ واقعے سے پلانٹ کے اہم حصوں کو کوئی نقصان نہیں پہنچا۔
    • بین الاقوامی ایٹمی توانائی ایجنسی (آئی اے ای اے) کا کہنا ہے کہ علاقے میں تابکاری کی سطح میں کسی اضافے کی اطلاع موصول نہیں ہوئی۔
    • روسی خبر رساں ایجنسی ’تاس‘ کے مطابق اس پلانٹ پر کام کرنے والی روسی جوہری کمپنی روس آٹوم نے اپنے 198 ملازمین کو وہاں سے نکالنے کا فیصلہ کیا ہے۔
    • ایران کے وزیرِ خارجہ عباس عراقچی نے جوہری تنصیب پر حملے کی مذمت کرتے ہوئے کہا کہ اگر تابکاری پھیلتی ہے تو اس کے اثرات صرف تہران نہیں خلیجی ممالک کے دارالحکومتوں تک بھی پہنچیں گے۔
    • اب سے کچھ دیر قبل امریکی صدر ڈونلڈ ٹرمپ نے سوشل میڈیا پلیٹ فارم ’ٹرتھ سوشل‘ پر جاری ایک پوسٹ میں کہا ہے کہ امریکہ ’جوہری ایران سے چھٹکارا پا رہا ہے۔‘

18. 4 اپريل 2026ایران کے پاس اب 48 گھنٹے ہیں کسی معاہدے پر پہنچنے یا آبنائے ہرمز کھولنے کے لیے ورنہ ان پر قیامت ٹوٹ پڑے گی: ٹرمپ

    امریکی صدر ڈونلڈ ٹرمپ نے کہا ہے کہ ایران کے پاس ’48 گھنٹے‘ ہیں کسی معاہدے پر پہنچنے یا آبنائے ہرمز کھولنے کے لیے ورنہ ’ان پر قیامت ٹوٹ پڑے گی۔‘

    ٹرمپ نے اپنے سوشل میڈیا پلیٹ فارم ٹروتھ سوشل پر لکھا کہ ’یاد رکھیں وہ وقت کہ جب میں نے ایران کو دس دن دیے تھے کہ یا تو معاہدہ کریں یا آبنائے ہرمز کھول دیں۔ اب وقت ختم ہو رہا ہے۔‘

    ’48 گھنٹے باقی ہیں، اس کے بعد ان پر قیامت ٹوٹ پڑے گی۔‘

    27 مارچ کو ٹرمپ نے اعلان کیا تھا کہ وہ ایرانی توانائی تنصیبات پر کسی بھی ممکنہ حملے کو دس دن کے لیے روک رہے ہیں۔

    اس سے چند لمحے قبل ایک اور سوشل میڈیا پوسٹ میں جس میں وہ امریکی معیشت پر محصولات کے اثرات کا ذکر کر رہے تھے، انھوں نے اختتام پر لکھا کہ ’اس سب کے ساتھ ساتھ، ایک ایٹمی ایران سے نجات۔‘

19. 4 اپريل 2026جنگ کے آغاز سے اب تک 450 سے زائد ڈرونز کو مار گرایا گیا ہے: بحرین کا دعویٰ

    بحرین نے بھی جنگ کے آغاز سے اب تک ہونے والے فضائی حملوں کی تعداد کے بارے میں اپ ڈیٹ جاری کی ہے۔

    سوشل میڈیا پر جاری ایک بیان میں بحرین کی انتظامیہ کی جانب سے جاری بیان میں کہا گیا ہے کہ ’ایران کی جانب سے داغے گئے 453 حملہ آور ڈرونز اور 188 میزائل کو ’ناکارہ بنایا اور تباہ‘ کیا گیا ہے۔

20. 4 اپريل 2026متحدہ عرب امارات کا 23 میزائل اور 56 ڈرونز کے حملے ناکام بنانے کا دعویٰ

    متحدہ عرب امارات کی وزارتِ دفاع کی جانب سے جاری بیان میں کہا گیا ہے کہ چار اپریل کو ایران سے آنے والے 23 بیلسٹک میزائل اور 56 ڈرون کو ناکارہ بنایا گیا۔

    سوشل میڈیا پر پوسٹ کے مطابق تنازعے کے آغاز سے اب تک کل 498 بیلسٹک میزائل، 23 کروز میزائل اور 2141 ڈرونز کو ناکارہ بنایا جا چکا ہے۔

    حکام کے مطابق جنگ کے آغاز سے متحدہ عرب امارات میں مسلح افواج کے دو اہلکار، ایک کنٹریکٹر اور 10 دیگر افراد ہلاک ہو چکے ہیں جبکہ 217 افراد زخمی ہوئے ہیں۔