Golaha Khubarada Iran oo ku baaqay inay ka baxaan heshiiska caalamiga ah ee ka hortagga faafitaanka hubka Nukliyeerka

Golaha Khubarada Iran, oo ah hay’adda kormeerta doorashada Hoggaamiyaha Sare ee dalka iyo hawlihiisa, ayaa bayaan ay soo saareen ku baaqday in Iran ay ka baxdo Heshiiska Caalamiga ah ee Ka Hortagga Faafitaanka Hubka Nukliyeerka (NPT), isla markaana dib-u-eegis lagu sameeyo istaraatiijiyadda difaaca dalka.

Kooban

Tebin toos ah

  1. 14 qof oo ku dhintay, 30 kalena ku dhaawacmay shil gaari oo ka dhacay Imaaraadka Carabta

    Imaraadka
    Qoraalka sawirka, Imaaraadka

    Wasaaradda Arrimaha Gudaha ee Imaaraadka Carabta ayaa Khamiistii sheegtay in 14 qof ay ku dhinteen, halka 30 kalena ay ku dhaawacmeen shil gaari oo ay ku lug lahaayeen gaari xamuul ah iyo dhowr gaari oo kale, kaas oo ka dhacay afaafka laga galo imaaradda Fujairah saqdii dhexe ee habeenkii Arbacada.

    Booliska Fujairah ayaa bayaan ay soo saareen ku sheegay in darawalka gaariga xamuulka ah uu lumiyay xakamaynta gaariga, kadibna uu ku dhacay gaari kale, ka hor inta uusan rogman oo uu ku dhicin gawaari kale oo goobta taagnaa.

    Shilka ayaa sababay in gaariga xamuulka ahi dab qabsado, kaas oo ku fiday dhowr gaari oo kale.

    Bayaanka ayaa lagu sheegay in 14 qof ay dhinteen, halka 30 kalena ay ku dhaawacmeen heerar kala duwan.

    Waxaa intaas lagu daray in 15 ka mid ah dadka dhaawacmay ay weli ku jiraan isbitaallada, halkaas oo ay ku helayaan daryeel caafimaad.

    Booliska ayaa sheegay in goobta ay gaareen kooxaha gurmadka degdegga ah, ambalaasyada, dab-damiska iyo difaaca madaniga ah, kuwaas oo damiyay dabka, dhaawacyadana siiyay gargaarka degdegga ah, kadibna geeyay isbitaallada.

    Waxa kale oo ay sheegeen in la sugay goobta shilka, lana maareeyay isu-socodka gaadiidka, si loo xaqiijiyo badqabka dadka waddada isticmaalaya.

    Bayaanka ayaa sidoo kale caddeeyay in dadka shilka ku dhintay ay ku jiraan muwaadiniin u dhashay Imaaraadka Carabta, halka aqoonsiga qaar kalena weli lagu xaqiijinayo baaritaanno DNA ah.

    Sheekoyinka kale ee aad sii akhrisan karto:

  2. Iran oo ka digtay in dalalka taageera hawlgallada Maraykanka ay qayb ka noqon doonaan dagaalka

    Afhayeenka Wasaaradda Arrimaha Dibadda Iran, Esmail Baghaei, ayaa ka digay in dal kasta oo taageero dhinaca badda, milatariga ama saadka ah siiya hawlgallada Maraykanka ee ka dhanka ah Iran, loo aqoonsan doono inuu qayb ka yahay waxa uu ku tilmaamay “gardarrada Washington”.

    Qoraal uu maanta ku daabacay barta bulshada ee X, kuna qoray luuqadda Ingiriisiga, ayuu Mr Baghaei ku sheegay in ka qaybgal kasta oo toos ah ama dadban, oo ay ku jirto waxa uu ugu yeeray “argagixiso dhaqaale oo bani’aadannimada ka baxsan”, loo arki doono fal cadowtinimo ah oo sharci-darro ah.

    Isaga oo aan si toos ah u magacaabin Kuuriyada Koonfureed, ayuu sheegay in ficilladaas aanay sharciyad ku helayn in lagu sababeeyo ilaalinta xorriyadda isu-socodka maraakiibta ama la dagaallanka burcad-badeedda.

    Waxa uu sidoo kale ka digay in dalalka ka qaybqaata ay mas’uul ka noqon doonaan cawaaqibka ka dhalan kara.

    Laba maalmood ka hor, golaha wasiirrada Kuuriyada Koonfureed ayaa ansixiyay qorshe lagu ballaarinayo hawlgallada cutubka la dagaallanka burcad-badeedda ee Cheonghae, si uu uga hawlgalo biyaha Cumaan.

    Hase yeeshee, qorshahan wuxuu u baahan yahay ansixinta baarlamaanka dalkaas si loo dhaqan geliyo.

    Seoul ayaa ku adkaysanaysa in hawlgalku aanu noqon doonin mid dagaal, isla markaana aanu dalka ku lug yeelan doonin dagaalka u dhexeeya Maraykanka iyo Iran.

    Sheekoyinka kale ee aad sii akhrisan karto:

  3. War deg deg ah, Booliska Washington oo hadda war soo saaray ka dib toogashii dhacday

    Afhayeen u hadlay booliska Washington DC ayaa BBC-da u sheegay in ninkii looga shakiyay inuu toogashada geystay uu dhintay.

    Boolisku ma aysan xaqiijin sababta dhimashadiisa.

    Shir jaraa’id oo ay mas’uuliyiintu qabteen dhowr daqiiqo ka hor ayay ku sheegeen in tuhmanuhu u muuqdo inuu qabo dhaawac rasaaseed oo uu isagu isu geystay.

    Sheekoyinka kale ee aad sii akhrisan karto:

  4. Toogasho ka dhacday Washington iyo khasaare dhimasho iyo dhaawaca oo ka dashay

    Toogasho

    Booliska Mareykanka ayaa sheegay in hal qof lagu dilay, afar kalena lagu dhaawacay weerar toogasho ah oo ka dhacay magaalada Washington, halka ninkii weerarka geystay la qabtay.

    Ku-simaha taliyaha booliska Washington DC, Jeffrey W. Carroll, oo shir jaraa’id ku bixiyay xog hordhac ah, ayaa sheegay in boolisku heleen warbixin ku saabsan toogasho dhacday wax yar ka hor 8:00 subaxnimo ee saacadda maxalliga ah.

    Waxa uu sheegay in saraakiisha booliska isla markiiba loo diray goobta, ayna ku gaareen muddo yar gudahood.

    Carroll, ayaa sheegay in hal qof uu ku dhintay toogashada, halka afar kalena isbitaalka la dhigay iyagoo qaba dhaawacyo rasaaseed. Waxa uu intaa ku daray in mid ka mid ah dadka dhaawacmay ay xaaladdiisu halis tahay, halka dhaawacyada saddexda kale aysan u muuqan kuwo halis ah.

    Ku-simaha taliyaha booliska ayaa sheegay in rasaas laga maqlay dabaqa toddobaad ee dhismaha, halkaas oo tuhmanuhu isku go'doomiyay.

    Waxa uu sheegay in markii ay maqleen rasaas kale, saraakiisha boolisku xoog ku galeen guriga, halkaas oo ay ka heleen tuhmanaha oo qaba dhaawac rasaaseed.

    Sida uu sheegay taliyaha boolisku, tuhmanuhu waa nin caddaan ah, booliskuna waxay hayaan xog ku saabsan qofka uu yahay.

    Carroll ayaa sheegay in tuhmanaha la tuhunsan yahay inuu isagu is toogtay.

    Waxa uu intaa ku daray in boolisku rumeysan yihiin in tuhmanuhu uu nooc uun khilaaf nooc kala dhexeeyay maamulka dhismaha, balse baaritaanku weli socdo.

  5. Trump oo sheegay inuu amray ku xigeenkiisa in uu diiradda saaro "musuqmaasuqa baahsan" ee ka jira gobollada ay Dimuqraadigu maamulaan

    Maraykanka

    Madaxweynaha Mareykanka Donald Trump ayaa sheegay inuusan Mareykanku u baahnayn heshiis lala galo Iran. Waxa uu intaas ku daray in uu faray Madaxweyne Ku-xigeenka JD Vance in uu diiradda saaro "musuqmaasuqa baahsan" ee ka jira gobollada ay Dimuqraadigu maamulaan.

    Farriin uu khamiistii ku baahiyay shabakaddiisa bulshada ee 'Truth Social', Madaxweyne Trump wuxuu sheegay inuu faray JD Vance inuu si buuxda u jeediyo dareenkiisa 'musuqmaasuqa iyo dembiyada baahsan' ee ka dhacaya magaalooyinka iyo gobollada ay gacanta ku hayaan Dimuqraadiga ee ku yaalla guud ahaan Mareykanka.

    Trump wuxuu ku dooday in gobollada sida Minnesota, California, iyo Illinois si xun loo maamulo oo ay musuqmaasuq ka jiro, isagoo sheegay in bilyannaan dollar la xado bishii kasta.

    Wuxuu sheegay in haddii hawlahaas dembiyada ah ee baaxadda leh la baabi'iyo, miisaaniyadda Mareykanka si degdeg ah loo isu dheellitiri karo.

    Wuxuu ku eedeeyay in 'musuqmaasuqu uu dhiigga kaga jiro hoggaanka Dimuqraadiga.'

    Isagoo ka hadlaya Iran, wuxuu yiri, "Uma baahnayn heshiis aan la galno Iran. Maalmahaas way dheeraadeen oo way tageen. Waan haynaa lacagtooda, boqolaal bilyan oo dollar, waxaana gacanta ku haynaa marin-biyoodkooda [Hormuz]."

    Sheekoyinka kale ee aad sii akhrisan karto:

  6. Golaha khubarada Iiraan oo war soo saaray

    golaha sare ee Iiraan

    Golaha Khubarada Iran, oo ah hay’adda kormeerta doorashada Hoggaamiyaha Sare ee dalka iyo hawlihiisa, ayaa bayaan ay soo saartay ku baaqday in Iran ay ka baxdo Heshiiska Caalamiga ah ee Ka Hortagga Faafitaanka Hubka Nukliyeerka (NPT), isla markaana dib-u-eegis lagu sameeyo siyaasadda difaaca dalka.

    Bayaanka golaha ayaa lagu sheegay in dib-u-eegista siyaasadda difaaca, si loo abuuro awood difaac oo ku filan inay cadowga ka hortagto, iyo ka bixitaanka heshiiska NPT ay hadda noqdeen “baahi aan laga maarmi karin” iyo “dalab shacab iyo mid qaran”.

    Golaha Khubarada ayaa ka digay in haddii mar kale la weeraro Iran, ciidamada qalabka sida ee dalkaasi ay “si degdeg ah oo wax ku ool ah uga jawaabi doonaan, iyaga oo aan wax xaddidaad juqraafi ah lahayn”.

    Hay’addu waxay sidoo kale ku baaqday in la dhiso “Xarunta Dhaqaalaha Dagaalka”, oo ay ka qayb qaataan hay’ado iyo ciidamada kala duwan, isla markaana uu kormeero xafiiska Hoggaamiyaha Sare.

    Toddobaadyadii u dambeeyay, saraakiil dhowr ah oo Iran ah iyo xildhibaanno ayaa ku baaqay in dib-u-eegis lagu sameeyo siyaasadda nukliyeerka ee dalka, halka qaar ay si cad u muujiyeen in Iran ay u baahan tahay inay hesho hubka nukliyeerka.

    Kuwaas waxaa ka mid ah ku-simaha imaamka salaadda Jimcaha ee Tehran, Mohammad Javad Haj Ali Akbari, kaas oo 28-kii Nofeembar ku dhawaaqay in wax ka beddelka siyaasadda nukliyeerka uu yahay “dalab qaran”.

    Sidoo kale, Ahmad Naderi oo ka tirsan guddiga hoggaanka baarlamaanka Iran ayaa ku baaqay in la sameeyo bamka atomikada.

    Hase yeeshee, Mohsen Rezaei, xoghayaha Golaha Sare ee Amniga Qaranka Iran, ayaa 29-kii Nofeembar sheegay in dowladda ay ka fiirsanayso wax ka beddelka siyaasadda nukliyeerka, balse aan weli go’aan rasmi ah laga gaarin arrintaas.

    Dhanka kale, afhayeenka wasaaradda arrimaha dibadda Iran, Esmail Baqai, ayaa 9-kii Nofeembar carrabka ku adkeeyay in Tehran ay weli ku xiran tahay waajibaadka iyo xannibaadaha la xiriira heshiiska NPT.

  7. Muxuu yahay baasaboorka cusub ee Soomaaliya yeelanayso, muxuuse uga duwan yahay kuwii hore?

    Baasaboorka cusub ee Soomaaliya yeelanayso

    Dawladda Federaalka ayaa ku dhawaaqday in bisha Diiseembar ee sannad kan 2026 la daabici doono Baasaboor nooc cusub ah oo ay yeelanayso Soomaaliya.

    Boosaboorka cusub ayaa ka kooban sida kuwii horeba seddexda heer ee kala ah kan shaqaalaha, kan diblomaasiyiinta iyo kan caadiga ah.

    Baasaboorka waxaa jaldigiisa iyo gudihiisaba ka muuqda qoraal iyo astaamo muujinaya in Soomaaliya ay kamid tahay wadamada ku mideysan Ururka Bulshada Bariga Afrika, waxaana loogu safri doonaa sida dallalka kale ee ku jira ururka.

    Agaasimaha Hay'adda Socdaalka iyo Jinsiyadda ee Soomaaliya Xuseen Qaasim Yuusuf (Iidow) oo waraysi gaar ah siiyay BBC-da ayaa sheegay in horraanta bisha Diiseembar ee sannad kan la bixin doono noocyadii ugu horeeyay ee Baasaboorka cusub.

    "Soomaaliya waxay yeelanaysaa Baasaboor cusub oo casriya, Baasaboorkaas oo waafaqsan nidaamka caalamiga ah ee lagu qiimeeyo, Baasaboorada casriga ah" ayuu yiri Agaasime Xuseen Iidow.

  8. Agaasimihii guud ee fulinta, shirkad caan ku ah tiknoolajiyadda oo is casiley ka dib fadeexad

    Fadeexad Jenson

    Agaasimihii guud, isla markaana ka mid ahaa aasaasayaashii shirkadda weyn ee soo saarta qalabka Chip ka ee loo adeegsado Garaadka macmalka ah (AI), Nvidia, ayaa xilka iska casiley, kaddib fadeexad basaasnimo oo la sheegay inay gilgishay shirkadda.

    Jensen Huang ayaa la sheegay inuu xiriir qarsoodi ah la lahaa haweeney lagu tuhunsan yahay inay ahayd basaas u shaqeysa Shiinaha, inkasta oo Beijing ay beenisay eedeymahaasi.

    Agaasimaha maaliyadda ee shirkadda, Colette Kress, ayaa si ku-meel-gaar ah ula wareegi doonta xilka agaasimaha guud, inta laga helayo qof si rasmi ah loogu magacaabo jagadaas.

    Saamiyada Nvidia ayaa hoos u dhacay in ka badan 10% ganacsigii ka hor furitaanka suuqa, kaddib markii la shaaciyay is-casilaadda Huang.

    Dhanka kale, mas'uuliyiinta Singapore ayaa sheegay in Alice Huang, oo ah haweeneyda lagu tuhunsan yahay basaasnimada Shiinaha, laga mamnuucay inay dalka dib ugu soo laabato bishii Febraayo.

    Waxaa la sheegay inay bixisay xog aan sax ahayn intii lagu guda jiray baaritaan lagu sameeyay shirkaddeeda fadhigeedu yahay Singapore ee Megaspeed.

  9. Madaxweynayaasha Turkiga iyo Iiraan oo kulan yeeshay, maxayse ka wada hadleen

    Kulanka

    Madaxweynaha Turkiga, Recep Tayyip Erdogan, ayaa Khamiistii sheegay in wadahadallada diblomaasiyadeed ee lagu soo afjarayo dagaalka Mareykanka iyo Iran dib loo bilaabo “iyadoo aan dib loo sii dhigin”, kadib kulan uu la yeeshay dhiggiisa Iran, Masoud Pezeshkian.

    Madaxtooyada Turkiga ayaa sheegtay in Erdogan iyo Madaxweynaha Iran ay kulmeen xilli ay ka qaybgalayeen shirka Qaramada Midoobay ee Isbeddelka Cimilada, kaas oo ka dhacaya gobolka Antalya ee Turkiga.

    Intii uu kulanku socday, Erdogan ayaa carrabka ku adkeeyay “muhiimadda ay leedahay in aan dib loo sii dhigin ku laabashada miiska wadahadallada”, wuxuuna sheegay in “Turkigu uu sii wadi doono taageerada dadaallada lagu doonayo in nabad lagu xaqiijiyo”.

    “Waa in la xoojiyaa meelaha la isku waafaqsan yahay si heshiis loo gaaro, diblomaasiyaddana waa in fursad la siiyaa,” ayuu yiri.

    Madaxweynaha Turkiga ayaa sidoo kale muujiyay rajada ah in dagaalka Mareykanka iyo Iran uu “sida ugu dhaqsaha badan ku dhammaado”.

    Dadaallada diblomaasiyadeed ee ay dhexdhexaadinayaan Qatar iyo Pakistan ayaa iyaguna weli socda, kuwaas oo ujeeddadoodu tahay in la gaaro heshiis lagu soo afjarayo dagaalka.

    Tehran ayaa dooneysa in Washington ay aqbasho dalabaad dhowr ah, oo ay ka mid yihiin in la sii daayo hantida Iran ee la xannibay iyo in cunaqabateynta laga qaado, taas beddelkeedana Iran ay dib u furto marin-biyoodka Hormuz.

    Sheekoyinka kale ee aad sii akhrisan karto:

  10. Rio Ferdinand oo si dareen leh ugu hadlay cayrinta Carrick ee Manchester United

    Carick

    Maadaamada tababare Carrick, shaqada la cayriyey, waxaa la filayaa in maalinta oo dhan ay falcelinno badan ka yimaadaan ciyaartoyda hadda u ciyaara Manchester United iyo kuwii hore uga tirsanaan jiray kooxda.

    Rio Ferdinand, oo ah saaxiib ay u soo wada ciyaareen Michael Carrick kooxda Manchester United, ayaa ka mid noqday dadkii ugu horreeyay ee ka hadlay arrintan.

    Fariin uu ku qoray barta X ayuu ku yiri:

    “Halyeey weligiis ah! Sida caadiga ahayd, wuxuu muujiyay sharaf, karaamo iyo akhlaaq wanaagsan. ❤️”

  11. Waxa aan ka ognahay shaqo ka ceyrinta Carrick ee Manchester United

    Carrick

    Manchester United ayaa shaqada ka cayrisay Michael Carrick oo ahaa tababaraha kooxda, iyadoo sheegtay inay gaartay go'aan ay ku tilmaantay mid aad u adag, balse isbeddelka tababarenimo uu yahay mid lama huraan ah.

    Ururka taageerayaasha Manchester United (Manchester United Supporters' Trust) ayaa bayaan uu soo saaray ku sheegay: “Waa waqtigii milkiilayaasha kooxda ay sharaxaad ka bixin lahaayeen go'aannadooda.”

    Wariyaha BBC ee Manchester United, Simon Stone, ayaa sheegay in guddiga maamulka kooxda uu natiijooyinkii xilli ciyaareedkan ku tilmaamay kuwo aan la aqbali karin.

    -Dhanka kale, taageerayaasha kooxda ayaa iyaguna aragtidooda ka dhiibtay shaqo ka ceyrinta Carrick, iyadoo qaar ay sheegeen in “aan markii horeba loo magacaabi lahayn tababaraha kooxda.”

    Nagala soco wararkaas oo dhan, maadaama aan idiin soo gudbin doonno falcelinno dheeraad ah oo ka imaanaya garoonka Old Trafford.

    Sheekoyinka kale ee aad sii akhrisan karto:

  12. Kulan muhim ah oo la filayo inuu ka dhaco Ruushka

    Moscow

    Wakiillada gaarka ah ee Madaxweyne Donald Trump, Jared Kushner iyo Steve Witkoff, ayaa magaalada Moscow kula kulmi doona Madaxweynaha Ruushka Vladimir Putin.

    Kulankan ayaa imaanaya kadib markii ay labadaasi ergay ay wadahadallo socday muddo laba maalmood ah oo dhexmaray wakiillo ka kala socday Ruushka iyo Ukraine, kuwaas oo ka dhacay magaalada Abu Dhabi.

    Wafdiga Mareykanka ayaa la filayaa inuu soo jeediyo in wadahadallada ku saabsan dagaalka Ukraine la ballaariyo, si ay uga qaybqaataan wakiillo ka socda dalalka Yurub.

    Ilaa hadda, Ruushka ma muujin wax dan ah oo uu ku aqbalayo soo jeedintan.

    Labada wakiil ayaa intaas kadib u safri doona Ireland, halkaas oo ay kula kulmi doonaan Madaxweynaha Ukraine Volodymyr Zelensky. Madaxweynaha Ukraine ayaa horay wariyeyaasha ugu sheegay in dowladdiisu ay diiradda saarayso sidii horumar looga sameyn lahaa gaarista heshiis ka hor dhammaadka sanadkan.

    Sheekoyinka kale ee aad sii akhrisan karto:

  13. Qareenkii Soomaliga ahaa ee la la’aa oo la helay

    Qareen Axmed sadiq Cabdi Abshir, oo ahaa qareen Soomaali ah ayaa la helay isagoo nool ka dib muddo kow iyo toban maalmood oo la la’aa.

    Warbaahinta maxaliga ah ee Kenya ayaa sheegaysa in qareen Axmed laga helay deegaan ku yaalla Ismaamulka Isiolo, sida ay xaqiijiyeen Ururka Qareennada Kenya (LSK)

    Sakariye Cabdi Abshir oo ah walaalka qareen Axmed, ayaa sidoo kale BBC-da u xaqiijiyey in walaalkiisa la helay.

    Mudadii la la ‘aa qareen Axmed, qareenada Kenya ayaa dibad-baxyo ka dhigayey Nairobi, iyagoo ka dalbaday laamaha ammaanka inay xoogga saaraan sidii loo soo heli lahaa qareenka.

  14. Daraasad "xal waara" u heshay bidaarta

    Bidaarta

    Burooyinka yaryar ee maqaarka dadka ayaa suurta gal ah in uu leeyahay fursad lagu daweyn karo bidaarta, sida lagasoo xigtay daraasad toddobaadkan lagu daabacay joornaalka Nature.

    Ku dhawaad toban sano, saynisyahano ka tirsan Jaamacadda California, Irvine waxay baranayeen burooyinka maqaarka si ay u fahmaan sababta ay ugasoo baxaan timaha dhaadheer. daraasadda cusub waxay muujineysaa in burooyinka noocan oo kale ah ay ka kooban yihiin unugyo gaar ah oo kor u qaada koritaanka timaha.

    “Waxaan timaha burooyinka ka dul baxa ka helnay tixraac,” ayuu yiri Maksim Plikus oo ah madaxa daraasadda isla markaana ah barfasoore ka ah jaamacadda California, Irvine kana dhiga samaysanka unugyada bayoolajiga.

    Dadku sida caadiga ah waxay lumiyaan inta u dhaxaysa 50 iyo 100 xabbo oo timo ah maalintii, ka dibna unugyada gunta tinta ayaa soo saara kuwo cusub. Laakiin shakhsiyaadka leh bidaarta ama ay hadda kusoo socoto - waxa ay dhakhaatiirtu u yaqaanaan ‘alopecia’ ama ‘alopecia androgenic’ oo ah unugyada asliga ah ayaa jiifa, sidaas darteed ayeysan timo cusub usoo baxeyn.

    Sida lagu helay Tijaabooyin loo adeegsaday jiir, Plikus iyo kooxdiisa cilmi-baaristu waxay muujiyeen in nooc ‘molecule ah’ oo loo yaqaan ‘osteopontin’, oo si gaar ah ugu badan burooyinka maqaarka ee timaha leh, uu kicin karo unugyada tarma ee timaha, kuwaas oo markii hore hurday.

  15. War deg deg ah, Manchester United oo shaqada ka cayrisay tababare Carrick

    Carrick

    Kooxda Manchester United ayaa ku dhawaaqday inay shaqada ka cayrisay tababaraheeda Michael Carrick, kadib markii kooxdu muddo dheer ku guuldarreysatay inay guulo gaarto horyaalka Premier League. Natiijooyinkaas liita ayaa ugu dambeyn sababay barbaro 4-4 ah oo ay garoonkeeda kula gashay Aston Villa dhammaadkii toddobaadkii hore, taasoo kooxda ku reebtay aagga kooxaha u dhacaya heerka labaad.

    Manchester United ayaa ku guuleysatay kaliya saddex ka mid ah 15-kii kulan ee ay ciyaartay dhammaan tartamada intii uu Carrick tababaraha u ahaa xilli ciyaareedkan, iyadoo hal guul oo keliya ay ka gaartay horyaalka.

    Tani waxay kooxda ka dhigtay kaalinta 18-aad ee kala sarreynta horyaalka, iyadoo leh siddeed dhibcood kadib 10 kulan, waxayna hal dhibic oo keliya ka sarreysaa kooxda ugu hooseysa kala sarreynta.

  16. Afhayeenka Milatariga Pakistan: Way naga go’an tahay ilaalinta amniga Sacuudiga iyo goobaha Barakaysan

    Afhayeenka milatariga Pakistan, Sarreeye Guuto Ahmed Sharif Chaudhry, ayaa sheegay in sida ay Pakistan uga go’an tahay sugidda amniga, madaxbannaanida iyo wadajirka dhuleed ee Sacuudi Carabiya ay tahay mid aan marnaba isbeddelayn, isla markaana aan laga tanaasuli karin.

    Wareysi uu siiyay wargeyska Carbeed ee Asharq Al-Awsat ayuu ku sheegay in la qaaday tallaabooyin lagu hirgelinayo waajibaadka difaac ee wadajirka ah ee Isbahaysiga Difaaca Wadajirka ah ee Maka. Isagoo intaa ku daray in tallaabooyinkani ay suuragelin doonaan in si degdeg ah Sacuudi Carabiya loo geeyo ciidamo milatari oo mideysan iyo awoodaha difaaca, haddii loo baahdo.

    Sida uu sheegay, tallaabooyinkan waxaa ka mid ah kordhinta heeganka milatari, xoojinta isdhexgalka ciidamada, isdhaafsiga xogaha sirdoonka iyo isku-duwidda hawlgallada difaaca oo keliya.

    Sarreeye Guuto Ahmed Sharif Chaudhry ayaa sheegay in ciidamo Pakistani ah ay horay u joogaan Sacuudi Carabiya, kuwaas oo halkaas ku sugan iyagoo fulinaya waajibaadyo kala duwan. Wuxuu sheegay in doorkooda ugu weyn uu yahay bixinta taageerada difaaca, ka qaybgalka tababarrada iyo dhoolatusyada milatari.

    Wuxuu intaa ku daray in Pakistan ay sii wadi doonto taageerada kasta oo ay awooddo ee dhinaca difaaca ah oo ay siiso Sacuudi Carabiya, taas oo ay ka mid yihiin ciidamo, awoodaha difaaca, tababarro iyo taageero saadka ah.

    Hase yeeshee, wuxuu ka gaabsaday inuu faahfaahin ka bixiyo tirada ciidamada Pakistan ee ku sugan Sacuudi Carabiya iyo goobaha ay ka hawlgalaan, isagoo sheegay in xogaha noocaas ah aan guud ahaan la shaacin marka ay timaaddo isbahaysiyada milatari.

  17. Xuutiyiinta oo weeraray xero ciidan oo ku taalla magaalada Cadan ee dalka Yemen

    Xuutiyiinta
    Qoraalka sawirka, Xuutiyiinta

    Ilo wareedyo dhanka ammaanka ah oo ka tirsan dowladda Yemen ee Sacuudigu taageero ayaa sheegay in fallaagada Xuutiyiintu ay Arbacadii weerarro ka geysteen magaalada Cadan, halkaas oo ay dowladdu ka hawlgasho.

    Sida ay ilo wareedyadu sheegeen, weerarrada ayaa lagu bartilmaameedsaday xeryo ay leeyihiin ciidamada dowladda.

    Horaantii, dadweyne aad u badan ayaa isugu soo baxay caasimadda Sanca ee ay Xuutiyiintu maamulaan, si ay uga qaybgalaan aaska tobannaan qof oo toddobaadkii hore lagu dilay weerarro lagu tilmaamay "weerarro Sacuudigu geystay".

    Dagaalka Yemen ayaa socday tan iyo sannadkii 2014-kii. Sannadkaas ayay Xuutiyiintu la wareegeen magaalada Sanca. Sannad kaddib, isbahaysi uu Sacuudigu hoggaaminayo ayaa dagaalka ku biiray si uu u taageero dowladda Yemen.

    Xabbad-joojin jilicsan oo la gaaray sannadkii 2022-kii ayaa burburtay bishii Luulyo. Tan iyo xilligaas, waxaa sii socday colaadda u dhexeysa Sacuudiga iyo Xuutiyiinta.

    Muddadaas, Xuutiyiintu waxay weerarro ku qaadeen garoomada diyaaradaha Sacuudiga, xarumaha la xiriira tamarta iyo saldhigyada ciidamada.

    Sidoo kale akhri:

  18. Dad ku dhintay weerar ay Israa'iil ka geysatay isbitaal ku yaalla Gaza

    Gaza
    Qoraalka sawirka, Gaza

    Ugu yaraan shan qof oo Falastiiniyiin ah ayaa ku dhintay duqeyn cirka ah oo Israa’iil ka fulisay dhisme ku yaalla Isbitaalka Nasser, ee koonfurta Marinka Gaza, sida uu sheegay mas’uul ka tirsan hay’adda Difaaca Madaniga ah ee Gaza oo maamusho Xamaas.

    Goobjoogayaal ayaa sheegay in gantaal laga soo tuuray diyaarad dagaal oo muddo kooban dul martay aagga uu ku dhacay dhisme ku yaalla isbitaalka, kaas oo ay ku yaalleen qaybaha qalliinka iyo daryeelka degdegga ah. Waxaa sidoo kale dhaawacmay 20 qof.

    Dhakhtar qalliinka sameyn jiray ayaa la sheegay inuu ka mid yahay dadka ku dhintay weerarka oo dhacay subaxnimadii hore ee saaka.

    Milatariga Israa’iil ayaa sheegay in bartilmaameedku ahaa xubin sare oo ka tirsan Xamaas iyo dagaalyahanno kale oo isbitaalka u adeegsanayay “xarun ay ku agaasimaan dhaqdhaqaaqyada milatari iyo kuwa argagixisada”.

    Bayaan wadajir ah oo ay soo saareen Ciidamada Difaaca Israa’iil (IDF) iyo Hay’adda Ammaanka Israa’iil (ISA), ayay si adag ugu cambaareeyeen adeegsiga Xamaas ee “kaabayaasha rayidka iyo kuwa caafimaadka ujeeddooyin milatari”.

    Bayaanka ayaa sidoo kale lagu sheegay in la qaaday tallaabooyin lagu yareynayo waxyeellada soo gaari karta dadka rayidka ah, oo ay ka mid ahaayeen adeegsiga hub si sax ah u hago bartilmaameedka iyo kormeerka cirka.

    Sida uu dhigayo sharciga caalamiga ah, isbitaalladu waxay leeyihiin ilaalin gaar ah, hase yeeshee waxaa marar badan la bartilmaameedsaday intii uu socday dagaalka Gaza.

    Sidoo kale akhri:

  19. Trump iyo Netanyahu oo dil loogu hanjabay

    Netanyahu iyo Trump
    Qoraalka sawirka, Netanyahu iyo Trump

    Brigedia Jeneraal Kiomars Heidari, ku-xigeenka Taliyaha Guud ee Ciidamada Qalabka Sida ee Iran, ayaa ku hanjabay in la dili doono hoggaamiyeyaasha Mareykanka iyo Israa’iil, xilli uu wareysi siinayay telefishin ka howlgala dalkaas.

    “Waxaan dili doonnaa Trump iyo Netanyahu,” ayuu yiri sarkaalkaasi oo hadalkiisa lagu baahiyay muuqaal ay shalay daabacday wakaaladda wararka ee dowladda Iran.

    Wareysigaas, sarkaalka militariga ah ayaa sheegay in dhammaan maraakiibta dagaalka ee Mareykanka ay hadda ku sugan yihiinmeel masaafo dhan 500 oo kiiloomitir u jirta Iran.

    Arrintan ayaa timid kadib markii ciidamada Iran ay bartilmaameedsadeen laba markab oo dagaal oo Mareykan ah 6-dii iyo 7-dii bishii Sebtembar.

    Ku-xigeenka Taliyaha Guud ee Ciidamada Iran ayaa sidoo kale sheegay in intii uu socday dagaalkii milatari ee bilihii la soo dhaafay, ciidamada Iran ay burburiyeen 300 oo diyaaradood oo Mareykan ah, ayna qaar ka mid ah la wareegeen iyagoo adeegsanaya nidaamyada dagaalka elektaroonigga ah.

    Sidoo kale, wuxuu ka digay inay jiraan hub sir ah oo gantaallo ah oo ilaa hadda la qariyay, isagoo sheegay in haddii dagaal kale uu qarxo ay soo bandhigi doonaan sirtaas.

    Sidoo kale akhri:

  20. Xuutiyiinta oo sheegay inay diyaarad aan duuliye lahayn ku weerareen xarun shidaal oo ku taalla Sacuudiga

    Xuutiyiinta Yemen ayaa sheegay inay diyaarad aan duuliye lahayn ku weerareen xarun shidaalka lagu shubo ee ku taalla magaalada Yanbu ee dalka Sacuudiga, taas oo ku dhow xeebta Badda Cas.

    Xuutiyiinta ayaa sidoo kale sheegay inay saddex gantaal oo nooca cruise-ka ah ku bartilmaameedsadeen garoonka diyaaradaha King Khalid ee magaalada Riyadh, caasimadda Sacuudiga.

    Afhayeenka Xuutiyiinta, Yahya Saree, ayaa sidoo kale beeniyay sheegashada isbahaysiga uu Sacuudigu hoggaamiyo ee ahayd inay ka hortageen diyaarad aan duuliye lahayn oo dul mareysay magaalada Maka.

    Waxa uu intaa ku daray in hawlgallada Xuutiyiintu ay bartilmaameedsanayaan xarumaha shidaalka iyo saldhigyada milatari ee Sacuudiga.

    Sidoo kale akhri: