Xaggee ku dambeeyey jilaaga Mithun Chakraborty maxaase dhex maray isaga iyo maamulka Kolkata

Ka dib markii uu Kolkata kula kulmay Wasiirka ugu sarreeya govolkaas Suvendu Adhikari si looga wada hadlo dabaaldegga boqol-guurada dhalashada jilaaga caanka ah ee reer Bengal, Uttam Kumar, hoggaamiyaha xisbiga BJP ahna jilaa, Mithun Chakraborty, ayaa muujiyay sida uusan ugu faraxsanayn inaan lagu martiqaadin Bandhigga Filimada ee Bengal.

Mithun ayaa yiri, "La iguma marti qaadin bandhigga filimada. Hadda waxaan u safrayaa Moscow, laga yaabee inay halkaas igu martiqaadi doonaan. Waxaa la igu martiqaadayaa Bandhigga Filimada ee Moscow, laakiin halkan Bengal, lama iigu yeerin."

Wuxuu si kaftan iyo dhaliil isku jirta ah u sheegay in laga yaabo inaan lagu martiqaadin sababtoo ah waxaa loo arkaa 'fanaan yar'.

Mithun ayaa sidoo kale sheegay in dadka waaweyn ee ka imaanaya meelaha kale, kuwaas oo aan wax xiriir ah la lahayn Bengal, halkan lagu martiqaado, halka fanaaniinta Bengal la iska indha tiro.

Waa kuma Mithun Chackraboty

Mithun waa jilaa, filim soo saare, ganacsade iyo siyaasi u dhashay dalka Hindiya. Intii uu ku guda jiray xirfaddiisa oo qaadatay in ka badan shan iyo toban sano, wuxuu sameeyay 350 filim, kuwaas oo intooda badan ku baxay luqadaha Hindi iyo Bengali, halka qaar kalena ay ku baxeen luqadaha Bhojpuri, Telugu, Odia, Tamil, Kannada iyo Punjabi.

Waxaa loo yaqaan "Mahaguru" (oo af-Bengali ku ah "Macallinka Weyn"), wuxuuna horay uga tirsanaan jiray xildhibaannada aqalka sare ee baarlamaanka Hindiya (Rajya Sabha).

Wuxuu ku guuleystay saddex abaal-marinood oo heer qaran ah oo dhanka filimada ah (National Film Awards) iyo afar abaal-marinood oo Filmfare ah.

Bishii Janaayo 2024, Mithun waxaa la guddoonsiiyay abaal-marinta Padma Bhushan, taas oo ah sharaf celinta saddexaad ee ugu sarreysa ee dadka rayidka ah la siiyo dalka Hindiya.

Waxaa sidoo kale la siiyay abaal-marinta ugu sarreysa Hindiya ee dhanka shineemada, taas oo ah Dadasaheb Phalke Award ee sanadkii 2022, iyadoo ku dhawaaqista abaal marintan ay ka timid Wasaaradda Warfaafinta ee Dowladda Dhexe bishii Sebtembar 2024.

Mithun oo 76 jir ah waxaa aad loogu xusuustaa kaalintiisii jilliinka ee filimkii Disco Dancer ee soo baxay 1982.

Xaaladda uu hadda ku sugan yahay

Mithun Chakraborty todobaadkii hore ayaa la dhigay isbitaal gaar loo leeyahay oo ku yaalla magaalada Kolkata, halkaas oo uu ku qaadanayo xilli soo kabasho ah ka dib markii lagu sameeyay qalliin fudud.

Jilaagan iyo siyaasiga rug-caddaaga ah ayaa la sheegay in xaaladdiisu ay wanaagsan tahay, isla markaana la filayo in dhawaan laga saaro isbitaalka.

Arrintan ayaa soo shaac-baxday ka dib markii Ra'iisul Wasaaraha Gobolka West Bengal, Suvendu Adhikari, uu booqday jilaaga isbitaalka maalintii Jimcaha, uuna faahfaahin ka bixiyay kulankooda baraha bulshada.

Mithun Chakraborty ayaa sidoo kale ku lug lahaa siyaasadda tobankii sano ee la soo dhaafay.

Wuxuu horay uga tirsanaan jiray xubnaha Rajya Sabha isagoo matalaya xisbiga Trinamool Congress, ka hor inta uusan iska casilin xilka baarlamaanka sanadkii 2016-kii sababo la xiriira caafimaadkiisa.

Kadib wuxuu ku biiray xisbiga Bharatiya Janata Party (BJP), wuxuuna noqday mid ka mid ah shaqsiyaadka ugu muhiimsan ee ololaha xisbiga ka waday gobolka West Bengal.

Wuxuu si firfircoon uga qaybqaatay ololeyaal doorasho oo dhowr ah, oo ay ka mid yihiin doorashadii Lok Sabha ee 2024-kii iyo doorashadii baarlamaanka gobolka West Bengal ee dhawaan la soo gabagabeeyay.

Hadda, jilaagan khibradda leh ayaa si fiican uga soo kabanaya qalliin yar oo lagu sameeyay, iyadoo Adhikari uu sheegay inay u badan tahay in dhawaan laga saari doono isbitaalka.