Trump oo $5,000 ballan qaaday hadii xisbigiisu guuleysto

Madaxweynaha Maraykanka Donald Trump ayaa sheegay in uu qof kasta oo qaangaadh ah oo Maraykan ah siin doono $5,000 (£3,700) haddii Jamhuuriyiintu ay ku guuleystaan labada aqal ee Congress-ka doorashooyinka badhtamaha xilliga doorashada xilliga dhexe ee bisha Nofeembar. Qorshahan ayaa dawladda Maraykanka ku kici kara in ka badan $1 tiriliyan.

Trump ayaa hadalkan ka sheegay shirkii ugu horreeyay ee xisbiga Jamhuuriga oo la qabtay badhtamaha muddo-xileedka madaxweyne.

Madaxweynuhu ma uu sheegin sida lacagtaasi loo bixin doono ama halka laga heli doono dhaqaalaha lagu maalgelinayo qorshaha.

Si kastaba ha ahaatee, Madaxweyne-ku-xigeenka Maraykanka, JD Vance, ayaa sheegay in lacagta laga maalgelin karo dakhliga dawladda ee ka soo xarooda canshuuraha lagu soo rogay badeecadaha dibadda laga keeno, oo loo yaqaan tacriifada.

Haddii ku dhowaad 270 milyan oo qof oo qaangaadh ah la siiyo shan kun oo dollar qofkiiba, dawladda Maraykanka waxaa ku bixi karta lacag gaadhaysa 1.3 tiriliyan oo dollar.

Qorshahan ayaa durba dhaliyay muran siyaasadeed.

"Waxaan idinka codsanayaa in aad meel iska dhigtaan in anigu aan ku jiro cod-bixinta iyo in kale. Anigu waxaan qaayb ka ahay cod-bixinta. Mar kale ayaan ku celinayaa, hal mar oo keliya. Sababtoo ah haddii aan guuldarraysanno, waxaad lumin doontaan xuduudihiinna. Waxaad lumin doontaan waxqabadjii aad ugu baahnayndeen canshuurtiinna. Waxaad lumin doontaan ammaankiinna iyo badbaadadiinna. Waxaad waayi doontaan hantidiinna iyo dhaqaalihiinna."

Dalkeenna wuxuu marayaa xaalad aad u adag. Waxaan geli doonnaa xaalad ka sii adag oo kaba sii xun sidii ay ahayd laba sano ka hor. Run ahaatii xaalad aad u adag ayaan soo marnay," ayaa uu yidhi madaxweyne Trump.

Dhanka kale, qiimaha saliidda ayaa isbeddello xooggan ku yimid sababo la xidhiidha xiisadda ka taagan Bariga Dhexe iyo xidhitaanka qayb weyn oo ka mid ah Marinka Hormuz, oo ah marin muhiim u ah ganacsiga shidaalka adduunka.

Trump ayaa sheegay in dagaalka aanu dhammaan doonin ilaa inta laga gaadhayo doorashooyinka badhtamaha xilliga, taas oo keentay cadaadis kaga imaanaya qaar ka mid ah xisbigiisa oo doonaya in colaadda la soo afjaro.

BBC waxay Aqalka Cad ka codsatay faahfaahin dheeraad ah oo ku saabsan sida qorshaha Trump u shaqayn doono.

Tani ma aha markii ugu horreysay ee Trump uu ballanqaado lacag caddaan ah oo dadka la siinayo. Hore ayuu u soo jeediyay jeegag dhan $2,000, kuwaas oo lagu maalgelin lahaa dakhliga ka soo baxa canshuuraha lagu soo rogo badeecadaha dibadda laga keeno.

Haddaba, qorshahan shanta kun ee dollar ah ayaa weli ah ballan siyaasadeed oo aan faahfaahin rasmi ah laga bixin.

Su'aasha ugu weyn waxay tahay: xaggee lacagta laga keenayaa, yaase heli doona, sideese dowladda Maraykanku u fulin doontaa qorshahan?