An Nowodhow - the News in Cornish

Recording 1/3
Myttin da. Konsel Kernow re dheklaryas ev dhe sina akord kyfyansek gans Homes England may hallo ev drehevel milyow a jiow moy. Homes England yw maynorieth selys gans an governans dhe weres awtoritys leel, kowethasow anedhyans, ha drehevyoryon brivedh ow trehevel moy chiow nowydh affordyadow. Konsel Kernow yw an tressa awtorita leel dhe wul akord gans an vaynorieth wosa an Menyster a-barth Anedhyans, Matthew Pennycook, dhe skoodhya towlen an konsel dhe dhrehevel moy es peswar mil ji pub bledhen. Nyns o nebes konseloryon lowen bos manylyon an akord kyfyansek, mes konseler Peter La Broy a worthebis y hylli pub konseler pysi redya an derivas dien. Ev a geworras y hwre an kespareth surhe may halla an konsel kavos skoodhyans arghansek rag y ragdresow anedhyans y’n termyn a dheu.

Translation 1/3
Good morning. Cornwall Council has announced that it has signed a confidential agreement with Homes England which will enable it to build thousands more houses. Homes England is an agency set up by the government to help local authorities, housing associations, and private developers build more affordable new homes.
Cornwall Council is the third local authority to make an agreement with the agency after Housing Minister, Matthew Pennycook, supported the council’s plan to build more than 4,000 houses every year. Some councillors were unhappy that details of the agreement were confidential, but councillor Peter La Broy answered that every councillor could ask to read the whole report. He added that the partnership would ensure that the council could access financial support for its future housing projects.

Recording 2/3
Tangasoryon y’n ranndir Soth West re warnyas bos an peryl a danyow gwyls prest ow pesya.
Fest bysi re beu tanluyow yn Kernow dres an hav ma. Rag ensampel, mayniow dhyworth Gorsav Tan Kemeneth Ponswad a veu gelwys dhe bymthek hwarvedhyans ha peswar ugens y’n tri mis a-dhia dhalleth mis Metheven.
Pennsodhoges Gonis Tan ha Sawya Kernow, Kathryn Billing hy hanow, a leveris bos an hav eus passyes onan euthyk rag perghenogyon dir, hag y fynna hy mayniow kesoberi gansa dres an gwav yn maner ragvewek dhe wruthyl torrvaow tan ha pareusi an powdir rag an vledhen a dheu. Hi a geworras bos hwans dhedhi chanjya fara an poblek ha surhe i dhe wul devnydh a varbakoas ha tansysyow yn maner omgemeryansek.

Translation 2/3
Firefighters in the South West region have warned that the risk of wildfires remains high.
Fire brigades in Cornwall have been extremely busy this summer. For example, crews from Wadebridge Community Fire Station were called to 95 incidents in the three months since the beginning of June.
Cornwall Fire and Rescue’s chief fire officer, Kathryn Billing, said that last summer was a dreadful one for landowners, and she wanted crews to work proactively with them through the winter to create firebreaks and to prepare the countryside for the coming year. She added that she wanted to change public behaviour and make sure that they used barbecues and bonfires in a responsible manner.

Recording 3/3
Sentri Reunyon Kernewek yn Gwig re dhegemeras y gynsa reun yowynk a’n seson ha’y henwel Babybel.
Kevys veu an reun loos benow yn Porthkaveran wosa bos gesys war an treth gans hy mamm.
Milvedhogyon a withas war an reunes dres dew dhydh, mes pan na dhehwelis hy mamm dh’y maga, i a’s kemeras dhe’n sentri drefen hi dhe dhos ha bos gwann. An sentri a dherivas an kolynes dhe seweni, ha keworra bos res dhedhi lemmyn dybri, koska ha tevi. I a geworras y vos normal rag reunyon dhe asa aga helyn war an treth treweythyow, hag y tegoodh dhe’n poblek ombellhe dhyworta mar nyns ens klav po yn ahwer.
Ha henn yw oll ahanav vy an seythen ma. Terebo nessa!

Translation 3/3
The Cornish Seal Sanctuary in Gweek has received its first young seal of the season and named her Babybel.
The female grey seal was found at Port Gaverne after being abandoned on the beach by its mother.
Vets monitored the seal for two days, but when its mother did not return to feed her, they took her to the sanctuary as she was getting weaker. The sanctuary reported that the pup was thriving, and added that she now needed to eat, sleep and grow. They added that it was normal for seals to leave their pups on the beach from time to time, and that the public should keep away from them if they were not sick or in distress.
And that’s all from me for this week. Until next time!

This week’s An Nowodhow was written and presented by Steve Penhaligon and edited by Steve Harris.

You can listen again on BBC Sounds by going to bbc.co.uk/cornwall and scrolling down to the ‘Best Bits’ section.

Photo of Newquay by BBC Weather Watcher Debbie W.