Abinci uku da ke ƙara ƙarfin ƙashi a jikin mutum
Ƙarfin ƙashin jikin mutum na fara raguwa tun kafin lokacin da ake tsammani. Sai dai cin abincin da ke ɗauke da muhimman sinadarai na taimakawa wajen kiyaye lafiyar ƙashi da ƙarfafa shi.
Shan madara na taimakawa wajen samun ƙashi mai ƙarfi. Wannan na daga cikin shawarwarin lafiya na farko da ake bai wa mutane da dama tun suna ƙanana.
A lokacin ƙuruciya, ana ƙarfafa yara su riƙa shan madararsu, musamman a lokacin hutun makaranta, bisa bayanin cewa sinadarin calcium da ke cikinta zai taimaka wajen samar musu da ƙashi mai ƙarfi da lafiya.