Abubuwan da ke faruwa a Najeriya da sassan duniya 12/10/2026

Rahoto kai-tsaye

Aisha Aliyu Jaafar da Nabeela Mukhtar Uba

1. 12 Oktoba 2026Birtaniya na zargin Iran da yunkurin kai hari sansanin sojinta

   Firaministan Birtaniya Andy Burnham ya ce akwai kusan tabbacin cewa dakarun juyin-juya halin Iran ne ke da hannu a wani shirin kai hari kan sansanin sojin sama da Amurka ta yi amfani da shi wajen kai hari Ira, da ke yammacin Ingila.

   An kama ƴan Birtaniya biyar a kusa da sansanin RAF Fairford a watan jiya kan zargin ta'addanci, amma daga baya aka bayar da belinsu ba tare da an tuhume su ba.

   Amurka ta janye manyan jiragen ruwan da take kai harin bama-bamai da ta yi amfani da su wajen kai hari Iran.

   Iran ta musanta zargin, yayin da fiye da ƙasashen yammacin duniya 30 suka goyi bayan Birtaniya tare da gargadin Tehran kan sake ɗaukar wani matakin.

2. 12 Oktoba 2026Yadda farashin man fetur yake a gidajen man NNPC a Najeriya

   Iƙirarin da kamfanin man fetur na Najeriya (NNPC) ya yi na cewa ya rage farashin litar man fetur da naira 66 a gidajen mansa ya sha bamban da abin da ake gani a zahiri.

   Binciken BBC a sassa daban-daban na ƙasar ya nuna cewa farashin man fetur a gidajen NNPC ya ɗan yi ƙasa da na yadda wasu sauran ƴan kasuwa ke sayarwa, amma dai bambancin bai kai naira 66 ba.

   Duk da rangwamen da gwamnati ta ce za a riƙa samu a gidajen man gwamnati, farashin gidajen man ƴan kasuwa a wasu wuraren ya fi sauƙi fiye da na NNPC.

   Ku karanta farashin da BBC ta gano a nan.

3. 12 Oktoba 2026Jami'an shige da fice sun kai samame gidan Ilham a Amurka

   Ƴar majalisar dokokin Amurka ta jam'iyyar Democrat, Ilhan Omar, wadda 'yar asalin Somaliya ce, ta yi Allah-wadai da samamen da jami'an tsaron cikin gida na Amurka suka kai gidanta da ke Washington.

   Ilhan Omar, ƴar majalisa daga jihar Minnesota kuma mai sukar Shugaba Donald Trump, ta bayyana samamen a matsayin yunƙurin tsoratar da ita saboda siyasa.

   Rahotanni sun ce samamen na da nasaba da bincike kan takardun shige da fice da mahaifinta ya gabatar a madadinta lokacin tana yarinya.

   Shugabannin jam'iyyar Democrat sun bayyana samamen a matsayin abin mai tayar da hankali, suna zargin gwamnatin Trump da ci gaba da amfani da hukumomin gwamnatin tarayya wajen muzgunawa abokan hamayyarsa na siyasa.

   A watan jiya, jami'in fadar White House mai kula da harkokin kan iyaka, Tom Homan, ya tabbatar da cewa ana gudanar da binciken aikata laifi kan Ilhan Omar.

4. 12 Oktoba 2026Jihar Binuwai za ta ci gaba da kula da masu HIV duk da rashin tallafi

   Akalla mutane 197,000 da ke karɓar magani da kulawa kan cuta mai ƙarya garkuwar jiki wato HIV a Jihar Binuwai da ke arewa ta tsakiyar Najeriya na fuskantar rashin tabbas game da ci gaba da samun tallafi, sakamakon raguwar gudunmawar masu bayar da tallafin ƙasa da ƙasa.

   Saboda wannan matsala, gwamnatin jihar ta kafa kwamiti mai mambobi bakwai domin samar da shirin dorewar ayyukan kula da masu fama da cutar a jihar.

   Kwamitin, wanda Kwamishinan Lafiya da Ayyukan Jin Daɗin Jama'a, Dakta Paul Ogwuche, ke jagoranta, an ɗora masa alhakin, gano gibin da ke akwai a fannin kuɗaɗen tallafi, da tantance muhimman ayyukan da ya kamata a ba fifiko, da shirya cikakken tsarin aiki tare da kasafin kuɗi domin tabbatar da cewa marasa lafiya na ci gaba da samun magani da sauran muhimman ayyukan kiwon lafiya ba tare da tangarda ba.

   Sakatariyar Gwamnatin Jihar, Barrista Deborah Aber, ce ta sanar da kafa kwamitin a yayin taron nazarin sakamakon ayyuka da dorewar shirye-shiryen APIN na jihar da aka gudanar a Makurdi.

   Ta kuma umarci kwamitin da ya kammala aikinsa cikin mako guda, tare da gabatar da shawarwarinsa, domin a miƙa su ga taron gaba na Majalisar Zartarwa ta Jihar don yin nazari da yanke hukunci.

5. 12 Oktoba 2026Ana fargabar ƴan Houthi na kai harin jirage maras matuka a Saudiyya

   Ƙawancen ƙasashen da Saudiyya ke jagoranta wanda ke yaƙi da ‘yan tawayen Houthi masu samun goyon bayan Iran a Yemen, ya ce yana fuskantar wata sabuwar barazana ta jirage marasa matuƙa da kuma makamai masu linzami da ake kai wa Saudiyya hari da su.

   Wannan na zuwa ne bayan wasu hare-hare biyu masu muni da aka kai filin jirgin saman ƙasa da ƙasa na Riyadh a ƙarshen mako, waɗanda suka kashe mutum 14 tare da jikkata sama da mutum 300.

   Har yanzu ba a bayar da cikakkun bayanai kan wurare ko abubuwan da ake kai wa hare-hare ba a sabbin hare-haren da aka kai da jirage marasa matuƙa da kuma makamai masu linzami a Saudiyyar.

   Sai dai ƙawancen ƙasashen da Saudiyya ke jagoranta ya ce makamansa kariyar sararin samaniya yana dakile barazanar.

   Bayan harin na ranar Asabar, wanda shi ne mafi muni da aka kai a ƙasar Saudiyya cikin sama da shekara goma, hukumomin kasar sun ce sun tsawaita dakatar da zirga-zirgar jiragen sama a Filin Jirgin Sama na Ƙasa da Ƙasa na Sarki Khalid da ke Riyadh.

   A Yemen kuwa, mayaƙan Houthi sun ƙara tsaurara ƙawanyar da suka yi wa birnin Taiz, wanda ke ƙarƙashin ikon gwamnatin ƙasar da ƙasashen duniya suka amince da ita.

   Rahotanni sun ce harin ya yi sanadin mutuwar sama da mutum 60 cikin sa’o’i 24 da suka gabata, yayin da ake gargadin cewa matsalar jinƙai na ƙara taɓarɓarewa a birnin.

6. 12 Oktoba 2026An rufe makarantu 9 a Kano saboda rashin cika ƙa'idar rijista

   Hukumar Kula da Makarantu Masu Zaman Kansu da na Ƙungiyoyi ta Jihar Kano (KSPVIB) ta rufe makarantu masu zaman kansu guda tara na ɗan lokaci saboda rashin cika ka'idojin sake tantance rajista da samun sabbin takardun shaidar aiki.

   Sakataren zartarwa na hukumar, Kwamared Baba Abubakar Umar, ne ya bayyana hakan yayin wata tattaunawa da manema labarai a Kano.

   Ya ce makarantu da abin ya shafa za su ci gaba da kasancewa a rufe na tsawon kwanaki bakwai, daga ranar 12 ga Oktoba, 2026, domin ba su bi ƙa'idodin sake tabbatar da rajista da tantancewa da hukumar ta gindaya ba.

   Hukumar ta jaddada cewa matakin an ɗauke shi ne domin tabbatar da cewa dukkan makarantu masu zaman kansu a jihar suna aiki bisa ƙa'idoji da dokokin ilimi da aka tanada.

   Ana sa ran makarantun za su yi amfani da lokacin rufewar wajen cike dukkan sharuddan da ake buƙata domin a sake ba su damar ci gaba da gudanar da ayyukansu bayan wa'adin kwanaki bakwai ya cika.

   Makarantun sun haɗa da; Zayyad Academy, da Success International Schools, da Sunshine International School, da Perfect Schools, da Al-Fa’iq International College, da Mainasara International School, da Shubla Academy, da Darul Mu’uminat Comprehensive School da Hanan International School.

   Umar ya ƙarin makarantu 111 da suke tsallake ƙa'idojin yin rijista, da gargadin matuƙar aka tabbatar da hakan za su fuskanci fushin hukuma. A karshe ya yi kakkausan gargaɗi kan makarantu 9 da aka rufe da kar su sake su bude ba tare da izinin hukuma ba in ba haka ba za a ɗauki matakin shari'a akansu.

7. 12 Oktoba 2026Mataimakin shugaban ƴansandan Afurka ta Kudu ya yi murabus

   Mataimakin shugaban 'yan sandan Afirka ta Kudu, Laftanar Janar Shadrack Sibiya, ya yi murabus makonni uku bayan an gurfanar da shi kan zarge-zargen laifukan lalata.

   Mai magana da yawun 'yan sanda ya ce lauyan da ke wakiltar Sibiya ne ya miƙa takardar murabus ɗinsa a yayin zaman sauraron shari'ar ladabtarwa da aka gudanar ranar Litinin.

   Zarge-zargen da ake yi masa sun haɗa da, jan hankalin wata yarinya ƴar shekara 16 da koya mata lalata. Da zargin yiwa wata mashiya mai shekara 18 fyade, da zargin safarar mutane. Sai dai ya musanta waɗannan zarge-zargen.

   Ya amince cewa ya yi jima'i da budurwar mai shekaru 18, amma ya ce hakan ta faru ne da yardar juna, ba tare da tilastawa ba.

   Tun bayan kama shi makonni uku da suka gabata, yana tsare a hannun hukuma bayan kotu ta ƙi amincewa da bukatarsa ta beli.

   Ana ci gaba da sauraron shari'ar domin tantance gaskiyar zarge-zargen da ake masa.

8. 12 Oktoba 2026Lauyoyin Pantami sun rubuta wa INEC wasiƙa kan matsayin takararsa

   Lauyoyin tsohon Ministan Sadarwa da Tattalin Arzikin Dijital, Farfesa Isa Ali Ibrahim Pantami, sun bai wa Hukumar Zaɓe Mai Zaman Kanta ta Ƙasa (INEC) wa'adin kwanaki uku da ta sanya sunansa a matsayin ɗan takarar gwamnan Jihar Gombe na jam'iyyar PDP a zaɓen shekarar 2027.

   A cikin wasiƙar da suka aika wa hukumar, lauyoyin sun bayyana cire sunan Pantami daga jerin ƙarshe na 'yan takara da INEC ta wallafa ranar 10 ga Oktoba, 2026 a matsayin abin da ya saɓa wa doka kuma ba tare da wani bayani ba.

   Lauyoyin sun buƙaci INEC da ta gaggauta wallafa sunan Pantami a matsayin ɗan takarar PDP. Ta kuma yaɗa sunansa da irin muhimmanci da matsayin da aka ba sauran ƴan takara, sannan a cika wannan buƙata kafin ranar Laraba, 14 ga Oktoba, 2026.

   Sun kuma yi nuni da cewa rashin sanya sunansa a cikin jerin ƴan takarar na iya tauye haƙƙinsa na siyasa da kuma na jam'iyyar PDP, idan har ba a gyara lamarin cikin wa'adin da aka bayar ba.

   Ya zuwa yanzu, babu wani martani daga hukumar zaɓen Najeriyar wato INEC kan wannan buƙata. Idan hukumar ba ta bi umarnin da aka nema ba kafin wa'adin ya ƙare, ana sa ran lamarin na iya komawa kotu domin neman matakin shari'a.

   Farfesa Isa Ali Ibrahim Pantami ya zama ɗan takarar gwamnan jihar Gombe na jam'iyyar PDP ne a wani sabon zaɓen fidda gwani da aka gudanar ranar 29 ga Satumba, 2026, bayan wata Babbar Kotun Tarayya ta soke nasararsa ta farko tare da umartar jam'iyyar da ta sake gudanar da zaɓen cikin kwanaki 30.

   Lauyoyin Pantami sun bayyana cewa an gudanar da sabon zaɓen fidda gwanin ne bisa cikakken tsari da doka.

9. 12 Oktoba 2026Sojojin gwamnatin Habasha sun karɓe garin Adwa a yankin Tigray

   Mazauna garin Adwa da ke arewacin Tigray sun ce sojojin gwamnatin Habasha sun kwace garin, wanda ke kusa da iyakar Eritrea.

   Sun shaida wa BBC cewa sojojin sun shiga garin ne bayan mayakan ’yan tawaye sun fice a karshen mako, amma kafin su bar garin an yi sace-sace da kwashe dukiyoyi a wurare da dama.

   Sojojin Habasha na ci gaba da samun galaba a kan mayakan TPLF, bayan sake barkewar rikici a karshen watan jiya.

   A ranar Lahadi kuma aka dawo da zirga-zirgar jiragen sama zuwa Mekelle, babban birnin yankin Tigray.

   Habasha na zargin Eritrea da taimaka wa ’yan tawayen Tigray, yayin da Eritrea ke fargabar cewa za a iya kai mata hari.

10. 12 Oktoba 2026Sojojin Najeriya sun hallaka mayaƙan ISWAP 40 a Borno

    Rundunar sojin Najeriya ta ce ta yi nasarar hallaka fiye da mayaƙa 40, ciki har da wani babban kwamandan ISWAP, a wani sabon hari ta sama da sojoji suka kai kan maɓoyar 'yan ta'adda a ƙauyen Badu, da ke kudancin garin Gudumbali a ƙaramar hukumar Guzamala ta jihar Borno a ƙarshen mako.

    A cikin wata sanarwa da Jami'in Yaɗa Labarai na Hedikwatar Rundunar Haɗin Gwiwa ta operation Hakai na Arewa maso Gabas, Kyaftin Mohammed Goni, ya fitar a Maiduguri ranar Litinin, ya ce nasarar ta biyo bayan sahihan bayanan sirri da suka nuna cewa mayaƙan ISWAP sun taru domin shirya hare-hare a kan dakarun soji a yankin.

    Sanarwar ta ce, harin ya lalata motoci biyu da kusan babura 20 da mayaƙan ke amfani da su wajen zirga-zirga da safarar kayan aiki da kai hare-hare.

    Rundunar ta ce hakan ya rage ƙarfinsu na yaƙi tare da dakile hare-haren da suka shirya kai wa sansanonin soji da al'ummomin da ke kewaye.

    Ta kuma ce ana ci gaba da tantance cikakken girman barnar da harin ya haifar.

11. 12 Oktoba 2026An kai harin intanet kan na'urorin sanyaya kayan abinci a Faransa

    Wani gagarumin hari ta intanet ya haddasa matsala a Faransa bayan da ya janyo lalacewar na'urorin sanyaya abinci a wasu manyan shagunan sayar da kayayyaki na ƙasar, lamarin da ya sa aka yi asarar dimbin kayan abinci da waɗanda aka daskarar na miliyoyin Euro.

    Rahotanni sun ce masu kutse ta intanet sun samu damar kunna na'urar narkar da kankara daga nesa, ta hanyar yin kutse kan na'urorin wani kamfani da ke gudanar da manhajar da ake amfani da ita wajen kula da na'urori sanyaya abincin.

    Rahotanni sun ce zuwa yanzu shagunan fiye da 200 ne lamarin ya shafa.

    Babban jami'in gudanarwar kamfanin ya bayyana harin a matsayin "mai matukar muni, wanda ba a taba ganin irinsa ba kuma ba za a amince da shi ba."

    Ofishin mai gabatar da kara na birnin Paris ya ce ya ƙaddamar da bincike kan lamarin domin gano wadanda ke da hannu a harin da kuma yadda aka aiwatar da shi.

    A yankin Alsace kuwa, manyan shaguna biyu kaɗai sun ce asarar da suka yi ta haura dala 300,000.

12. 12 Oktoba 2026An ceto ƴan Najeriya fiye da 100 daga cibiyoyin aikata damfara ta intanet a Ghana

    Ƴan Najeriya sama da 100 da aka ceto daga wasu cibiyoyin aikata damfara ta yanar gizo a Ghana sun koma Najeriya.

    Hukumar Hana Safarar Mutane ta Najeriya (NAPTIP) ta ce an ceto su ne bayan wani samame da aka shirya kan ƙungiyoyin masu aikata laifukan yanar gizo.

    Hukumomin Ghana sun bayyana cewa an ceto 'yan Najeriya 119, yayin da ake ci gaba da tantance sauran mutum 14 kafin a dawo da su.

    An gudanar da wannan aiki ne karkashin jagorancin Ofishin Mai Ba Shugaban Najeriya Shawara kan Tsaro na Najeriya, bayan da Hukumar Tsaron Intanet ta Ghana ta tuntubi NAPTIP.

    Da take karbar wadanda aka dawo da su a ranar Litinin, Darakta Janar ta NAPTIP, Binta Lami Adamu Bello, ta tabbatar musu da cewa a yanzu suna cikin aminci kuma ce za tantancesu domin basu tallafin da kowannensu ke buƙata kafin su sake shiga cikin alumma.

    NAPTIP ta ce tana kara kaimi wajen yaki da kungiyoyin masu aikata laifuka da ke ketare iyakoki, wadanda ake zargi da amfani da mutane masu rauni wajen aikata laifuka. Sai dai hukumar ba ta bayyana inda aka gano 'yan Najeriyar ba, ko yanayin da aka same su a ciki, ko kuma ko an kama wadanda ake zargi da hannu a lamarin.

13. 12 Oktoba 2026Dubban ƴan Indiya na zanga zangar neman shugaban hukumar zaɓen ƙasar ya yi murabus

    Dubban mutane ne suka fito kan titunan birnin Delhi na ƙasar Indiya domin halartar abin da suka kira "Tattakin Dimokuraɗiyya", wanda aka shirya domin neman a cire shugaban hukumar zaɓe ta ƙasar daga muƙaminsa.

    Masu zanga-zangar, waɗanda ke ɗaga alluna tare da rera taken neman adalci, na kan hanyarsu ta zuwa Kotun Ƙolin ƙasar domin miƙa takardar ƙorafi kan cire sunayen miliyoyin masu kaɗa ƙuri'a daga kundin sunayen masu zaɓe.

    Wasu daga cikinsu na ganin cewa ba wai shugaban hukumar zaɓe kaɗai ya kamata ya sauka ba, har ma gwamnatin ƙasar, saboda an tauye wa mutane haƙƙinsu na kaɗa ƙuri'a.

    Sai dai hukumar zaɓen ta musanta aikata wani laifi ko kuskure.

    An tsaurara matakan tsaro a birnin Delhi yayin da ake gudanar da zanga-zangar.

    Jagoran adawa Rahul Gandhi ya shaida wa wani taron manema labarai cewa ana hana wasu mutane isa birnin Delhi domin shiga zanga-zangar.

14. 12 Oktoba 2026Mutum biliyan 1.2 ne ke rayuwa cikin talauci a faɗin duniya- MDD

    Shirin raya ƙasashe na Majalisar Ɗinkin duniya (UNDP) ya ruwaito cewa alƙaluman ƙasashe da ke fama da talauci a duniya ya karu a karon farko tun bayan ƙaddamar da wannan ma'auni a shekarar 2010, lamarin da ya sa yawan mutanen da ke fama da talauci ya kai biliyan 1.2.

    A cikin rahotonsa na shekara-shekara na 2026, UNDP tare da cibiyar bincike ta Oxford kan talauci sun bayyana cewa an samu ƙarin mutum miliyan 51 da ke rayuwa cikin “matsanancin talauci” idan aka kwatanta da shekarar da ta gabata.

    Shugaban gudanarwar UNDP, Alexander De Croo, ya ce akwai buƙatar ƙasashen duniya su tashi tsaye kan yadda ake samun ƙaruwar talauci.

    A cikin wata sanarwa da ya fitar, ya ce: '' A cikin waɗannan alƙaluma akwai mutane biliyan 1.2 da ke fuskantar matsaloli da ke ƙara jefa su cikin wahala, kamar yunwa, rashin samun ilimi da kuma rashin tsaftataccen ruwa ko wutar lantarki.”

    Ya kuma ce fiye da rabin mutanen da ke cikin matsanancin talauci yara ne.

    Sai dai UNDP ta bayyana cewa ɗaya daga cikin manyan abubuwan da suka haddasa ƙarin alkaluman shi ne ƙaruwar yawan jama'a, sannan an samu sabbin bayanan ne daga ƙasashe 13 kacal cikin ƙasashe 108 masu tasowa da rahoton ya ƙunsa.

15. 12 Oktoba 2026Mayaƙan Houthi na ci gaba da kai hare hare Saudiyya

    An daƙile zirga-zirgar jiragen sama a fadin Saudiyya karo na biyu cikin kwanaki, yayin da mayaƙan Houthi ke ci gaba da harba makamai masu linzami daga Yemen zuwa ƙasar.

    Filin jiragen sama na ƙasa da ƙasa da ke Riyadh ya dakatar da kusan dukkanin jiragensa kwanaki biyu a jere, bayan hare-hare uku masu muni da suka yi sanadin mutuwar mutane a cikin kwanakin da suka gabata.

    Mai magana da yawun ƙawancen sojojin da Saudiyya ke jagoranta a Yemen ya ce suna bibiyar barazanar kai hari da makamai masu linzami da kuma jiragen yaƙi marasa matuka.

    Tun da farko, ya bayyana cewa an kakkaɓo tare da lalata wani makami mai linzami da aka harba zuwa birnin Khamis Mushayt da ke kudu maso yammacin ƙasar.

    A gefe guda kuma, wasu manyan shugabannin kamfanonin makamashi na duniya sun cire sunayensu daga jerin mahalarta wani babban taron makamashi da za a gudanar a Riyadh.

16. 12 Oktoba 2026Atiku ya buƙaci a ceto Ahmad Zakka da iyalansa daga hannun masu garkuwa

    Tsohon mataimakin shugaban Najeriya Atiku Abubakar, ya yi kira ga gwamnati ta ɗauki matakin gaggawa domin ceto Ahmed Zakka, magidancin da ƴanbindiga suka sace tare da matarsa da jaririyarsu a jihar Kaduna.

    A cikin wata sanarwa da ya fitar, Atiku ya ce bidiyon da ke yawo na Ahmed Zakka da iyalansa a hannun masu garkuwa da su abin tayar da hankali ne, kuam ya sake nuna irin barazanar rashin tsaro da ke ci gaba da addabar al'ummar Najeriya.

    Ɗantakarar shugaban ƙasar a jam'iyyar ADC, ya ce babu wani ɗan Najeriya da ya kamata ya fuskanci irin wannan hali tare da roƙon a ceci rayuwarsa ko ta iyalansa a hannun ƴan bindiga, inda ya ce halin da jaririyar ke ciki ya matuƙar tayar masa da hankali.

    Atiku ya kuma bukaci jami'an tsaro su yi gaggawar ceto Ahmed Zakka da iyalansa tare da sauran mutanen da har yanzu suke hannun masu garkuwa da mutane.

    Ya ƙara da cewa ƴan ƙasar na ci gaba da fama da matsalar tsaro da matsin rayuwa kamar tsadar abinci, sufuri da sauran kayayyakin masarufi.

    Atiku ya ce akwai buƙatar gwamnati ta fara cika alƙawuran da take ɗauka kan tsaron.

17. 12 Oktoba 2026An kama wani ɗalibi mai shekara 14 da ake zargi da harbin malamai biyu a Faransa

    An harbi wasu malamai biyu a wata makaranta da ke kusa da birnin Marseille a kudancin Faransa.

    An kama wani ɗalibi mai shekaru 14 bisa zarginsa da yin harbin.

    Ma’aikatan makarantar biyu da lamarin ya shafa, ciki har da shugaban makarantar, sun samu raunukan harbi a ƙugu da cinya, amma likitoci sun ce raunukan ba su kai ga yin barazana ga rayukansu ba.

    Kafafen yaɗa labarai na Faransa sun ruwaito hukumomin yankin na cewa harbin ba shi da alaƙa da zanga-zangar makarantu da ake yi a faɗin ƙasar a halin yanzu, wadda aka samu munanan raunuka a cikinta.

    Ministan Ilimi da kuma Ministan Harkokin Cikin Gida na Faransa na kan hanyar zuwa wurin da lamarin ya faru domin bibiyar abin da ya faru.

18. 12 Oktoba 2026Ƙungiyar IS ta yi iƙirarin kashe sojojin Najeriya 15

    Kungiyar IS ta yi iƙirarin cewa ta kashe sojojin Najeriya 15 da kuma wani babban jami'in soja a wani hari da ta kai sansanin sojoji a jihar Borno da ke arewa maso gabashin Najeriya a ranar 6 ga Oktoba 2026.

    A ranar 11 ga Oktoba ne kamfanin dillancin labarai na ƙungiyar mai suna Amaq ya fitar da sanarwa ta kafafen Telegram na kungiyar, inda ya ce reshen kungiyar na ISWAP ne ke da alhakin kai harin.

    A cewar Amaq, a daren ranar 6 ga Oktoba mayakan ISWAP sun kai harin bazata sansanin da ke garin Kukawa, lamarin da ya haifar da mummunan artabu.

    Ƙungiyar ta ce wani jami'i mai mukamin Laftanar Kanar ya mutu a harin, tare da sojoji 15, yayin da aka jikkata wasu.

    Sanarwar ta kuma ce mayaƙan sun ƙona wata mota da wasu gidajen kwanan sojoji, sannan suka ƙwace wani makamin roka da bindigogi guda bakwai.

    Hoton da aka wallafa tare da sanarwar ya nuna abin da ƙungiyar ta ce makaman ne da ta ƙwace.

    A lokacin da kafafen yaɗa labarai suka ruwaito harin, sojojin sun ce sun daƙile harin, kuma sun kashe kimanin mayaƙan IS 25, yayin da suka tabbatar cewa wasu sojoji sun rasa rayukansu, sai dai basu bayyana adadinsu ba.

    Ƙungiyar IS ta sha amfani da kashe manyan jami'an sojin Najeriya wajen yaɗa farfagandarta.

19. 12 Oktoba 2026Harin Isra'ila a Gaza ya kashe Falasɗinawa biyu

    Hukumomin lafiya a Gaza sun ce wani hari da Isra'ila ta kai ta sama ya kashe aƙalla Falasɗinawa biyu.

    Rundunar sojin Isra'ila ta ce ta kai harin ne kan wasu ƴan bindiga da ke yankin a kudancin Gaza, sai dai ba ta yi ƙarin bayani ba.

    Wannan harin na zuwa ne bayan wani da Isra'ila ta kai a ranar Lahadi kan wani tanti a yankin Mawasi, wanda ya hallaka mutum uku a cewar jami'an lafiya.

    Kamfanin dillancin labarai na Falasɗinu, Wafa, ya ce wani yaro ɗan shekara bakwai ya mutu sakamakon raunin da ya samu bayan jami'an tsaron Isra'ila sun harbe shi a sansanin ƴan gudun hijira na Jabalia da ke arewacin Gaza.

20. 12 Oktoba 2026Masu yin ƙaura daga Djibouti su 139 sun nutse a ruwa a hanyarsu ta zuwa Yemen

    Ofishin da ke kula da masu ƙaura na Majalisar ɗinkin duniya (IOM) ya ce aƙalla masu ƙaura mutum 139 sun mutu, ciki har da yara 15, yayin da ake ci gaba da neman wasu da dama bayan jirgin ruwan da suke ciki ya kife a gaɓar ruwa da ke Djibouti.

    Jirgin ruwan na tafiya ne daga Djibouti zuwa Yeman ɗauke da mutum 305 a lokacin da ya yi hatsari kusa da birnin Obok da ke da tashar jirgin ruwa.

    IOM ya ce an yi nasarar ceto mutum 85 daga cikinsu.

    Shugaban IOM a Djibouti Alexandre Coissac ya ce mummunan iftila'in na ƙara fito da irin hatsarin da masu yin ƙaura ke fuskanta a ƙoƙarinsu na neman sake gina sabuwar rayuwa.

    Dubban masu ƴin ƙaura daga ƙasashen ƙusurwar Afirka ne ka irin wannan tafiya mai cike da hatsari a kowacce shekara, inda suke fatan isa ƙasashen yankin Gulf saboda tsaro ko neman aiki.