IKIBIRIRAHO, Emira Zunze Ubumwe z'Abarabu ziriyamiriza igitero ca Irani ku mato y'igitoro, inyuma y’ibitero bishasha vya Amerika

Amakuru y'ikibiriraho

Bernard Bankukira na Gildas Yihundimpundu

1. Iminota 13 irahezeNacumi Jeneroza batazira ‘Nkoni Yera’ yaraye ashengeye

   Amakuru ava mu muryango wiwe avuga ko umuririmvyikazi w’Umurundikazi, Nacumi Jeneroza, wo mu ntara ya Kirundo ya kera (Butanyerera y'ubu) yasandavye mw’ijoro ryakeye.

   Uno mukenyezi batazira “Nkoni yera” ni we yaririmvye, ubwa mbere - mu 1968 -, uru ruririmbo rwamenyekanye cane Burundi. Azwi mu ndirimbo zitari nke harimwo nka “Amabano y’inka” zagiye zisubirwamwo n’abaririmvyi, ibintu bitamunezereza, nk’uko yabiwiye BBC mu kiganiro yagiranye na we mu mwaka wa 2017.

   Uno mutamakazi yahoze ari umuririmvyi mbere yaririmbiye ku kirimba c’umukuru w’igihugu Michel Micombero ashengeye ku myaka 78.

   Yaba ku mutumba Kavomo uri nko birometero bitatu uvuye ku murwa mukuru wa Kirundo.

2. Haciye amasaha 2Indongozi y’ikirenga ya Irani iri hehe?

   Indongozi y’ikirenga ya Irani Mojtaba Khamenei, ntarigera aboneka na rimwe muri videwo canke ifoto vyemejwe ko ari rwiwe, kuva aho asubiriye se mu ntango za Ntwarante (3).

   Vyagugwa ko yakomerekeye mu gitero cahitanye se wiwe Ali Khamenei ku wa 28 Ruhuhuma (2) ku mugwa mukuru Tehran, igihe Amerika na Israel vyatangura ibitero kuri Irani ku musi wa mbere w’intambara. Ariko rero, ubushikiranganji bw’amagara y’abantu bwa Irani bwarahakanye amakuru yavuga ko yoba yari yakomeretse cane.

   Perezida Donald Trump wa Reta Zunze Ubumwe za Amerika wewe yemeza ko Mojtaba Khamenei “yamaze kuzimangana ku rugero rwa 90 kw’ijana”.

   Gushika ubu, kuva ku wa 8 Ntwarante hagiye hasohoka ubutumwa bwinshi bwanditswe buvugwa ko ari ubwa Mojtaba Khamenei.

   Mu butumwa buheruka bwashizwe ahabona iminsi itatu iheze, Khamenei yahíga ko azohora urupfu rwa se. Mu minsi iheze, bamwe mu bategetsi ba Irani na bo nyene bagiye bavuga amajambo nk’ayo.

   Mojtaba Khamenei ntiyigeze aboneka ku mugaragaro mu birori vyamaze indwi yose vyo gusezera se, vyabaye mu ntango z’uku kwa Mukakaro (7), naho benewabo bitavye ivyo birori.

   Gushika ubu, ikibazo c’ukumenya aho aherereye kiracari ngaho.

   Ariko Israel yari yararahiye irarengwa imbere n’inyuma y’uko Mojtaba Khamenei aba Indongozi y’ikirenga ya Irani, ko izomuhiga kugira ngo imurase.

   Gushika ubu nta n’umwe azi igihe azobonekera ku mugaragaro nimba bizotebabigashika.

   Ayandi makuru hano:

   Trump avuga ko adashobora kwemerera Irani ko 'itera ubwoba' Amerika

   Ubwo ibisasu vya misire vya Irani birashobora gushikira Londres na Paris?

   Ibyo tuzi ku ndege za F-15E zikoreshwa na Amerika zirimo imwe yarasiwe muri Iran

3. Haciye amasaha 3Umugore yagirizwa kwica umugabo wiwe mu Buhindi akoresheje umuti usukura akazu ka surwumwe

   Umugore umwe wo mu gihugu c’Ubuhindi ari mu minwe y’inzego z’umutekano yagirizwa kwica umugabo wiwe afadikanije n’abagabo babiri, mu caha abaporisi bavuga ko carimwo kumuha ibiyayuramutwe, kumukororera hasi avuye ku rubaraza rwo hejuru rw’inzu no kumutera umuti usukura ubwiherero.

   Uragaba: Iyi nkuru irimwo amakuru ashobora guhungabanya canke gutera ubwoba bamwe mu basomyi.

   Komiseri w’igiporisi Suresh Kumar wo mu karere ka Nazimabad, mu ntara ya Telangana, yavuze ko abo bagirizwa ico caha bakekwa ko bakoze uwo mugambi bamaze kubona ko uyo mugabo yari aherutse gutahuka avuye muri Arabia Sawudite, yoshobora kuburabuza imigenderanire y’uwo mukenyezi n’umukunzi wiwe.

   Suresh Kumar yavuze ati: "Twafashe umukenyezi umwe hamwe n’abagabo babiri bagirizwa guha ibiyayuramutwe umugabo w’uwo mukenyezi, kumukororera hasi avuye ku rubaraza rwo hejuru, no kumutera umuti usukura akazu ka surwumwe kugira bamwice".

   Abaporisi bavuga ko abo bagirizwa ico caha bagerageje kwica uwo mugabo incuro zibiri mu masaha 24 imbere y’uko apfa kw’igenekerezo rya 30 Ruheshi (6).

   Nk’uko abaporisi n’umuryango wa nyakwigendera babivuga, Dayani Prashant w’imyaka 36 yari yubakanye na Scindia mu myaka 12 iheze mu mwumvikano hagati y’imiryango. Bari bafise abana babiri b’imyaka icenda n’indwi.

   Imbere y’uko arongorwa, Scindia yari yarize ivy’ubuforomokazi kandi yakora nk’umuforomokazi ku bitaro vy’abigenga mu gisagara ca Nazimabad.

   Abaporisi baracabandanya amatohoza, mu gihe abo bagirizwa ico caha bariko barakurikiranwa ku caha c’ubwicanyi.

   Ayandi makuru hano:

   Ingene uno mugabo yarusimvye igihe yaterwa n'intare yamaze iminota 30 imugumirije hasi

   'Yanteye urushinge rurimo virusi itera SIDA nyuma yo kwanga gushyingiranwa nawe'

   Menya uno mugore wo mu Buhindi yamaze imyaka 25 ari komanda mu nyeshamba mu nyuma akishikana

4. Haciye amasaha 5Ibihugu icenda vya Buraya vyemeranije gushingira hamwe na Ukraine urunani rwo kwivuna misire za 'ballistique'

   Ibihugu icenda vya Buraya aho vyari vyahuriye i Paris mu nama na Ukraine, vyaraye vyemeranije gushinga urunani rwo kwikingira ibisasu vya misire vyo mu bwoko bwa ballistique.

   Nk'uko vyatangajwe n’ibiro vy’Umukuru w’Igihugu c’Ubufaransa Emmanuel Macron, Danemark, Ubufaransa, Ubudagi, Ubutaliyano, Ubuholandi, Norvege, Espagne, Suwede n’Ubwongereza vyemeranije gushingira hamwe na Ukraine urwo runani rusangi.

   Ibiro vy’Umukuru w’Igihugu c’Ubufaransa vyavuze ko ivyo bihugu vyemera ko akaga gaturuka kuri izo misire kariko kariyongera, ko rero biriko birashinga urwo runani rw’ukwivuna kugira ngo ruteze imbere uburyo buhanitse bwo guhangana nazo.

   “Twemera ko hakenewe inyishu rusangi kugira ngo Uburaya bukingirwe neza – uburyo rusangi bwo gukinga no guhangana n’akaga ka misire gashobora kuzoba muri kazoza, buzotegurirwa hamwe, bushingiye ku gusangira ubuhinga no ku gufashanya mu bijanye n’amahinguriro”, ni ko ibi bihugu cumi bivuga mw’itangazo.

   Iri tangazo rivuga kandi ko bazokwigira ku buhinga bwihariye bwa Ukraine, yakuye mu burambe imaze kugira mu ntambara n’Uburusiya.

   Kyiv (ubutegetsi bwa Ukraine) imaze igihe igendera kuri misire zo mu bwoko bwa Patriot z’Abanyamerika mu kwivuna ibisasu vya ballistique vy’Uburusiya, ariko izi misire zakeshe.

   Perezida Volodymyr Zelensky wa Ukraine yashitse i Paris ku wa mbere afise intumbero yo kwihutisha ugufashanya n’ibihugu vya Buraya mu gutsimbataza uburyo bwa Ukraine bwo kwivuna ibitero vyo mu kirere imbere y’igihe c’urushana, igihe c’umwaka Uburusiya busanzwe bwongereza cane ibitero vyabwo kugira ngo Abanya-Ukraine babure umuyagankuba, uburyo bwo gushusha amazu, hamwe n’amazi.

   Yasavye abakuru b’ibihugu bitari bike vya Buraya kuja hamwe mu gutegura ingamba zo guhangana n’ibitero vya misire vy’Uburusiya vyasinzikaje cane Ukraine kandi vyatumye n’ibindi bihugu vya Buraya bigira amakenga ku migambi yagutse ya Moscou (ubutegetsi bw’Uburusiya) kuri uwo mugabane.

5. Haciye amasaha 6Emira Zunze Ubumwe z'Abarabu ziriyamiriza igitero ca Irani ku mato y'igitoro, inyuma y’ibitero bishasha vya Amerika

   Emira Zunze Ubumwe z’Abarabu (UAE) zagirije Irani igitero “c’ubugome” ku mato abiri atwara igitoro mu Muhora wa Hormuz ku wa mbere, gihitana umuntu umwe kinakomeretsa abandi umunani, mu gihe Donald Trump avuga ko Amerika izotoza ikori ringana na 20% ku mizigo yose mu rwego rw’ingingo nshasha yo kuzibiria uno muhora.

   Trump yavuze ko bariko bakubita Irani “bikomeye cane” inyuma y’ibitero vyabaye mw’ijoro rigira gatatu vyikurikiranya, mu gihe ukurasana hagati y’ibi bihugu bibiri kwiyongereye.

   Umushikiranganji wa Irani ajejwe migenderanire yishuye kuri iyi ngingo yo kuzibira uno muhora, avuga ko Tehran ari yo “MURINZI” wawo.

   Imishamirano ishingiye ku kugenzura Umuhora wa Hormuz ishobora kuburabuza utwigoro two guhagarika intambara, nubwo Trump ashimangira ko amasezerano agishoboka.

   Mu gihe rero icuka kibi kuri uno muhora kibandanya ciyongera, Emira Zunze Ubumwe z’Abarabu zavuze nijoro ku wa mbere ko ibisasu vya misire vya Irani vyakubise amato abiri y’ico gihugu yunguruza igitiro, bihitana umwe mu bakozi b’Abahindi bari muri ayo mato vyongera bikomeretsa abandi umunani, muri bo bane bakomeretse cane.

   Muri abo bakomeretse, batandatu bari Abahindi, mu gihe babiri bari Abanya-Ukraine, nk’uko bivugwa n’umushikiranganji wa UAE ajejwe kwivuna abansi mw’itangazo yacishije ku rubuga rwa X.

   Mu nyuma, ishami ry’igisirikare ca Irani rijejwe gukingira ubutegetsi bwa Kisilamu (IRGC) ryemeje ico gitero, mw’itangazo ryacishijwe ku rubuga rwa Telegram. Rivuga ko ayo mato abiri yirengagije igabishwa yahawe, akazimya ubuhinga butuma akurikiranwa kandi akagerageza guca mu nzira yari yatezwemwo ibisasu bitegwa mu mazi.

   Mu kwishura, IRGC yavuze ko yaciye irasa ayo mato maze irayahagarika gukora.

   Yongeye ivuga ko “ugukorana n’umwansi” ata kindi bizovyara atari ukwicuza, guhomba be n’ugucererwa kwugurura uwo muhora, ibi na vyo biteze ingorane y’igitoro kw’isi yose.

   Uno muhora ubandanya kuryanisha Amerika na Irani, aho ejo ku wa mbere impande zompi zateranye ibisasu buri ruhande rurondera kuwugenzura, mu gihe mw’ijoro ryo ku wa Mungu zari zaraye zirarasana.

   Kurikira ayandi makuru ku rubuga rwa Youtube

   Icyo Iran n'Amerika bakura mu masezerano n'impamvu impande zombi zishobora kugorwa no kuyubahiriza

   Kuva ku iyicwa rya Khamenei kugeza ku iterabwoba rya Trump ryo 'gusenya Iran': Ibintu 10 by'ingenzi byabaye mu minsi 100 ya mbere y'intambara

   "Project Freedom" ya Trump mu muhora wa Hormuz ni iki?

   Ibihugu 10 bya mbere bicukura peteroli nyinshi ku isi

6. Haciye amasaha 6Mwaramutse neza!

   Ikaze kuri BBC Gahuzamiryango, aho tubashikiriza amakuru yo mu karere no mu makungu mu buryo bw'aka kanya.