Craig Bellamy i aros fel rheolwr Cymru ar ôl i symudiad Burnley fethu

Bydd Craig Bellamy yn aros fel rheolwr tîm pêl-droed dynion Cymru wedi i'w symudiad arfaethedig i glwb Burnley fethu.

Roedd Burnley wedi cysylltu â Chymdeithas Bêl-droed Cymru ynghylch penodi Bellamy yn olynydd i Scott Parker.

Cafodd Bellamy drafodaethau gyda'r clwb o Sir Gaerhirfryn ond mae'r trafodaethau hynny bellach wedi dod i ben.

Mae Bellamy ar gytundeb gyda Chymru tan 2028 sy'n cynnwys Pencampwriaeth Euro 2028 fydd yn cael ei chynnal yng Nghymru, Lloegr, yr Alban ac Iwerddon.

Roedd BBC Sport wedi datgelu ym mis Ebrill fod Bellamy, sy'n 46 oed, ymhlith y prif ymgeiswyr i gymryd yr awenau yn Turf Moor ar ôl ymadawiad Scott Parker.

Deellir nad oedd y methiant yn ymwneud â thaliad iawndal i Gymdeithas Bêl-droed Cymru.

Credir bod trafodaethau ynghylch aelodau o staff hyfforddi Bellamy wedi bod ymhlith y materion a oedd yn parhau heb eu datrys.

Byddai'r swydd wedi golygu dychweliad i glwb lle bu Bellamy'n aelod o staff hyfforddi Vincent Kompany rhwng 2022 a 2024.

Cafodd Bellamy gyfnod byr fel rheolwr dros dro Burnley ar ôl i Kompany adael i ymuno â Bayern Munich yn haf 2024.

Fe gafodd ei benodi'n rheolwr Cymru ym mis Gorffennaf 2024 ar ôl olynu Rob Page.

Yn ystod ei gyfnod wrth y llyw fe arweiniodd Cymru i ddyrchafiad i Adran A Cynghrair y Cenhedloedd.

Ond roedd hi'n gyfnod mwy heriol yn 2026 wrth i Gymru fethu â chyrraedd Cwpan y Byd wedi colli ar giciau o'r smotyn yn erbyn Bosnia-Herzegovina yn y gemau ail gyfle ym mis Mawrth.

Daeth hynny cyn haf siomedig arall lle methodd Cymru ag ennill mewn pedair gêm yn 2026.

Er gwaethaf y siom honno, roedd Bellamy wedi dweud yn gyhoeddus yn ystod yr haf ei fod yn mwynhau ei waith gyda'r tîm cenedlaethol.

Wrth siarad cyn gemau cyfeillgar Cymru ym mis Mehefin, dywedodd ei fod yn "caru" ei rôl fel rheolwr Cymru.

Mae'r penderfyniad yn golygu y bydd Bellamy yn parhau i arwain Cymru wrth i'r tîm baratoi ar gyfer yr heriau rhyngwladol nesaf.