Anthony Joshua a Tyson Fury i wynebu ei gilydd yng Nghaerdydd

Bydd yr ornest hirddisgwyliedig rhwng Anthony Joshua a Tyson Fury yn digwydd yn Stadiwm Principality, Caerdydd, ar 11 Rhagfyr.

Bydd yr ornest rhwng y ddau gyn-bencampwr pwysau trwm yn cael ei darlledu ar Netflix yn oriau mân y bore, er mwyn denu cynulleidfa yn yr Unol Daleithiau.

Mae disgwyl i filoedd heidio i'r brifddinas ar gyfer y digwyddiad, sydd wedi cael ei disgrifio fel un o'r rhai mwyaf yn hanes bocsio Prydain.

Bydd Joshua a Fury yn wynebu ei gilydd mewn cynhadledd i'r wasg yn Llundain ddydd Mercher, 30 Medi, cyn yr ornest ym mis Rhagfyr.

"Rwy'n ysbrydoli cenhedlaeth," meddai Joshua, sy'n 36 oed, mewn neges ar Instagram, tra nad yw Fury, 38 oed, wedi ymateb yn gyhoeddus eto.

Roedd Stadiwm Wembley yn Llundain a Madison Square Garden yn Efrog Newydd ymhlith y lleoliadau oedd yn cael eu hystyried i gynnal y frwydr, ond cododd anawsterau gyda'r ddau leoliad.

Mae Stadiwm Principality eisoes wedi cynnal nosweithiau bocsio hwyr, gan gynnwys buddugoliaeth Joe Calzaghe dros Mikkel Kessler ym mis Tachwedd 2007, pan ddechreuodd y brif ornest am 01:00.

Mae'r ornest yn nodi'r tro cyntaf i Joshua a Fury wynebu ei gilydd, er bod y ddau wedi bod yn trafod y posibilrwydd o ymladd ers blynyddoedd.

Croesawodd Undeb Rygbi Cymru a Chyngor Caerdydd y newyddion, gan ddweud y bydd y digwyddiad yn atgyfnerthu enw da'r ddinas fel lleoliad digwyddiadau mawr ac yn hwb i'r economi.

Mae angen addasu trwydded y stadiwm er mwyn cynnal digwyddiad yn oriau mân y bore, ond mae'r trefniadau eisoes ar droed ynglŷn â thrafnidiaeth a phlismona'r digwyddiad ar 11 Rhagfyr.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.