Lauren Evans o Hendy i'w hanrhydeddu yn BAFTA Cymru

Bu bron i gyfarwyddwr castio o Hendy, sir Gâr anfon ei newyddion am anrhydedd gan BAFTA Cymru i'r ffolder sothach.

Bydd y cyfarwyddwr castio Lauren Evans, sy'n adnabyddus am ei gwaith ar Sex Education a Lost Boys and Fairies, yn derbyn Gwobr Cyfraniad Arbennig BAFTA Cymru y penwythnos hwn.

Pan gyrhaeddodd e-bost â'r teitl 'Confidential BAFTA' tra'r oedd hi'n y gwaith, meddyliodd Lauren Evans mai neges sothach oedd hi.

"Roeddwn i bron â'i anfon i'r ffolder sothach ac yna fe ddarllenais a meddyliais, 'Oh my good grief!'" meddai wrth Dot Davies ar BBC Radio Wales.

"Doeddwn i ddim yn meddwl ei fod yn wir."

Ond roedd yr e-bost yn un go iawn ac fe fydd hi'n cael ei hanrhydeddu nos Sul. Mae'n cyfaddef ei bod hi'n dal i gael trafferth credu'r newyddion.

"Mae'n dal i deimlo fel rhyw fath o prank," meddai. "Wrth gwrs, dwi'n hynod falch ac yn teimlo'n wirioneddol anrhydeddus. 'Ches i ddim gwobrau nac anrhydeddau wrth dyfu i fyny, felly mae'r peth yn teimlo'n overwhelming iawn, bron fel profiad y tu allan i fy nghorff, mai fi yw'r un sy'n ei dderbyn."

Daw'r wobr yn dilyn ei buddugoliaeth yn y categori castio yng Ngwobrau BAFTA y llynedd am y ffilm I Swear. Fe gipiodd ei haraith syml a gonest galonnau'r gwylwyr.

"Mae llawer o bobl sydd heb fy ngweld ers blynyddoedd yn dweud, 'O, dwyt ti ddim wedi newid'," meddai.

Cafodd Lauren ei magu yn Sir Gaerfyrddin ac aeth i'r ysgol yn Hendy, lle oedd disgyblion yn arfer edrych ar lun o'r cyn-gricedwr dros Loegr a Morgannwg, Robert Croft, un o gyn-ddisgyblion enwocaf yr ysgol.

"Roedden ni'n dweud, 'Oh my god, mae e mor enwog'," meddai gan chwerthin.

Mae'n cofio ei gyfarfod pan fu hi'n gweithio yn y Farmer's Arms ym Mhontardawe.

"Mae cael fy nghrybwyll yn yr un anadl ag e'n teimlo'n hollol ryfedd."

Mae ei gwaith castio yn cynnwys cyfres Netflix Sex Education, a lansiodd yrfaoedd nifer o actorion anhysbys ar y pryd fel Emma Mackey, Aimee Lou Wood a Ncuti Gatwa, a Lost Boys and Fairies, sef ei hunig brosiect dwyieithog hyd yma. Dywedodd fod gan y prosiect hwnnw "ystyr mor bwysig".

"Dw i wedi dysgu i chwilio am brosiectau sy'n dweud rhywbeth ac sy'n sbarduno trafodaeth am rywbeth gwirioneddol ystyrlon," meddai.

"Dw i fwyaf balch o'r gwaith sy'n ysgogi trafodaeth am gynhwysiant a goddefgarwch."

Yn ddiweddar bu'n gweithio ar ffilm I Swear, ac mae hi bellach yn gorffen prosiect sy'n seiliedig ar straeon oedolion Roald Dahl. Mae'r cast yn cynnwys Imelda Staunton, Toby Jones a Nicola Coughlan.

Mae hi hefyd newydd weithio gyda Ruth Jones a Steve Speirs ar gyfres y BBC, Better Later, ac mae hi bellach yn castio cyfres nesaf Ruth Jones a James Corden.

I unrhyw un sy'n gobeithio dilyn ei llwybr i fyd castio, mae ei chyngor yn syml: cael troed yn y drws.

"Os ydych chi'n ddigon ffodus i gael swydd mewn swyddfa gastio, a dod o hyd i le sefydlog a diogel i weithio, gallwch gael yr hyfforddiant gorau posibl," meddai.

Ychwanegodd fod llawer o'r diwydiant yn dibynnu ar lafar gwlad, a bod cyrsiau fel diploma castio'r National Film and Television School yn gallu bod o gymorth mawr.

O ran araith dderbyn eleni, nid yw wedi'i hysgrifennu eto. "Dydw i ddim yn gwybod beth i'w ddweud."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.