'Fy nghariad - merch Jonathan Ross - yn dysgu Cymraeg ac mae ei chof hi'n bonkers'

Mae'r cynhyrchydd fideo Gav Murphy wedi sôn sut mae ei gariad Honey Ross, sy'n ferch i'r cyflwynydd teledu Jonathan Ross, yn dysgu Cymraeg.

Dywedodd ei bod yn defnyddio Duolingo a bod ganddi gof "anhygoel" a'i fod yn ei hannog i ymarfer siarad yr iaith gyda Coco eu ci.

Dywedodd y Cymro ei fod wedi cyfarfod â Honey drwy Instagram yn wreiddiol ond bod eu diddordeb mawr mewn ffilmiau wedi arwain at y ddau'n cyd-dynnu o fewn dim.

"Aethon ni mas am, wel un drink oedd e fod, ac wedyn wnaeth hwnna troi mewn i fel chwe pheint," meddai Gav Murphy ar raglen Beti a'i Phobol ar BBC Radio Cymru.

"Roedd y ddau o'n ni'n siarad at ein gilydd am pa ffilm o'n i'n lyfio, a stwff fel yna, a fi'n meddwl rili nes i gwympo mewn cariad y noson yna.

"O'n i jyst yn siarad am ffilmiau am chwech neu saith awr, ac wedyn ni heb stopio siarad am ffilmiau ers hynny."

Dywedodd ei fod yn siarad yn aml am Gymru gyda theulu Honey a bod ei gariad bellach yn dysgu'r iaith drwy'r ap Duolingo.

"Ma' hi'n rili da achos ma' hi mor glyfar a ma' gyda hi memory yma – ma' cof hi'n bonkers," meddai. "Fi'n anghofio stwff trwy'r amser ond mae ei chof hi a'r ffordd mae hi'n dod i adnabod stwff Cymraeg, ma' hi mor dda."

Gyda'r ddau yn byw yn Llundain mae'r cyfle i ymarfer yn brin heblaw am yr ap ond mae Gav yn ceisio ei annog i sgwrsio 'efo'u ci.

Meddai: "Does dim hyder 'efo hi mewn siarad e. Ond achos fi'n siarad Cymraeg 'efo Coco fi'n trio cael hi i siarad Cymraeg 'efo Coco: 'Well, if you speak Welsh with Coco, she's not going to tell you if you're wrong'.

"So dyna'r ffordd dwi'n meddwl dyle hi ymarfer."

Mae Gav Murphy yn wreiddiol o Gaerffili a graddiodd mewn astudiaethau Ffilm a Theledu o Brifysgol Aberystwyth yn 2007.

Ers blynyddoedd mae'n byw yn Llundain lle mae wedi bod yn gweithio fel cynhyrchydd cynnwys a chyflwynydd fideos, podlediadau ac adolygydd gemau a ffilmiau.

Mae o bellach yn un o wynebau mwyaf adnabyddus sianel RKG, wnaeth o ei gyd-sefydlu yn 2019.

Honey Ross ydi'r ieuengaf o dri o blant Jonathan Ross a'i wraig Jane Goldman a chafodd ei magu yn Hampstead yng ngogledd Llundain.

Mae hi'n adnabyddus am fod yn ymgyrchydd ffeministaidd sy'n galw am barch i fenywod waeth beth yw eu maint, siâp a lliw eu croen.

Roedd hi'n un o sylfaenwyr mudiad Pinc Protest yn 2017 wnaeth ymgyrchu dros hawliau merched, gan gynnwys cael cefnogaeth ariannol gan lywodraeth y DU i fynd i'r afael â thlodi mislif.

"Wnaeth hi ddechrau gwneud hynny pan roedd hi'n rili ifanc a dwi'n meddwl oedd hi ddim yn sylweddoli pa mor full time oedd hwnna," meddai Gav.

"Mae hi wedi newid deddfau. Roedd hi'n 'neud eitha' lot o stwff feminism, ac roedd hi'n 'neud stwff yma 'efo cwpl o fenywod eraill, ac oedd nhw'n literally newid laws amdano fe.

"Roedd hi mor dda yn 'neud stwff ond mae'n cymryd shwt gymaint o amser, ac mae'n cymryd shwt gymaint o'ch bywyd chi."

Ers cyfarfod Honey Ross, mae Gav Murphy wedi dod i adnabod ei theulu ac yn dod ymlaen gyda'i thad gan fod y ddau yn "professional silly-billies", meddai, ac yn hoff o chwerthin.

Fel un o gyflwynwyr teledu mwyaf adnabyddus Prydain ers degawdau, mae Jonathan Ross wedi cyfarfod nifer o bobl enwog a Gav wrth ei fodd yn clywed ei straeon.

Meddai: "Os ydyn ni'n watchad ffilms neu rywbeth fel yna fi wastad yn gofyn wrtho fo am Anthony Hopkins, Tom Jones a phobl Cymraeg a stwff fel yna.

"Mae fe wedi cwrdd â phawb ac mae 'da fe storis am bawb, a fi eisiau clywed nhw."

Gallwch wrando ar gyfweliad llawn Gav Murphy ar Beti a'i Phobol am 18:00 ar 4 Hydref neu ar BBC Sounds.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.