Stephen Kinnock i olynu Jo Stevens fel Ysgrifennydd Cymru

Aelod Seneddol Aberafan Maesteg, Stephen Kinnock yw Ysgrifennydd Gwladol newydd Cymru ar ôl iddo gael ei ddyrchafu i'r cabinet gan Andy Burnham.

Bydd Mr Kinnock, a fu'n weinidog iechyd yn llywodraeth Lafur y DU, yn cymryd lle Jo Stevens, Aelod Seneddol Dwyrain Caerdydd.

Mae Aelod Seneddol y Rhondda, Chris Bryant, hefyd wedi cael ei ddyrchafu i rôl newydd fel Ysgrifennydd Gwladol Gogledd Iwerddon.

Daw wrth i Brif Weinidog newydd y DU, Andy Burnham, ddewis ei dîm llywodraethol newydd.

Cafodd Stephen Kinnock ei eni yn Nhredegar ac mae'n fab i gyn-arweinydd y blaid Lafur, Neil Kinnock a'r cyn-Aelod o Senedd Ewrop, Glenys Kinnock.

Mae ganddo ddau o blant gyda chyn-Brif Weinidog Denmarc, Helle Thorning-Schmidt.

Cafodd Mr Kinnock ei ethol i gynrychioli Aberafan yn etholiad cyffredinol 2015 cyn i Syr Keir Starmer ei benodi'n weinidog iechyd ar gyfer Lloegr pan ddaeth Llafur i rym yn San Steffan yn 2024.

Roedd Mr Kinnock yn cynrychioli etholaeth Aberafan Maesteg, a oedd wedi cael enw newydd erbyn hynny.

Ymhlith yr enwau eraill yng ngharfan newydd Andy Burnham mae Aelod Seneddol Bro Morgannwg, Kanishka Narayan - sydd wedi cael dyrchafiad i fod yn Weinidog Deallusrwydd Artiffisial.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.