Ymwelwyr iechyd Cwm Taf Morgannwg yn addo parhau â'u streic

Dri mis ers dechrau streic, mae ymwelwyr iechyd ym Mwrdd Iechyd Cwm Taf Morgannwg wedi addo parhau â'u brwydr.

Mae aelodau undeb Unite yn y bwrdd iechyd wedi bod ar streic ers mis Chwefror oherwydd anghydfod cyflog.

Maen nhw'n dweud nad ydyn nhw'n cael eu talu ar y radd gywir a'u bod ar eu colled gymaint â £9,000 y flwyddyn.

Wrth annerch llinell biced ger swyddfa'r bwrdd iechyd fore Mawrth, dywedodd ysgrifennydd cyffredinol Unite, Sharon Graham, mai ar y bwrdd iechyd mae'r bai.

Ond ychwanegodd ei bod yn gobeithio y gallai llywodraeth newydd Cymru helpu i ddatrys yr anghydfod.

"Mae gyda chi swyddogion fan hyn sy'n gwrthod yr asesiad annibynnol o swyddi'r ymwelwyr iechyd, a'r hyn sydd angen nawr yw bod y llywodraeth yn ymyrryd a gwneud yn siŵr bod y gweithwyr hyn yn cael eu trin yn iawn," meddai Ms Graham.

Dywedodd Paul Mears, prif weithredwr Bwrdd Iechyd Cwm Taf Morgannwg: "Mae ymwelwyr iechyd yn darparu gwasanaeth hanfodol i blant a theuluoedd ar draws ein cymunedau.

"Rydym yn gwerthfawrogi'n fawr yr arbenigedd a'r ymrwymiad y maent yn eu dangos bob dydd."

Tra'n cydnabod bod safonau a chymwysterau proffesiynol ymwelwyr iechyd wedi esblygu dros amser, mae'r bwrdd iechyd yn mynnu nad mater iddyn nhw fel bwrdd iechyd unigol yw newid band cyflog.

"Mae'r bwrdd iechyd yn parhau i fod yn ymrwymedig i ddeialog adeiladol, dwyffordd gyda chynrychiolwyr undebau llafur ac wedi parhau trwy gydol yr anghydfod hwn i ymgysylltu trwy ACAS i geisio datrysiad.

"Ein blaenoriaeth yw parhau i ddarparu gwasanaethau ymwelwyr iechyd diogel i'r rhai yn ein cymunedau sydd ei angen fwyaf."

Mae Elina Watkins o Bontypridd yn un o'r ymwelwyr iechyd sydd wedi bod ar streic ers ganol Chwefror.

"Dy'n ni ddim yn mynd 'nôl - ni'n sefyll yn gryf gyda'n gilydd, ni'n mynd i weld hyn trwyddo tan y diwedd," meddai.

Maen nhw'n gobeithio y bydd y llywodraeth newydd yn gallu helpu i ddatrys yr anghydfod.

"Ni'n gobeithio bydd Rhun ap Iorwerth a'i dîm yn dod at ei gilydd i helpu ni fynd 'nôl i'r gwaith i helpu teuluoedd lleol. Ni jyst eisiau mynd 'nôl i'r gwaith," meddai Ms Watkins.

"Ni ddim eisiau bod yn sefyll fan hyn - ni eisiau bod gyda'r teuluoedd yn gwneud y gwaith ry'n ni'n caru, a'r bwrdd iechyd lleol sy'n gallu gwneud i hynna ddigwydd."

Dywedodd Llywodraeth Cymru fod y gweinidog iechyd wedi trafod y sefyllfa gyda chadeirydd y bwrdd iechyd.

"Mae hwn yn anghydfod lleol rhwng y bwrdd iechyd ac Unite," meddai'r llywodraeth.

"Mae [y gweinidog] wedi annog y ddwy ochr i ddod yn ôl o amgylch y bwrdd i ddod o hyd i ateb i'r anghydfod."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.