Fyddech chi'n hoffi'r cyfle i weithio i wasanaeth arlein BBC Cymru Fyw, neu'n nabod rhywun fyddai â diddordeb?

Mae tair swydd wahanol yn cael eu hysbysebu. Cliciwch ar y dolenni isod am fanylion...

>> Cynhyrchydd Cynnwys (Cyfryngau Cymdeithasol)

>> Cynhyrchydd Cynnwys (BBC Cymru Fyw)

>> Newyddiadurwr/wraig (Cyfryngau Cymdeithasol)

Plîs nodwch y dyddiad cau - sef hanner nos, nos Lun 12/02/18.

BBC Cymru Fyw yw prif wasanaeth ar-lein Cymraeg y BBC, sy’n adlewyrchu’r diweddaraf am Gymru, a hynny yn Gymraeg. Mae Cymru Fyw ar gael ar wefan bbc.co.uk/cymrufyw, a hefyd ar ap, ac mae gennym gyfrifon Facebook a Twitter. 

Pob lwc!

Pan lansiwyd Cymru Fyw dros dair blynedd nôl yn haf 2014, y bwriad oedd creu gwasanaeth ar-lein uchelgeisiol a pherthnasol yn y Gymraeg. Roedden ni’n gobeithio y byddai Cymru Fyw yn ateb y galw am wasanaeth ar-lein gan BBC Cymru fyddai’n adlewyrchu'r hyn sy’n digwydd yng Nghymru heddiw, yn cael ei ddiweddaru’n gyson ac yn unigryw i’r Gymraeg.

Mewn tair blynedd, mae nifer ein defnyddwyr unigryw – sef y nifer o ddefnyddwyr gwahanol sy’n defnyddio’r gwasanaeth – wedi codi o 10,000 i dros 40,000 bob wythnos. Mae lefelau gwerthfawrogiad ein defnyddwyr o’r gwasanaeth wedi codi. Mae Cymru Fyw ar gael, nid yn unig ar y wefan bbc.co.uk/cymrufyw, ond hefyd ar ffurf ap (ap Cymraeg cyntaf y BBC) a thrwy ap BBC News, ac mae gennym gyfrifon Facebook a Twitter. Mae’r gwasanaeth wedi tyfu ac esblygu yn aruthrol yn y blynyddoedd cyntaf.

Mae’r tirlun digidol wedi newid yn sylweddol mewn tair blynedd, ac yn parhau i wneud, ac mae’n bwysig bod Cymru Fyw yn ddigon hyblyg ac ystwyth i ymateb i hyn. Wrth adolygu ac ystyried ble ddylai Cymru Fyw fynd nesaf, ac er mwyn ymateb i’r gofynion gwahanol sy’n codi, rydym wedi penderfynu newid ychydig ar ein pwyslais golygyddol.

Un o nodweddion Cymru Fyw oedd y ‘llif byw dyddiol’ - diweddariadau byr oedd yn cynnwys pytiau o newyddion, gwybodaeth a dolenni i wefannau allanol, ac yn cael ei ddiweddaru rhwng 0800-1800 o ddydd Llun i ddydd Gwener. Dros amser, rydym wedi gweld bod y defnydd o’r llif byw ar ei uchaf ar achlysuron penodol e.e. pan fo stori newyddion fawr yn torri ac yn datblygu, neu o ddigwyddiadau fel yr Eisteddfod neu’r Sioe Fawr. Rydym wedi penderfynu felly i ganolbwyntio ar gynnal llif byw yn ystod y cyfnodau yma, yn hytrach na’i gynnal bob dydd o’r wythnos.

Mi fydd hyn yn ein caniatáu i ddatblygu elfennau eraill o’r gwasanaeth. Er enghraifft, rydym yn awyddus i gryfhau ein gallu i ddatblygu straeon newyddion gwreiddiol a chyhoeddi darnau nodwedd unigryw yn ein hadran Cylchgrawn. Byddwn hefyd yn creu mwy o gynnwys ffurf fer fel fideos a graffeg, a rhoi mwy o ymdrech i gyfryngau cymdeithasol er mwyn cyrraedd cynulleidfaoedd newydd. Rydym hefyd yn dechrau cyhoeddi mwy o gynnwys lleol sydd yn eistedd yn ein hadrannau rhanbarthol yn y Gogledd-orllewin, Gogledd-ddwyrain, Canolbarth, De-orllewin, De-ddwyrain.

Un o elfennau’r llif byw dyddiol oedd ein bod yn cynnig dolenni i gynnwys ar-lein am Gymru tu hwnt i wefan y BBC, ac mae hyn yn parhau yn nod i ni fel gwasanaeth. Rydym yn arbrofi gyda ffyrdd newydd o allu gwneud hyn er mwyn parhau i dynnu sylw ein defnyddwyr i’r cyfoeth o gynnwys sydd ar gael ar-lein yn y Gymraeg.

Wrth gwrs, os ydy Cymru Fyw yn mynd i lwyddo, mae gofyn iddo barhau i esblygu ac ymateb i’r newidiadau o’n cwmpas. Rydan ni bob amser yn awyddus i glywed gennych chi am unrhyw syniadau neu sylwadau am ddarpariaeth Cymru Fyw a sut allwn ni ei wella. E-bostiwch cymrufyw@bbc.co.uk.

Diolch am ddod gyda ni ar hyd y siwrne hyd yma... gobeithio byddwch chi’n aros efo ni yn ystod cymal nesaf y daith!

Dros yr wythnosau nesaf, fe welwch chi nifer o newidiadau i wefannau Cymraeg y BBC wrth i ni ffarwelio â Newyddion Ar-lein a chroesawu'r gwasanaeth newydd BBC Cymru Fyw.

Fel mae Huw Meredydd Roberts wedi blogio, ac fel yr addawyd llynedd, bydd y gwasanaeth newydd yn cyfuno newyddion a nifer o elfennau eraill.

Bydd yr elfennau newydd yn ymddangos yn raddol dros gyfnod o wythnosau, ac ar y dechrau, dim ond pobl sy'n dewis defnyddio fersiwn beta o wefan BBC Cymru Fyw fydd yn gweld y newidiadau.

Yn y pen draw bydd y wefan yn un gyfangwbl ymatebol (responsive) - gyda dyluniad sy'n gweithio lawn cystal ta beth yw maint y sgrîn rydych chi'n ei defnyddio – ffôn, tabled, neu sgrin fwy.

BBC Cymru Fyw

Mae’n ddiwrnod pwysig i BBC Cymru. Heddiw, 22 Ebrill 2014, mi rydan ni’n cymryd cam pwysig ymlaen wrth sefydlu gwasanaeth ar-lein Cymraeg newydd.

Mae’r misoedd diwethaf wedi bod yn rhai prysur i ni – nid yn unig yn cyhoeddi cynnwys ar wefannau’r BBC wrth gwrs – ond yn ymchwilio, yn dadansoddi, yn crafu pen ac, yn fwyaf pwysig, yn gwrando.

O’r sylwadau a’r adborth rydan ni wedi eu derbyn, fe ddaeth yn glir bod ‘na alw am wasanaeth ar-lein gan BBC Cymru sydd yn unigryw i’r Gymraeg, yn adlewyrchu yr hyn sy’n digwydd yng Nghymru heddiw ac yn cael ei ddiweddaru’n gyson.

Rwy’n falch i ddweud ein bod ni erbyn hyn yn barod i wthio’r cwch i’r dŵr... Croeso felly i BBC Cymru Fyw.

BBC Cymru Fyw

Dathliadau BBC Cymru yn 50

Mae'r hanner canrif ddiwethaf ers sefydlu BBC Cymru wedi bod yn gyfnod o newid mawr yn wleidyddol a chymdeithasol.  Dyfan Powel, myfyriwr ymchwil yn adran Gwleidyddiaeth Ryngwladol, Prifysgol Aberystwyth sydd wedi bod yn bwrw golwg ar rai o'r datblygiadau mwyaf.      

Arwisgo Siarl yn Dywysog Cymru

Elin Mai o gwmni Styledoctors yn Llundain sydd yn bwrw golwg ysgafn, bachog, dros wisgoedd rhai o'r pobl sydd wedi ymddangos ar rai o raglenni BBC Cymru/Wales dros y 50 mlynedd ddiwethaf.

Oedd Magi Post bron efelychu Twiggy? Ai aelodau Cymdeithas yr Iaith oedd y protestwyr smarta yn y byd?

Mae'r atebion i gyd yma! Darllenwch ymlaen.

Pobol y Cwm 1975 

Ers sefydlu BBC Cymru yn 1964 mae'r gwasanaeth newyddion wedi hen ennill ei blwy.  Y newyddiadurwr Lyn Ebenezer sy'n rhannu ei brofiad personol am un o straeon mawr yr hanner can mlynedd diwethaf.

Gyda’r Swyddfa Dywydd yn rhybuddio am stormydd mawr ddiwedd mis Hydref ai cyd-ddigwyddiad yw hi bod un o gorwyntoedd gwaethaf Prydain wedi digwydd yng Nghymru union 100 mlynedd yn ôl?

Ar Hydref 27 1913, fe ‘sgubodd corwynt drwy ardal Cwm Taf yn ne Cymru gan achosi difrod enfawr a lladd tri o bobl.

Mae’r lluniau yma yn dangos maint y difrod yn ardal Trefforest, Cilfynydd, Abercynon ac Edwardsville. Diolch i Archifau Morgannwg a gwefan Old Merthyr Tydfil am ganiatâd i’w dangos.

Digwyddodd cwta bythefnos ar ôl y ffrwydriad enfawr yng nglofa Senghennydd ac felly roedd nifer o ffotograffwyr yn dal yn ne Cymru wrth law i gofnodi’r llanast.

Ewch i wefan Wales Online i weld mwy o luniau, a darllen hanes prosiect ym Merthyr i greu archif ar-lein o luniau a straeon pobl leol o’r digwyddiad.

Ond nid dyma’r unig storm enwog ym mis Hydref: roedd llongddrylliad yr Hindlea mewn storm arswydus oddi ar arfordir Môn ar yr un dyddiad, Hydref 27, yn 1959 a suddodd y Royal Charter mewn storm debyg union 100 mlynedd cyn hynny, ac yn yr un lle, ar Hydref 26 1859.

Os ewch chi i Landudno y penwythnos yma (Medi 20-22) a gweld y lle yn edrych yn fwy Fictorianiadd na’r arfer, peidiwch a phoeni, dydych chi heb gamu nôl mewn amser, ond yn hytrach wedi dod o hyd i un o amryw ddigwyddiadau LLAWN01.

Cerbyd ymdrochi

Mae BBC Cymru Wales heddiw wedi cyhoeddi buddsoddiad newydd sylweddol yn eu gwasanaethau digidol ar-lein yn Gymraeg gyda chynlluniau i ddatblygu gwasanaeth newydd o'r enw Cymru Fyw.

Bydd y gwasanaeth, fydd yn dechrau fel cynllun peilot am ddwy flynedd, ar gael ar bob llwyfan - cyfrifiaduron desg, ffônau symudol a thabledi - a bydd yn cyfuno newyddion byw a nifer o elfennau eraill. Prif nodweddion Cymru Fyw fydd:

• y straeon newyddion diweddaraf ar draws Cymru
• ffrwd blog byw gyda’r manylion diweddaraf am newyddion o Gymru, chwaraeon, y celfyddydau, diwylliant poblogaidd, gwleidyddiaeth a thywydd, yn ogystal â llwyfan i ryngweithio gyda defnyddwyr trwy gyfryngau cymdeithasol
• porth i'r cynnwys ar-lein gorau yn Gymraeg gan gyflenwyr eraill - gan ddefnyddio pŵer brand y BBC i helpu defnyddwyr i ddod o hyd i gynnwys perthnasol ar draws y rhyngrwyd
• eitemau nodwedd ac erthyglau barn
• llwyfan ar gyfer pob gwasanaeth byw a chyfredol ar-lein arall sydd ar gael yn Gymraeg gan y BBC, e.e. BBC Radio Cymru, BBC iPlayer, Democratiaeth Fyw, Tywydd a Theithio

Bydd Cymru Fyw yn cael ei ddatblygu a’i lansio dros y misoedd nesaf, a bydd y BBC yn cryfhau’r tîm sy’n gweithio yn yr iaith Gymraeg, gan greu chwech o swyddi ychwanegol.

Dywedodd Sian Gwynedd, Pennaeth Rhaglenni a Gwasanaethau Cymraeg BBC Cymru Wales, mai bwriad y datblygiad yw ehangu apêl a chyrhaeddiad gwasanaethau Cymraeg ar-lein:

“Mae'n rhaid i wasanaethau ar-lein, rhyngweithiol yn Gymraeg gystadlu gyda chyfryngau byd-eang, a dyna un o'r heriau mwyaf sylweddol sy'n wynebu'r iaith. Er ein bod yn darparu rhai o’r gwefannau mwyaf poblogaidd yn Gymraeg ers nifer o flynyddoedd, rydyn ni eisiau creu mwy o argraff ar ein cynulleidfa,” meddai Sian.

“Yn ystod y flwyddyn ddiwethaf mae nifer y defnyddwyr sy’n defnyddio gwefannau Cymraeg y BBC wedi cynyddu dros 50% - ond rydyn ni’n hyderus bod yna le i dyfu ymhellach wrth i’r defnydd o ffônau symudol a thabledi gynyddu. Rydym yn awyddus i adeiladu ar y llwyddiant hyd yma er mwyn cyrraedd 50,000 o ddefnyddwyr unigryw bob wythnos.

"Mae Cymru Fyw yn fuddsoddiad cyffrous a sylweddol mewn gwasanaeth ar-lein yn Gymraeg a bydd yn cynnig darpariaeth mwy amserol ac unigryw i ddefnyddwyr. Mae angen i ni gydweithio gyda chyhoeddwyr ar-lein eraill yn y Gymraeg er mwyn sicrhau ein bod yn creu mwy o argraff. Bydd Cymru Fyw yn helpu defnyddwyr i wneud y gorau o’r cynnwys sydd ar gael yn yr iaith Gymraeg, ac adnoddau eraill sy'n berthnasol iddynt, ar draws y rhyngrwyd."

Yn dilyn adolygiad o’r gwasanaethau digidol yn Gymraeg dros y flwyddyn ddiwethaf, mae’r BBC hefyd wedi penderfynu canolbwyntio’r buddsoddiad newydd ar bump maes fydd yn cael blaenoriaeth ar gyfer datblygiad rhyngweithiol/ar-lein. Yn ogystal â’r elfennau a restrwyd uchod ar gyfer Cymru Fyw ceir:

• BBC Radio Cymru ar-lein - sy'n cynnig cynnwys am wasanaeth BBC Radio Cymru, fel gwybodaeth am raglenni, blogiau a chlipiau, yn ogystal â'r gallu trwy BBC iPlayer Radio i wrando yn fyw ac i wrando nôl ar raglenni o'r 7 diwrnod diwethaf
• BBC iPlayer - mae rhaglenni teledu Cymraeg BBC Cymru Wales ar S4C ar gael ar BBC iPlayer
• Dysgu - mae hwn yn cynnwys yr holl adnoddau dysgu yn Gymraeg, e.e. BBC Bitesize, yn ogystal â chynnwys dysgu arall yn Gymraeg
• CBeebies - rydym wedi bod yn gweithio gyda CBeebies i ddatblygu cynnwys iaith Gymraeg o amgylch brandiau allweddol y sianel fel Tree Fu Tom, ynghyd â 16 o gemau yn y Gymraeg ar gyfer ystod ehangach o sioeau megis Numtums, Timmy Time, Nina and the Neurons, Everthing’s Rosie, Kerwhizz a Driver Dan ac rydym yn bwriadu datblygu cynnwys newydd yn y dyfodol.

"Unwaith mae gen i berthynas efo'r person, dwi'n tynnu lluniau gwell," meddai’r ffotograffydd Tom Griffiths sydd yn arddangos ei luniau o Batagonia ar hyn o bryd ar ôl byw yno am bron i chwe blynedd.

Rydyn ni’n gyfarwydd â gweld delweddau o olygfeydd a phobl Patagonia erbyn hyn. O Dai Jones Llanilar i Gruff a Matthew Rhys, ac o 4Wal i ffilm Marc Evans, rydyn ni wedi gweld dipyn o gymuned Gymraeg y Wladfa ar y teledu.

Don Perez Williams gan Tom Griffiths

Ydych chi wedi ymweld â’n gwefan Darganfod eto?

Darganfod yw cartref newydd cynnwys gwybodaeth a dysgu BBC Cymru, sy’n cynnwys hanes, gwyddoniaeth, celfyddydau, yr iaith Gymraeg a llawer mwy.

Mae’n ran o gynllun ar draws y BBC sy’n clymu cynnwys ffeithiol a dysgu at ei gilydd i greu siwrne ddysgu llyfn, syml a hwyliog.

Fel rhan o’r prosiect yma, mae yna hafan newydd ar gyfer cynnwys dysgu’r BBC. Mae hwn yn cynnwys adnoddau fel ‘Class Clips’, sy’n chwilio am glipiau archif a diweddar o raglenni cyffredinol y BBC, a chynnwys dysgu fel ‘Bitesize’.

Mi fydd y system yma yn cael ei datblygu yn fuan i alluogi chwilio yn ieithoedd cynhenid y DU yn cynnwys Cymraeg ond, yn y cyfamser, gallwch chi ddal i ddefnyddio Clipiau i Athrawon.

Gallwch ddarllen mwy am y prosiect yma ar ddarn blog Chris Sizemore sef golygydd gweithredol Knowledge & Learning (Saesneg).

Rydw i’n siwr bod nifer ohonoch chi’n gwybod am y Queen Vic a’r Rovers Return. Maen nhw wedi bod yn rhan gyfarwydd o’n bywydau ers degawdau.

Yng Nghymru, mae ganddon ni Y Deri, y dafarn lle mae trigolion pentref dychmygol Cwmderi wedi bod yn dathlu genedigaethau, marwolaethau a phriodasau ers bron i 40 mlynedd.

Pobol y Cwm yw opera sebon fwyaf hirhoedlog y BBC ar deledu ac mae’n cael ei chynhyrchu yn stiwdios drama Porth y Rhath yng Nghaerdydd a’i darlledu ar S4C.

Mae gan y gyfres ei dilynwyr ffyddlon ond fel nifer o raglenni sefydledig eraill, un her sy’n wynebu Pobol y Cwm ydy sut i ddenu cynulleidfa ifanc tra’n sicrhau bod y gynulleidfa graidd yn hapus hefyd.

Felly, dros y misoedd diwethaf rydw i wedi bod yn brysur yn sefydlu PYC, sef rhaglen ychwanegol i Pobol y Cwm sy’n canolbwyntio ar fywydau rhai o aelodau iau y cast ac yn cyflwyno rhai aelodau newydd hefyd.

Mae hyn wedi bod yn dipyn o her ac efallai mai elfen fwyaf cynhyrfus y prosiect yw mai dyma’r prosiect aml-blatfform cyntaf o’i fath yn yr iaith Gymraeg. Yn hynny o beth, mae wir yn teimlo fel petai Pobol y Cwm, y BBC ac S4C yn gallu cynnig rhywbeth gwirioneddol arloesol i’w cynulleidfa Cymraeg eu hiaith.

Mae PyC wedi rhoi cyfle gwych i’r BBC ac S4C weithio gyda’i gilydd gan ddefnyddio gwahanol dechnegau dweud stori i geisio ennyn diddordeb ein cynulleidfaoedd mewn ffordd newydd. Mae PyC yn dangos ochr mwy pigog, rhywiol Cwmderi.

Mae’n para dros bum pennod sy’n cael eu dangos bob nos rhwng 8fed a’r 12fed o Ebrill.

Bydd y penodau, sy’n cael eu darlledu ar ôl 9pm, yn cael eu dangos ar wefan newydd a fydd hefyd yn galluogi’r gwylwyr i ddod i adnabod y cymeriadau a’r tîm creadigol yn well.

Mae’r wefan wedi ei chynllunio mewn ffordd sy’n caniatáu i bobl sy’n dilyn y gyfres ar eu dyfeisiadau symudol gael profiad sydd llawn cystal â’r rhai sy’n gwylio adref ar eu cyfrifiaduron.

Fel y mwyafrir o bobl ifanc, mae cymeriadau PyC yn gwneud defnydd helaeth o gyfryngau cymdeithasol.

Gallwch sgwrsio, dadlau a fflyrtio gyda’r cymeriadau ar Facebook a Twitter ond, yn bwysicach fyth, mae natur aml-blatffordd y prosiect yn golygu fod llawer o’r stori yn datblygu ar y platfformau hyn hefyd.

Rydw i’n gobeithio y bydd y gwylwyr yn ymgolli’n llwyr ym myd y stori a pho fwyaf o ran y byddan nhw’n ei gymryd yn y prosiect, po fwyaf y byddwn ni’n gallu gwthio’r naratif i gyfeiriadau gwahanol.

Er hynny, gwyddom hefyd na fydd pawb eisiau profiad hollol interactif ac felly mae’r stori’n datblygu dros gyfnod o bum pennod mewn ffordd mwy arferol hefyd.

Rydyn ni’n gobeithio y bydd PyC yn dod â chynulleidfa newydd i Pobol y Cwm ond hefyd yn gobeithio y bydd yn rhoi cyfle i’n cynulleidfa bresennol brofi ochr o Gwmderi nad ydyn nhw fel arfer yn medru ei gweld yn ystod y bennod nosweithiol arferol am 8pm.

Felly, os cewch chi gyfle, cymerwch gip ar y wefan - s4c.co.uk/pyc/

Hannah Thomas, Cynhyrchydd PyC

@s4cPyC

Facebook

Heddiw, mae’n ganmlwyddiant ers geni’r bardd Cymraeg RS Thomas.

I nodi’r achlysur, mewn darn arbennig ar y gyfer y wefan hon, mae cyn Archesgob Caergaint a chyn Archesgob Cymru, Dr Rowan Williams, yn ysgrifennu am rai o’r themâu yng ngherddi RS Thomas - ffydd a Chymreictod, ei angerdd a’i duedd o ddadlau ag ef ei hun. Ar Radio Cymru am 6 o’r gloch nos Wener, bydd rhaglen arbennig gyda Dylan Iorwerth yn nodi’r canmlwyddiant, a dydd Sul am 10am bydd cyfle i glywed yr ail ran o raglen arbennig Beti a’i Phobol a ddarlledwyd gyntaf nôl yn 1996. Gallwch glywed y rhan gyntaf, a ddarlledwyd dydd Iau, fan hyn.

Mae dathliadau i nodi’r canmlwyddiant yn digwydd trwy gydol y flwyddyn, ac mae manylion y digwyddiadau a’r prosiectau i’w cael ar wefan RS Thomas 2013.