Ers clywed 'Nos Somnia' am y tro cyntaf, mae harmonia hyfryd, curiadau hudolus a synau hiraethus Violas wedi dod yn dipyn o ffefryne gen i, felly difyr iawn oedd clywed fod Owain o'r grwp wedi dechra prosiect unigol o'r enw "Carw". Mae o wedi creu cyfri Twitter i hyrwyddo'r prosiect, ac wedi rhoi un trac - Elevate - ar wefan soundcloud. O'r nodyn cyntaf, mae'r trac yn dwyn i gof swn gitar y Violas, ond mae'r curiadau electroneg yn dod a naws eitha gwahanol i "Carw".

Gobeithio cawn ni lot mwy gan Owain, achos mae Elevate yn wych... ond gobeithio hefyd y bydd y Violas yn parhau fel grwp!
Hwyl
Lis
x

ON Newydd glywed gan Owain - mae o'n gweithio ar fwy o ganeuon ar hyn o bryd, hefo'r gobaith o ryddhau EP pan fydd digon o ddeunydd. Mae'n recordio hefo'r cynhychydd Llion Robertson, ac yn gobeithio gigio - ond ar hyn o bryd yn trio gweithio allan sut fyddai popeth yn gweithio'n fyw!! Diolch Owain!

Yn amlwg, i ffan fel fi, ma hynny'n beth drwg - dwi'n gweld colled un o'n grwpie mwya creadigol erioed, ond er fod y grwp 'di bod yn dawel, mae'r aelodau - Gruff Rhys, Cian Ciaran, Daf Ieuan, Huw Bunford a Guto Pryce wedi bod yn brysur iawn., ac mae 2013 yn argoeli i fod yr un mor gynhyrchiol iddyn nhw.

Sengl Gulp prosiect newydd Guto Pryce hefo Lyndsey Leven, oedd un o fy hoff sengle o 2012, a dwi'n edrych 'mlaen at glywed mwy ganddyn nhw eleni. Mi oedd albym unigol gynta Cian Ciaran, "Outside In", llawn harmoniau hyfyrd a geirie torcalonus, ac felly dwi'n hynod falch bod Cian yn bwriadu rhyddhau ei ail albym yn y misoedd nesa' 'ma.

Yr wythnos d'wetha ar y rhaglen, ro'n i'n ddigon lwcus i fedru chwarae traciau "ecsgliwisif" oddiar albym newydd The Earth - band Daf Ieuan hefo Mark Roberts (Cyrff/Catatonia/Ffyrc) a Dionne Bennet (The Peth). Ma na swn pop 'soul' anhygoel i'r albym, swn eitha retro, ond hefyd yn llawn angerdd. Mi fydd albym gynta' The Earth, "OFF/ON1", yn cael ei rhyddhau ar label Strangetown Records yn fuan, hefo sengl am ddim o'r enw "I Deserve You" ar Chwefror 2il.

Mae Gruff Rhys hefyd 'di bod yn brysur yn y 3 mlynedd dwetha - falle eich bod chi wedi gweld y ffilm Seperado ar S4C dros y 'Dolig, neu wedi prynu'r albym wych "Hotel Shampoo" - albym fuddugol y Wobr Gerddoriaeth Gymraeg 2011? Ond beth am 2013...?

Wel, cyn y Dolig, ges i sgwrs hefo Gruff, ac mi oedd o'n son fod ne albym newydd ganddo ar y ffordd yn 2013. Doedd o ddim isho deud mwy, ond mae na ambell gliw wedi ymddangos yn y dyddiau dwetha. Mae Neon Neon wedi creu cyfrif Twitter - Neon Neon oedd prosiect Gruff hefo Boom-Bip, gafodd enwebiad Mercury - i gyhoeddi y bydda nhw'n DJ-io yn y Roundhouse yn Llundain ar Chwefror 19eg. Ma nhw hefyd wedi lawnsio tudalen tmblr... Dybed ydy hyn yn golygu fod yr ail albym ar y ffordd? Gobeithio wir!

Hwyl
Lis
X

Byddwn yn darlledu setiau o lwyfan yr wyl gan Swnami, Y Bandana, Niwl a Candelas ar C2. A fe allwch chi fod yn rhan o'r penwythnos hefyd - mae gwahoddiad i fandiau ifanc rannu llwyfan gyda rhai o brif fandiau Cymru!

Ewch draw i'r dudalen Facebook i gael y manylion i gyd:
http://www.facebook.com/events/588036764556202/

Welwn ni chi yno!

Cwpl o fanylion bach am Gai Toms; mae Gai wedi cyhoeddi y bydd o'n chwarae yng Ngwyl "Focus Wales" eleni, sy'n digwydd ar Ebrill 26ain yn Wrecsam. Mae Gai hefyd yn chwilio am gigs i hyrwyddo'r albym Bethel rhwng Chwefror 23 ac Ebrill 27 - cysylltwch hefo Gai os 'da chi'n drefnydd gigs ac awydd cael Gai draw.

Mae albym Gai - Bethel - allan ers 'chydig cyn 'Dolig, ond os nad yda chi wedi clywed hanes yr albym, dyma'r holl wybodaeth gan Gai.
Hwyl
Lis
x

GAi ToMS - BETHEL
Yr albwm dwbl hirddisgwyliedig. Gwledd o gerddoriaeth! (CD a MP3)

Dyma'r ail albwm i'r trwbadwr o Fro Ffestiniog ers difa'r enw Mim Twm Llai.
Y tro hwn, albwm dwbl / 2 CD - 1.Bethel Hen a 2.Bethel Newydd.

Dathliad yw'r albwm o fywyd newydd festri Capel Bethel yn Nhanygrisiau, Bro Ffestiniog. Mae Gai Toms wedi buddsoddi yn yr adeilad er mwyn ei drosi i stiwdio recordio, gofod ymarfer a swyddfa i Recordiau SBENSH. Cyn newid yr adeilad yn gyfan gwbl, penderfynodd recordio albwm fel teyrnged i'r hen, ac i ddathlu'r newydd.

CD1. Mae Bethel Hen yn gyfle i'w glywed fel cyfansoddwr a pherfformiwr amrwd. Cynhyrchiad syml gyda llais a gitâr yn bennaf, ond... er y teitl 'Hen', caneuon gwreiddiol newydd sbon sydd arni, gwerin eu naws ond yn gyfoes ac yn fythol ar yr un pryd.

CD2. Ar Bethel 'Newydd' clywn Gai Toms a'r band, caneuon aml-arddull gwreiddiol ond gyda swn a chynhyrchiad llawnach na'r hyn a glywir ar 'Hen'. Does dim ond angen gwrando ar ddeunydd Anweledig a Mim Twm Llai i brofi nad yw cymysgu arddulliau yn beth newydd iddo.

"Rwyf wedi gweithio'n galed iawn ar Bethel ac yn falch iawn o'r canlyniad, hon yw fy albwm orau hyd yn hyn. Ni fuasai'r albwm yn swnio fel y mae hi heb y cyfrannwyr i gyd, rwyf mor lwcus i fod yn ran o gymuned cerddorol talentog." GT

Ar y cyfan mae Bethel yn wledd o gerddoriaeth ble mae ymroddiad yr artist i'w grefft yn amlwg iawn. Dyma Gai Toms ar ei orau, dylai hon fod yng nghasgliad pawb.

CYFRANNWYR: Er mai artist unigol gyda band yw Gai, mae cyfoeth o artistiaid yn cyfrannu i'r wead sonig. Mae'r band ffyddlon arni wrth gwrs, ond hefyd cawn gerdd arbennig gan y bardd a'r awdur Dewi Prysor, mae Seindorf yr Oakley a Chôr y Moelwyn yn ychwnegu sain epig, yn ogystal a sgat byrfyfyriol gan y bardd o Efrog Newydd - Bob Holman! Mae ymddangosiadau arbennig hefyd gan criw o Dangrisiau yn cynnwys Dr Meredydd Evans (94bldd oed!), Ceri Cunnington (Twmffat), Phil Lee Jones (GHF / Twmffat), Lauren Humphreys, Kaz a Asa Bentham (Estella), Owain Jones (Masters in France) a chôr o blant Ysgol Tanygrisiau + mwy. (rhestr llawn i'w weld ar y clawr)

Bydd Gai Toms a'r band yn teithio Bethel yn 2013. Dyddiadau i'w cadarnhau.

CD1 BETHEL 'Hen'

1. Cân y dewis
2. Cylchoedd
3. Seren
4. Tân yn y sgwâr
5. Adar o'r unlliw
6. Y Bonws
7. Un
8. Ar y Moelwyn
9. Hud o hyd
10. Bethel

CD2 BETHEL 'Newydd'

1. Awyr las
2. Daw'r haf yn ol
3. Llyn Tekapo
4. Bradwr
5. Anti Paganda
6. Haul ar fryn
7. Eiliadau
8. Glaw yr haf
9. Twll tyllu
10. Stiletos Gwydr
11. Tân oer
12. Diwrnod eliffantod

Cynhyrchwyd gan Gai Toms
Cymysgwyd gan 'Hen' GT a 'Newydd' gan Geraint Jones @ninjasound
Mastro Geraint Jones @ninjasound
Recordiwyd yn Stiwdio Sbensh. Cymru / Wales

Band Paul Cockerill (dryms)
Euron Jones (gitâr drydan )
Gary Richardson (bas)
Elaine Thomas Gelling (lleisiau cefndir)

Un o'r pethe cynhara' i Sen Segur wneud fel band oedd recordio sesiwn byw i'r rhaglen 'nol yn 2010. Er fod y band yn ifanc iawn, a'r sesiwn yn recordiad byw, eitha amrwd, mi oedd hi'n amlwg o'r cychwyn cyntaf eu bod nhw'n fand talentog iawn, llawn syniadau, a chaneuon bachog.

Ers hynny, dwi wedi gweld y band lot fawr o weithie'n fyw, a thrwy gigio'n hynod gyson a chyd-weithio hefo cynhyrchwyr fel John Lawrence a Mr Huw, mae swn y band wedi datblygu, ac ma nhw erbyn hyn yn fand byw gwych, hefo arddull unigryw. Mi oedd yr EP gynta Pen Rhydd, ddaeth allan yn 2011, yn anhygoel, a'r sengl Sarah/Nofa Scosia yn bop seicadelic perffaith!

Felly, dwi'n edrych ymlaen at fedru chwarae'r traciau ar y rhaglen yn fuan gobeithio, ac yn y cyfamser, dyma rywfaint mwy o wybodaeth am yr EP gan y band.
Hwyl
Lis
X

Sen Segur
Sudd Sudd Sudd
Traciau:

Hei Bacym Do!
Lemoned Cymylog
Nofio Trybelydrol
Sentriffiwgal
8onglog

Gigs
19.01.13 Clwb Ifor Bach, Caerdydd/Cardiff
26.01.13 Caffi Siabod, Capel Curig
02.02.2013 Caerfyrddin/Carmarthen
05.02.2013 Bala
08.02.2013 Y Llangollen, Bethesda
09.03.2012 Ar y Rels, Bangor

Rhyddheir Sudd Sudd Sudd ar ffurf CD ac yn ddigidol i'w lawrlwytho o itunes, amazon, spotify ayyb o'r 21ain o Ionawr 2013 ymlaen. Bydd Sen Segur yn gigio'n brysur i hyrwyddo'r ep yn y flwyddyn newydd, a bydd yr ep ar gael i'w prynu yn y gigs, yn ogystal ag yn y siopau canlynol: ; Bys a Bawd (Llanrwst); Andy's Records (Aberystwyth); Spillers Records (Caerdydd); The Parrot (Caerfyrddin) ; Awen Meirion (Bala), Llen Llyn (Pwllheli), Palas Print (Caernarfon) a gwefan www.sadwrn.com.

Dwi'n edrych 'mlaen at flwyddyn arall o gyflwyno cerddoriaeth newydd o bob math ar C2. Ond ar ddechre 2013, mae'r sefyllfa rhwng y BBC ac EOS am olygu newidiadau i'r rhaglen. Ar hyn o bryd, fydd C2 ddim ond ymlaen am awr bob nos, a fydda i ddim yn gallu chware popeth fyddwn i'n ei wneud fel arfer.

Yn amlwg, mi ydw i a gweddill y criw yn gobeithio y bydd ne gytundeb teg yn dod yn fuan, ac y cawn ni barhau i roi llwyfan i'r holl gerddorion talentog 'da ni'n mwynhau cyd-weithio hefo nhw. Yn y cyfamser, mi ydw i a'r criw am wneud yr hyn y gallwn ni i sicrhau fod y gynulleidfa'n cael gwasanaeth mor gyflawn ac y gallwn ni, a bod yr artistiaid sydd wrthi'n cyfansoddi, recordio a rhyddhau ar hyn o bryd yn cael cymaint o sylw ac sy'n bosib o dan yr amgylchiadau, a'r cyfyngiadau.

Felly, mi fydda i'n blogio yn ystod y cyfnod, yn dod a newyddion o'r sîn, ac yn rhannu lincs i wefannau cerddorion, deunydd newydd, gigs ayyb. Yn y blog nesa, dwi'n gobeithio son rhywfaint am albym Siddi, ac EP Sensegur.

Dwi nol ar C2 nos fercher am 7. Blwyddyn newydd dda!

Lis
x

Amser maith yn ôl rhywbryd yn y 1970au, fe ddechreuodd bachgen ifanc o gymoedd y De Ddwyrain gymryd diddordeb mewn cerddoriaeth pop. Roedd Marc Bolan yn marchogaeth alarch wen, roedd Abba yn gorfoleddu am eu Waterloo ac roedd 'na Osmonds bach ymhobman. Roedd y chwedegau drosodd, doedd punk heb ddigwydd ac er y streics a bomiau'r IRA, roedd yn fyd o liw, diolch i Top of the Pops a Radio 1, oedd yn cael ei chwarae gan y gyrrwr ar y bws i Ysgol Ifor Bach yn Senghennydd.

Roedd mynd i'r ysgol Gymraeg yn y dyddiau yna yn rhywbeth breintiedig ac anhrydeddus. Roedd pob un disgybl yn ddraig bach oedd yn mynd i fywiogi y Gymru newydd. Roedden ni'n fahanol, yn sbesial; y rhan fwyaf ohonom, fel fi, yn dod o gartrefi di-Gymraeg. Fe ddarllenom ni am Sali Mali, am y tŷ oedd ar y comin ac am anturiaethau'r Llewod. Fe gystadlon ni mewn eisteddfodau gan adrodd am lwynogod a wiwerod. Fe ganon ni am glywed tyner lais ac am ein calonnau glân. Ond er hyn i gyd, wnaeth neb ein argyhoeddi ni fod yna sîn bop i gael.

Wedyn, un prynhawn fe newidodd popeth. Fe symudodd ein athro dosbarth ni, Moi Parri, y bordydd i un ochor ac fe'n gwahoddwyd ni i ddawnsio i synau roc, uchel, electronaidd gyda churiad oedd llawn cystal ag unrhywbeth oedd yn cael ei chwarae ar y radio ar y bws ysgol. Ond nid Queen, neu Status Quo neu Suzi Quatro oedd yn gwneud y sŵn yma ond Bran, Edward H Dafis, Seindorf a Meic Stevens. O'r diwedd roedd yna fwy i'r busnes siarad Cymraeg yma na jest cyd adrodd a cherdd dant. Roedd hyn yn hwyl. Ac roeddwn i eisiau mwy.

Pan gyrhaeddais i Ysgol Gyfun Rhydfelen fe ddes i'n aelod brwdfrydig o'r Uwch Adran, oedd yn trefnu disgos Cymraeg ar nosweithiau Gwener. Fe ddes i'n ffan o recordiau'r Trwynau Coch, Geraint Jarman a'r Llygod Ffyrnig oedd yn cael eu chwarae gan y DJ Alun ap Brinley o ddosbarth chwech. Dyma recordiau oedd yn adlewyrchu hinsawdd newydd, ifanc, oedd yn edrych ar y byd o'n cwmpas ac i'r dyfodol...

Roedd yn rhaid i mi gymryd rhan yn hyn i gyd, felly dyma fi a chriw o ffrindiau ysgol o gefndiroedd tebyg ffurfio ein grŵp ein hun, sef Clustiau Cŵn. Dyma oes y cylchgrawn Sgrech, y gigs ym Mlaendyffryn, Corwen a Plas Coch. Fe ddaeth ein record, Byw yn y Radio, allan ac fe ddechreuodd antur mwya fy mywyd i.

A phob bore Sadwrn, byddwn yn tiwnio mewn i Radio Cymru ar gyfer Sosban gyda Richard Rees. Ymhell cyn cyfnod y we a Maes E a Facebook a Twitter dyma lle roedd y bwrlwm i gyd. Bydde pobol yn sgrifennu mewn a ffonio gyda cheisiadau a negeseuon. Bydde bandie'n galw heibio i sôn am eu gigs a'u recordiau. Roedd sesiynau ecsgliwsif ac adolygiadau o berfformiadau. Wrth gwrs, roedd 'na raglenni teledu - ond fel mae pawb yn gwybod, y radio yw cartref roc a rôl - ac am ddwy awr ar ddechrau'r penwythnos, roedd gan roc a rôl gartref Cymraeg.

Wrth i'r wythdegau symud yn eu blaen fe gododd y sîn tanddaearol gyda grwpiau fel Datblygu, Y Cyrff a Tynal Tywyll yn dechrau mynnu sylw. Dyma gyfnod y ffansîns a'r labeli annibynnol; y casétiau, Recordiau Anhrefn a Fideo 9. Fe ymatebodd Radio Cymru gyda'u rhaglenni Hwyrach.

Yma, y gerddoriaeth ddaeth yn gyntaf, gyda rhaglenni fel Heno Bydd yr Adar yn Canu, gyda Nia Melville yn rhoi'r pwyslais ar fandiau oedd yn torri tir newydd. Bandiau ifanc fel Gorky's, Fflaps a Ffa Coffi Pawb ddaeth i'r amlwg fan hyn, a hynny ar raglenni oedd yn cael eu darlledu BOB NOS! Roedd hyn yn chwyldro aeth ymlaen i gofnodi tyfiant y sîn a alwyd yn Cŵl Cymru gyda llwyddiant Catatonia a'r Super Furries. Dyma hefyd gyfnod cylchgrawn Sothach, Recordiau Ankst ac R Bennig a'r sîn ddawns. Roedd yna deimlad fod Radio Cymru yna, trwy ei raglenni hwyrach, yn rhan o'r holl beth. O'r diwedd doedd dim rhaid i ti fod o reidrwydd yn aelod o gôr neu dîm rygbi i deimlo dy fod yn 'Gymro go iawn'.

Ac yn yr awyrgylch yma, ar ôl i SFA sgorio cais a'i throsi gydag albym uniaith Gymraeg - sef Mwng, yn y deg uchaf Brydeinig - fe ddaeth C2 i fodolaeth, ddeng mlynedd yn ôl, ar yr ail o Ragfyr 2002.

Roedd cerddoriaeth pop Gymraeg wedi tyfu lan. Ac roedd yn rhywbeth oedd yn werth ei ddathlu. O wyth o'r gloch bob nos, roedd Radio Cymru yn mynd i droi'n orsaf gerddoriaeth go iawn.

Roedd y tîm ar y dechre yn cynnwys DJs fel Kevin Davies, Beks, Daf Du ac wrth gwrs Huw Stephens. Dyma gychwyn Siart C2 i adlewyrchu beth oedd yn digwydd go iawn ar y sîn o wythnos i wythnos. Recordiwyd sesiynau gan yr anfarwol MC Mabon, Geraint Jarman, Llwybr Llaethog a'r bytholwyrdd Meic Stevens.

Dyma gyfnod labeli Ciwdod, Gwymon a'r cylchgrawn Y Selar. Caneuon fel Sex Sells gan y Poppies, Y Mwyafrif gan Pep Le Pew a Gad Fi Fod gan Cofi Bach a Tew Shady. Lansiwyd Gwobrau RAP; noson i ddathlu'r goreuon ymysg ein artistiaid.

Mae'r ddeng mlynedd ers dyfodiad C2 wedi gweld rhaglenni gan gymysgedd eang o ddarlledwyr fel Daniel Glyn, Lisa Gwilym, Magi Dodd, Hefin Thomas, Nia Medi, Ffion Gwallt Dafis, Brychan Llŷr, Geraint Jarman, Huw Chiswell, Huw Evans, Bethan Elfyn, Dyl Mei, Georgia Ruth, Ian Cottrell, Stuart Cable a Dewi Pws, Rhys Mwyn, Ryland Teifi, Owen Powell, Steffan Cravos, Cynan Llwyd, Griff Lynch, Gruff Pritchard, Ifan Evans a Dafydd James.

Ond beth am y presennol? Beth ydy pwrpas C2 yn 2012? Ai platfform i lansio gyrfa yn y cyfryngau fel cyflwynydd neu i weinyddu'r gwrandawyr gyda'r danteithion diweddaraf a mwya blasus o'r sîn? Ife i dorri tir newydd a darganfod talentau ifanc ynteu ein diddanu gydag eitemau difyr a doniol?

Yn bersonol, dwi'n hoffi cyfuniad. Ac mae'r cyfuniad yma yn bwysig i gadw C2 yn ffresh ac yn ddiddorol. Yn ystod y flwyddyn ddiwetha', dwi wedi ymddangos ar raglen yr unigryw Dafydd James yn canu medli o ganeuon Datblygu, Yr Anhrefn ac Amy Winehouse rownd y piano ac wedi dewis traciau i gymryd lan i'r gofod 'da fi ar raglen rhagorol Huw Evans. Dwi wedi siarad am rôl y gân protest ac wedi dathlu'r grŵp anfarwol Y Cyrff.

Fel gwrandäwr, dwi wrth fy modd pan mae cerddor neu arbenigwr/wraig yn cymryd yr awenau. Mae cyfresi Geraint Jarman, Ian Cottrell a Dyl Mei wedi bod yn ddifyr ac yn werthfawr. Dyw'r bobol yma ddim jest yn 'eitha hoff 'o gerddoriaeth, mae nhw, fel fi, yn obsessed! Mae eu brwdfrydedd yn hedfan drwy'r awyr fel y ffliw a dwi'n herio unrhyw un sy'n gwrando i beidio dal y firws melys o fewn pum munud.

Ar y llaw arall mae Magi Dodd fel mêt go iawn, yn arwain ar y daith ysgolion ac yn ein tywys ni drwy bentwr o tiwns a clecs. Mae ei steil hamddenol a chyfeillgar yn denu gwrandawyr ffyddlon ac ifanc i'r gwasanaeth ac mae ei chyfraniad yn werthfawr ac yn ddifyr ar yr un pryd.

Ac wrth gwrs, does dim pwynt trafod C2 heb rhoi masif pump uchel i 'Mr. C2', sef Huw Stephens. Mae e wedi bod yna ers y cychwyn. Ac wrth i'w yrfa ar Radio 1 gyrraedd yr uchelderau, mae e wedi bod yna hefyd ar C2 yn ein cyflwyno ni i bentwr o recordiau ôsym ac yn cyfweld â thalentau a phersonoliaethau mwya difyr y genedl. Nos Lun dwetha', ro'n i'n gyrru adre o weithio gyda grŵp ieuenctid yn Troedyrhiw. Roedd C2 ar y radio pan gyflwynodd Huw gân gan Afal Drwg Efa gyda Casi Wyn yn canu un o ganeuon Y Bara Menyn, sef Yr Wylan. Clasur o gân a recordiwyd yn wreiddiol dros ddeugain mlynedd yn ôl. Ond roedd gan y fersiwn yma guriad electronaidd a hollol 'nawr'. Dyma un o fomentau mwya perffaith y flwyddyn i mi. Roedd y ffaith bod y gân yma'n chwarae, a minnau'n hercian lawr yr A470 ar ôl diwrnod hir a blinedig yn adfywio ac yn gwneud i mi feddwl bod popeth yn iawn yn y byd.

Ym 1979 roeddwn i'n rhy ifanc i'r sîn. Yn 2012 dwi lot rhy hen. Ond dwi'n dal i ffitio mewn, rhywsut. Dwi'n caru pop a dwi'n caru pop Cymraeg. A thra fod C2 yn teimlo'r un fath mae'n haeddu bod ar yr awyr.

Mae Gwilym Rhys o'r Bandana rhai wythnosau i mewn i'w raglen newydd erbyn hyn, ac mae Gwyn Eiddior newydd ddechre cyfres am gerddoriaeth electroneg. Wrth gwrs mae 'na lot mwy wedi cyfrannu, a dyw pob un ddim wrth ddant pawb wrth gwrs, ond dyna un o'r pethe gore amdan y ffrwd. Ac mae'r ffaith ein bod ni gyd yn wahanol, gyda chwaeth gwahanol, yn rhywbeth i'w ddathlu.

Dwi'n eistedd ger fy radio digidol a dwi'n codi gwydred. Pen-blwydd hapus yn ddeg oed C2, a hir oes i ti!

Gareth Potter Tachwedd 2012

Oriel luniau 10 mlynedd o C2
Clip o ddechrau'r rhaglen gyntaf yn 2002

The Plot Against Common Sense yw 3edd albwm y band o Gaerdydd. Sefydlwyd y band pan ddaeth aelodau o Mclusky a Jarcrew at ei gilydd nol yn 2005.

Roedd 12 albwm ar y rhestr fer a phanel o newyddiadurwyr, cyflwynwyr, blogwyr ac arbennigwyr o'r diwydiant oedd yn beirniadu.

Y cyflwynydd radio Adam Walton oedd yn cyflwyno'r wobr, sydd yn ei ail-flwyddyn. Gruff Rhys a'i albwm Hotel Shampoo oedd yr enillydd y llynedd.

Mae'r seremoni yn dynodi cychwyn Gwyl Swn - gwyl aml-leoliad yng Nghaerdydd.

Y rhestr fer yn ei chyfanrwydd -

Bright Light Bright Light - Make Me Believe in Hope
Cate Le Bon - CYRK
Cowbois Rhos Botwnnog - Draw Dros Y Mynydd
Exit_International - Black Junk
Future of the Left - The Plot Against Common Sense
Huw M. - Gathering Dusk
Islet - Illuminated People
Jodie Marie - Mountain Echo
Kids in Glass Houses - In Gold Blood
Kutosis - Fanatical Love