KALLATTIIN, Tiraamp erga pirezidantii Chaayinaa waliin dubbatee booda Iraan irratti 'obsa fixachuu' ibse

Haguuggii Tamsaasa Kallattii

1. Sa'aatii 7 dura'Iraan US hin amantu, yoo haqaan taate qofa mari'anna' -Abbaas Araagchii

   

   Madda suuraa, Getty Images

   Teehraan Ameerikaarraa "amantaa hin qabdu", Waashingtan faana kan mari'attu yoo "haqaan" taate qofa jedhan Ministirri Dhimma Alaa Iraan Abbaas Araagchii. Araagchiin wayita mariin waraana Iraan ilaallatu dhaabbatee jirutti kana dubbatan.

   Kanneen waraana Tehraanirratti bananiin ala, dooniiwwan daldalaa hunduu Ulaa Hormuuz keessa darbuu ni danda'u jedhan Kora ministiroota dhimma alaa biyyoota BRICS kan Hindii Niw Delhiirratti hirmaachaa jiran Araagchiin.

   Dooniin darbuu feetu humna galaanaa keenya waliin qindaawuu qabdi jedhan.

   Haalli imala Ulaa Hormuuz "baay'ee wal xaxaa ta'eera", jedhan. Iraan ulaa kana cufuutti milkaawuu himan.

   Waashingtanii fi Tehraan ji'a tokkoo as erga dhukaasa dhaabuuf waliigalanii booda ammallee waliigalticha diiguuf waldhaansoo keessa jiru.

   Marii jaarsummaa Paakistaaniin eegalame torbee darbe gareen lamaanuu marii diduu hordofee dhaabbateera.

   "Ergaan wal dhiitu" Ameerikaa tamsaaftu akeeka qabatamaa Ameerikaan marii irratti qabdurratti akka of qusannu nu gochaa jira jedhan Abbaas Araagchii.

   Paakistaan carraaqqii hin dhiifne haalatu ishee "rakkise" jedhan.

2. Sa'aatii 7 duraDeevid Beekam taphataa kubba miilaa UK jalqabaa biliyeenera tahe

   

   Madda suuraa, Getty Images

   Taphataan kubba miilaa duraanii Ingilaandii fi Maanchister Yuunaayitid, Deevid beekam taphataa jalqabaa UK sadarkaa biliyeenerootaa keessa gale tahe.

   Sunday Times Rich barruun jehdu akak gabaasetti, qabeenyi waliinii Beekamii fi Viiktooriyaa paawondii biliyoona 1.185 gahe.

   Qabeenya haga kana qabaachuun ispoortessaa UK keessaa sadarkaa lamaffaa qabataniiru. Tokkoffaan hogganaa duraanii Formula 1, Beernii Ekilistoon yoo tahu gara paawondii biliyoona 2 taha.

   Abbaan qabeenyaa Maanchister Yuunaayitid Sir Jiim Raatkiliif akka abbootii qabeenyaa UK waliigalaatti sadarkaa torbaffaa irraa salgaffaatti gadi bu'e.

   Raatkiliif qabeenyi isaa paawondii biliyoona 15.194 yoo tahu dhiyeenya qabeenyi isaa paawondii biliyoona 1.85 tahuun gadi bu'e.

   Beekaam abbaa qabeenyaa Inter Miyaamii yoo tahu kilebichi paawondii biliyoona 1.45tti tilmaamama.

   Ambaasadara Adidaasii fi Huugoo Bos tahuunis hojjetaa ture. Haati warraa isaa Viiktooriyaan ammoo madda galii guddaa kan qabdu faashinii irraati.

3. Sa'aatii 9 duraDaawwannaa Tiraamp booda Puutin gara Chaayinaa imaluufi

   

   Madda suuraa, Reuters

   Pirezidantiin Raashiyaa Vilaadmiir Puutin akkuma Tiraamp daawwannaasaa xumureen gara Chaayinaa imaluufi.

   Tiraamp bulchaa Chaayinaarraa simannaa gaarii fi kabaja argatus dhimmoota xiyyeeffannoo marii turan, dhimma Taayiwaan fi Iraan irratti garuu waan barbaade argatee hin deebine.

   Pirezidantiin US kun jalqaba wayita gara Chaayinaa imalu ''waraana Iraan irratti deeggarsa Chaayinaa hin barbaadu'' jedhee ture.

   Marii Pirezidantii Chaayinaa Shii Jinping waliin gaggeessaa turerratti ammoo akka Chaayinaan hariiroo siyaasaa fi diinagdee Iraan waliin qabdu fayyadamtee dhiibbaa uumtu gaafateera.

   Mootummaan Raashiyaa akka ibsetti Pirezidant Puutiin yeroo gabaabaa keessatti gara Chaayinaa imaluun gitasaa kan Chaayinaa Shii Jinping waliin mari'ata.

   Puutiin fi Shii Jinping yeroo 40 ol walarganiiru, dhihoo kan walargan Fulbaana darbe ture.

   Dubbi himaan mootummaa Raashiyaa Dimitirii Peskov daawwannaan Puutiin ''yeroo gabaabaa keessatti'' akka ta'uu fi yeroonsaa dhiheenyatti akka ibsamu gaazexeessitootatti hime.

   Peskov Puutin fi Shii dhimma hariiroo biyyoota lameen fi daldala cimsuurratti xiyyeeffachuun mari'atu jedhe.

   Dhimmoota idiladdunyaarrattis xiyyeeffachuun ni mari'atu.

   Michoonni Iraan Chaayinaa fi Raashiyaan maaliif waraanaan Iraan hin tumsine?

4. Sa'aatii 9 duraDR Koongootti Iboolaan bifa haaraan ka'uun namoota 65 ajjeese

   

   Madda suuraa, AFP via Getty Images

   Dhaabbati To'annoo fi Ittisaa Dhibee Afrikaa (CDC Africa) lixa Rippaablika Dimokiraatawaa koongootti weerarri Iboolaa akka haaraatti eegaluu ibse.

   Weerara kanaan hanga ammaatti namoonni 246 kan qabaman yoo ta'u, 65 du'uu dhaabbati kun gabaaseera.

   Jaarmiyaan kun ibsa Jimaata baaseen akkaataa ittisa weerara dhibee kanaarratti DR Koongoo, Yugaandaa, Sudaan Kibbaa fi jaarmiyaalee idiladdunyaa waliin dubbachuu akka eegale eere.

   Iboolaan tuttuqqaa qaamaan kan daddarbu yoo ta'u, qaamni akka baayyee dhiigu gochuun lubbuu gaaga'a.

   Bara 1976 biyya amma DR Koongoo jedhamtu keessatti kan mul'ate Iboolaan, simbirroo halkaniirraa gara dhala namaatti tatamsa'e.

   Ho'inni qaamaa, dhukkubbiin maashaalee, dadhabbiin, mataa bowwuu fi qoonqoon miidhamuun mallattoo dhibee kanaati.

   Weerara dhibee Iboolaa bara 2018 fi 2020 gidduutti DR Koongoo keessatti mudateen namoonni 2,300 du'aniiru

5. 15 Caamsaa 2026Iraan UAEn kallattiin waraana keessatti hirmaachuu himatte

   

   Madda suuraa, AFP via Getty Images

   Ministirri dhimma alaa Iraan kora BRICS Indiyaa New Delhiitti gaggeeffamerratti Yunaayitid Arab Emireetis (UAE) oppireeshinii waraanaa Iraan irratti gaggeeffame keessatti kallattiin hirmaatte jechuun himate.

   Himannaan Iraan kun erga UAEn Ministirri Muummee Israa'el Beenjaamiin Neetaaniyaahuu dhoksaan biyyattii daawwachuu haaltee dhagahame.

   Neetaaniyaahuun yeroo waraana Iraan dhoksaan pirezidantii UAE waliin mari'achuu erga ibsee booda Abbaas Araagchii ''qondaalli Israa'el kun waan tajaajilli tikaa keenya uummatatti himaa ture amma ifa baase,'' jedhe.

   ''Tokkummaan keenya akka hin miidhamneef jecha maqaa UAE eeruu irraa of qusadheen ture. Garuu dhugaan jiru UAEn weerara Iraan irratti gaggeeffamaa ture keessatti kallattiin hirmaatteetti,'' jedhe Araagchiin.

   Miidiyaan Iraan qondaalli biyyattii kun deebii ibsa UAE'f kenneen kana dubbachuu gabaase.

   Garuu ibsi warra UAE maalirratti akka xiyyeefatee fi waa'ee Iraan maal akka kaase hin gabaasne.

   Abbaas Araagchii buufati waraanaa US akkasumas michummaan waraanaa Israa'el waliin qaban UAE baraaruu hin dandeenye, kanaaf biyyattiin akka michummaashee Iraan waliin cimsitu gaafate.

   ''Nagaan waliin jiraachuu qabna. Kun ammoo hariiroo naga qabeessa fi wal hubannoo gaafata,'' jedhe Araagchiin.

   Gaazexaan Wall Street UAEn Iraan haleeluu Wiixata gabaase ture.

   Sa'uudii Arabiyaanis dhoksaan Iraan haleelaa akka turte gabaasi Rooyitarsi mul'iseera.

   MM Israa'el dhoksaan UAE daawwachuurratti Iraan fi UAEn deebii kennan

   Sa'uudiifi UAE'n Iraan irratti haleellaa raawwachuu gabaasni mul'ise

   Paakistaan xiyyaarota waraanaa Iraaniif dawoo kennuun marii US fi Iraaniif maal akeeka?

6. 15 Caamsaa 2026Chaayinaan waraana Iraan dhaabsisuuf 'baayyee ifaajaa' jiraachuu himte

   

   Madda suuraa, Reuters

   Mootummaan Chaayinaa waraanni Baha Giddugaleessaa akka xumuramuuf adeemsa marii nagaa keessatti gumaacha taasisaa jiraachuu ibse.

   Ejjennoon mootummaa Chaayinaa miidiyaa biyyattiirratti darbe kun erga Tiraamp Fox News irratti ''dhimma Iraan irratti obsa fixadheera'' jechuun waa'een marii nagaa isa hifachiisuu dubbatee booda dhagahame.

   Tiraamp akka jedhutti Pirezidant Shii Jinping dhimma Iraan irratti fala kaa'uu ilaalchisee Chaayinaan akka isa deeggartu itti himeera.

   Chaayinaan Iraan waliin hariiroo siyaasaa fi diinagdee cimaa qabdi.

   Tiraamp kana fayyadamuun akka Chaayinaan Iraan irratti dhiibbaa gootu barbaada.

   Ibsi mootummaa Chaayinaa ''waraanichi gonkumaa eegaluun akka irra hin turrree'' fi sababni inni itti fufuufis akka hin jirre eera.

   Garuu warra waraanicha eegale (US fi Israa'el) irratti kallattiin qeeqa hin dhiheessine.

   Waraana kanaan Chaayinaanis guddoo miidhamteetti.

   Ulaan Hormuuz cufamuun dhiheessiin boba'aa akka hir'atu taasise, gatiin akka dabaluuf sababa ta'e.

   Kun ammoo oomishaalee Chaayinaa akkaan miidhe.

   Garuu ammoo gama dippiloomaasii fi siyaasaan Chaayinaan waan miidhamte hin qabdu.

   Gama kanaan miidhaan US irra ga'e salphaa miti.

   Yeroo ammaa Chaayinaan waraana kana dhaabsisuu keessatti biyya filatamtuu taateetti.

   Haalli kun Chaayinaan utubaa diinagdee addunyaa qofa osoo hin taane gama dippiloomaasiitiinis fudhatama guddaa argachaa jiraachuu mul'isa.

7. 15 Caamsaa 2026Tiraamp erga Shii waliin mari'atee booda dhimma Iraan irratti 'obsa fixachuu' dubbate

   

   Madda suuraa, Reuters

   Pirezidantiin US Doonaald Tiraamp gita isaa kan Chaayinaa Pirezidant Shii Jinping waliin erga mari'atee booda dhimma Iraan irratti 'obsa fixachuu' dubbate.

   Tiraamp Kamisa waa'ee waraana Iraan Pirezidant Shii waliin erga mari'atee booda gaaffii fi deebii Fox News waliin taasiseen kana dubbate.

   Waayit Haawus akka ibsetti Tiraamp fi Shiin dhimma Ulaa Hormuuz bansiisuu irrattis bal'inaan dubbataniiru.

   Chaayinaan michuu Iraan yoo ta'u, biyya boba'aa Iraan baayyinaan bittuudha.

   Ameerikaan haleellaa Iraan irratti raawwattu jaarsummaa Islaamaabaadiin dhaabdus, dooniiwwan buufata Iraan seenanii ba'an ugguruu garuu itti fufteetti.

   Chaayinaan mariin nagaa US fi Iraan akka milkaa'uuf Paakistaan tumsaa turte.

   Garuu Iraan yuraaniyemii ishee guutummaatti dabarsitee kennuu irratti murteerra ga'uu dhabuunshee mariin kun akka gufatu taasiseera.

   Pirezidant Tiraamp daawwannaa Chaayinaatti taasise kanarrattis ''Iraan gonkumaa nukilara qabaachuu hin qabdu,'' jedheera.

   ''Obsa fixadheera. Kanaan booda waanan obsu natti hin fakkaatu. Waliigalteerra ga'uu qabu,'' jechuun akeekkachiise.

   Oduu dabalataaf

8. 15 Caamsaa 2026Akkam jirtu?

   Tamsaasa kallattii keenya kan Jimaataa eegalleerra.

   Odeessaalee biyya keessaa fi alaa hordofnee karaa kanaan isin biraan geenya.

   Odeessaalee qixeessinu karaa Marsariitii, YouTube, Facebook fi WhatsApp keenyaas argachuu dandeessu.

   Tamsaasa kallattii kanaan duraa argachuuf: Marii Tiraamp fi Shi Jinping yeroo dheeraa fudhate